Na Lako Yani 31 - AI VOLA TABU（FIJ1864）

Sa cavuti ko Pisalieli kei Aoliapi me kitaka na vale gatu kei na kenai yaya, 1-11. Sa vunautaki tale na siga tabu me vakatabui, 12-17. Sa soli na vatu e rua ni vunau vei Mosese, 18.

1A sa vosa vei Mosese ko Jiova, ka kaya,

2Raica, kaʼu sa cavuta na yaca i Pisalieli na luve i Uri, na luve i Uri, e na yavusa i Juta:

3kaʼu sa vakasinaiti koya talega e na Yalo ni Kalou, e na vuku, kei na yalomatua, kei na daukila-ka, kei na cakacaka kecega,

4me vakasama na cakacaka vakavuku, me cakacaka e na koula, kei na siliva, kei na parasa,

5kei na dauta vatu, me vono, kei na dauceu kau, me kitaka na cakacaka kecega.

6Ka, raica, kaʼu sa lesia kaya na luve i Eiisamaki, ko Aoliapi, e na yavusa i Tani; kaʼu sa vakavuqataki ira kece talega era yalomatua, me ra cakava na ka kecega kaʼu sa vunautaka vei iko;

7a vale gatu ni veitata, kei na kato ni vunau, kei nai cabocabo-ni-bulubulu me toka e delana, kei nai yaya kecega ni vale gatu,

8kei nai kanakana kei na kenai yaya, kei nai tutu-ni-cina savasava kei na kenai yaya kecega, kei nai cabocabo ni boi vinaka vakamai,

9kei nai cabocabo ni soro kama kei na kenai yaya kecega, kei nai deredere kei na kenai tutu,

10kei na veisulu me cakacaka kina, kei na veisulu tabu vei Eroni na bete, kei na nodratou veisulu na luvena, me ia kina na cakacaka vakabete,

11kei na waiwai mei lumu, kei na kau boi vinaka vakamai ni tikina tabu: me ra cakava me vaka na ka kecega kaʼu sa vunautaka vei iko.

12A sa vosa vei Mosese ko Jiova, ka kaya,

13Mo vosa tale vei ira na luve i Isireli, ka kaya, Kemuni na vakabauta vakaidina na noqu siga ni vakacecegu: ni sai vakatakilakila vei kemuni vei au talega e na nomuni tabatamata kecega; mo ni kila kina ni sa ko Jiova sa vakatabui kemuni koi au.

14Kemuni na vakabauta kina na siga ni vakacecegu; ni sa tabu vei kemudou: o ira kecega sa vakacacana ena vakamatei vakaidina: ia ko ira kecega sa cakava kina e dua na cakacaka, ena muduki tani na tamata ko ya maivei ira na kai nona.

15E ono na siga me kitaki kina na cakacaka; ia e na kenai kavitu ni siga sa gauna ni vakacecegu me vakacegu kina, e tabu me nei Jiova: ko ira kecega sa kitaka na cakacaka e na siga ni vakacecegu, ena vakamatei vakaidina.

16Ia me ra vakabauta na siga ni vakacecegu na luve i Isireli, me vakatabuya na siga ni vakacecegu e na nodrai tabatamata kecega, me veiyalayalati e tawa mudu.

17O qori nai vakatakilakila vei au kei ira na luve i Isireli me tawa mudu: ni sa cakavi lomalagi kei vuravura ko Jiova e na siga e ono, ka sa vakacegu e na kenai kavitu ni siga, ka sa vakacegui.

18Ia ni sa tinia na nona vosa vei Mosese mai na dela ni ulu-ni-vanua ko Sinei, sa qai solia vua e rua na ka raraba ni vunau, a vatu raraba, sa vola e nai qaqalo ni liga ni Kalou.