1Mo cakava talega e dua nai cabocabo me vakama kina na boi vinaka: mo cakava e na kau sitimi.
2Me rua na caga na kena balavu, ka rua na caga na kena raraba; me takiveilevu e na yasana e va: ka va na caga na kena cecere: ena mai na nona kau na veitikina sa tu cake.
3Ia mo botana e na koula dina, a delana, kei na veiyasana sa volita, kei na veitikina sa tu cake; ia mo cakava kina e dua nai sala koula me volita.
4Ka rua na mama koula mo cakava kina e ruku ni nonai sala, e na tutuna e rua, mo cakava e na yasana e rua; me ka me ra daramaki kina nai vua me colati kina.
5Ia mo cakava na veivua e na kau sitimi, ka botana e na koula.
6Ia mo vakatikora e na mata ni lati sa voleka ki na kato ni vunau, me donuya nai cabocabo-ni-bulubulu sa toka e dela ni kato ni vunau, a tikina kaʼu na veitata kina kei iko.
7Ia ko Eroni ena vakama na kau boi vinaka e na sabogibogi kecega: ni sa laʼki cakava vinaka na veicina, me qai vakama e delana na boi vinaka.
8Ia ni sa vakacaudreva na veicina e na yakavi ko Eroni, me qai vakama kina na boi vinaka, me boi vinaka vakamai e na mata i Jiova tikoga, e na nomudoui tabatamata kecega.
9Dou kakua ni cabora kina e dua na boi vinaka tani me vakamai, se nai soro kama, se nai madrali laukana; dou kakua talega ni livia ki delana nai madrali liviraki.
10Ia ko Eroni ena ia nai bulubulu e na veitikina sa tu cake ka vakadua e na veiyabaki, e na dra ni soro ni valavala ca sa ia kina nai bulubulu: me ia ko koya nai bulubulu e delana ka vakadua e na veiyabaki, e na nomudoui tabatamata kecega: o qo na ka tabu sara me nei Jiova.
11A sa vosa vei Mosese ko Jiova, ka kaya,
12Ni ko sa wiliki ira na luve i Isireli me vaka na kedrai wiliwili, me ra qai solia na tamata yadua nai voli ni nona bula vei Jiova, ni ra sa wiliki; me kakua kina ni tauvi ira na mate ca, ni ra sa wiliki.
13Sa vakaoqo na ka me ra solia, ko ira yadua sa lako kei ira era sa wiliki, e dua na wase ni sikeli ni sa wase rua, me vaka na sikeli ni tikina tabu: (a kera e ruasagavulu na sikeli e dua:) e dua na wase ni sikeli ni sa wase rua na ka me cabo vei Jiova.
14O ira yadua sa lako kei ira era sa wiliki, ni sa ruasagavulu na nona yabaki, se levu cake, me soli na ka me cabo vei Jiova.
15Me kakua ni vakalevutaka na vutuniyau, me kakua talega ni vakalailaitaka na dravudravua, me dua ga na wase ni sikeli ni sa wase rua, ni ra sa cabora nai solisoli vei Jiova, me volia na nomudou bula.
16Ia mo kauta nai lavo ni veibuluti maivei ira na luve i Isireli, ka lesia me ia kina na cakacaka ni vale gatu ni veitata; me ra nanumi na luve i Isireli e na mata i Jiova, mei voli ni nomudou bula.
17A sa vosa vei Mosese ko Jiova, ka kaya,
18Mo cakava talega e dua nai deredere parasa, a kenai tutu talega me parasa, me deredere kina: ia me viritu e na maliwa ni vale gatu ni veitata kei nai cabocabo-ni-soro, mo qai sova kina na wai.
19A ratou na derea maikina na ligadratou kei na yavadratou ko Eroni kei na luvena:
20ni ratou sa curuma na vale gatu ni veitata, eratou na qai deredere e na wai, me ratou kakua ni mate: se ni ratou torova nai cabocabo-ni-soro me ia na cakacaka, me vakama na ka sa cabori vei Jiova e na buka waqa:
21me ratou qai derea na ligadratou kei na yavadratou, me ratou kakua ni mate: ia ena ka vakaroti vei ira me tawa mudu, vei koya kei na nona kawa e na nodrai tabatamata kecega.
22A sa vosa vei Mosese ko Jiova, ka kaya,
23Mo kauta talega vei iko na ka sa talei e nai saluaki, me lima na drau na sikeli mura dina, kei na sinamoni kamikamica me lailai sobu, me rua ga na drau ka limasagavulu, kei na kalamo kamikamica e rua na drau ka limasagavulu,
24kei na kasia e lima na drau na sikeli, me vaka na sikeli ni tikina tabu, kei na waiwai olive e tini na painiti:
25ia mo cakava me waiwai ni veilumuti tabu, na waiwai sa waki vata me vaka na nonai valavala sa veiwakitaka nai saluaki: ena waiwai ni veilumuti tabu.
26Ia mo lumuta kina na vale gatu ni veitata, kei na kato ni vunau,
27kei nai kanakana kei na kenai yaya kecega, kei nai tutu-ni-cina kei na kenai yaya, kei nai cabocabo ni boi vinaka vakamai,
28kei nai cabocabo ni soro kama kei na kenai yaya kecega, kei nai deredere kei na kenai tutu.
29Ia mo vakatabuya, me ra tabu sara: a ya kece sa tarai ira, ena tabu.
30Mo qai lumuti Eroni kei na luvena, ka buli iratou, me ratou bete vei au.
31Ia mo vosa vei ira na luve i Isireli, ka kaya, O qo na noqu waiwai tabu mei lumu, e na nomudoui tabatamata kecega.
32Me kakua ni liviraki ki na yago ni tamata, dou kakua talega ni cakava e dua me tauvata kaya, me vaka na kenai wakiwaki: sa tabu o qo, ena tabu vei kemudou.
33O koya sa wakitaka e dua me tauvata kaya, se livia e so ki na tamata tani, ena muduki tani ko koya vei ira na kai nona.
34A sa kaya vei Mosese ko Jiova, Mo kauta vei iko na drega ni kau boi vinaka, na sitakite, kei na onika, kei na kalipeno; a drega ni kau boi vinaka vata kei na drega dina me vakamai: me tauvata na kedratou bibi:
35ia mo cakava me boi vinaka me vakamai, a ka sa waki vata me vaka na nonai valavala sa veiwakitaka nai saluaki, sa vakamasimataki, sa savasava ka vakatabui:
36ia mo vurumemea e so, ka virikotora e na mata ni kato ni vunau e na vale gatu ni veitata, a tikina kaʼu na veitata kina kei iko: me ka e tabu sara vei kemudou.
37Ia na boi vinaka me vakamai ko na cakava, dou kakua ni cakava vei kemudou e dua me vaka na kenai wakiwaki: ena nomu tabu me nei Jiova.
38O koya sa cakava na kena tauvata, me boica, ena muduki tani vei ira na kai nona.
Who We AreWhat We EelieveWhat We Do
2025 by iamachristian.org,Inc All rights reserved.
