1IA mo kauti Eroni na tuakamu vei iko, kei iratou vata kaya na luvena tagane, maivei ira na luve i Isireli, me bete vei au ko koya, io ko Eroni, ko Natapi kei Apiu, ko Eliasari kei Icamari, eratou luve i Eroni.
2Ia mo cakava e so nai sulu tabu vei Eroni na tuakamu, me vakaiukuuku ka matavinaka.
3Ia mo vosa vei ira kecega sa lomavuku, o ira kaʼu sa vakasinaita e na yalo ni vuku, me ra cakava na veisulu i Eroni me vakatabui kina ko koya, me bete vei au.
4Ia o qo na veisulu me ra cakava; e dua nai taube, kei nai sulu-me-vauci, kei nai sulu e rukuna, kei na kote sa vakaiukuukutaki, nai sala, kei nai vau ni tolona; ia me ra cakava na veisulu tabu vei Eroni na tuakamu, kei iratou na luvena, me bete vei au ko koya.
5Ia ko ira, me ra kauta na koula, kei na ka karakarawa, ka damudamu, ka rusivakula, kei na malo matailalai.
6Ia me ra cakava nai sulu-me-vauci e na koula, e na ka karakarawa, ka damudamu, e na ka rusivakula, kei na malo matailalai ni wa muloci, e na cakacaka ni vuku.
7Me rua na kena wa bale, me vau ki na tutuna e rua; ia erau na vauca vata.
8Ia nai vau talei ni sulu-me-vauci, sa tiko kina, me caka vakakina, me vaka na kenai valavala; e na koula, e na ka karakarawa, ka damudamu, ka rusivakula, kei na malo matailalai ni wa muloci.
9Ia mo kauta e rua na vatu onikisa, ka ceuta kina na yacadratou na luve i Isireli:
10e ono na yacadratou e na vatu e dua, ka ono na yaca sa vo e na vatu kadua, me vaka na nodratou sucu.
11E na nona cakacaka na matai dauceu vatu, me vaka sa ceu na mama, mo ceuta vakakina na yacadratou na luve i Isireli e na vatu e rua: mo cakava me vakataudeitaki e na qara koula.
12Ia mo tokara na vatu e rua ki na wa bale ni sulu-me-vauci, me vatu me ra nanumi kina na luve i Isireli: ia ko Eroni ena colata na yacadra e na mata i Jiova e na tabana ruarua, me ra nanumi kina.
13Mo cakava talega e so na qara koula;
14ka rua na sinucodo e na koula dina; mo tobea ni ko cakava, me vaka na wa, ka bukia na sinucodo sa tobe ki na qara.
15Ia mo cakava nai taube ni veilewai e na cakacaka ni vuku; mo cakava me vaka nai valavala ni sulu-me-vauci; mo cakava e na koula, e na ka karakarawa, ka damudamu, ka rusivakula, kei na malo matailalai ni wa muloci.
16Me takiveilevu e na yasana e va, ka lobi rua; e dua na caga na kena balavu, ka dua na caga na kena raraba.
17Ia mo vonota kina na vatu sa vono, me va na yatu vatu: ena yatu e na saritiusi, na topasa, kei na kapu-quli, nai matai ni yatu:
18ia nai karua ni yatu, na emeralita, na safairi, kei na taiamodi:
19ia nai katolu ni yatu, na laikure, na aketi, kei na amecisita:
20ia nai kava ni yatu, na perili, na onikisa, kei na jasipa: me koula ga na qara sa vono kina.
21Ia na vatu ena vaka na yacadratou na luve i Isireli, e tinikarua, me vaka na yacadratou, me vaka na ceuceu ni mama; ko iratou, yadua e na yacana, me vaka na yavusa e tinikarua.
22Ia mo cakava ki nai taube e so na sinucodo sa tobe me vaka na wa, e na koula dina.
23Mo cakava talega ki nai taube e rua na mama koula, ka vauca na mama e rua ki na tutuna e rua ni taube.
24Mo qai daramaka na ka koula e rua sa tobe, ki na mama e rua sa vauci ki na tutuna e rua ni taube.
25Ia na muana tani e rua ni ka e rua sa tobe mo bukia ki na qara e rua, ka vauca ki na mata ni wa bale ni sulu-me-vauci.
26Ia mo cakava e rua na mama koula, ka bukia ki na muana e rua ni taube, e na tutuna, a ya e na yasana kiloma ni sulu-me-vauci:
27ka rua tale na mama koula mo cakava, ka vauca ki na kenai wa bale e rua ni sulu-me-vauci e rukuna, vaka ki na matana, me donuya na tikina kadua sa vauci kina, me toka ecake, ka toka era nai vau talei ni sulu-me-vauci.
28Ia me ra vauca na mama ni taube ki na mama ni sulu-me-vauci e na wa karakarawa, me toka ecake, ka toka era nai vau talei ni sulu-me-vauci, a me kakua ni tasere mai nai sulu-me-vauci nai taube.
29Ia ko Eroni ena kauta na yacadra na luve i Isireli e nai taube ni veilewai me donuya na utona, ni sa laʼki curuma na tikina tabu, me ra nanumi tikoga kina e na mata i Jiova.
30Mo tokara talega na Urimi kei na Cumimi e loma ni taube ni veilewai; ia mo donuya na uto i Eroni, ni sa curu ki na mata i Jiova: ia me colata tikoga me donuya na utona ko Eroni, ena mata i Jiova, na ka era lewai kina na luve i Isireli.
31Ia mo cakava nai sulu e ruku ni sulu-me-vauci e na ka karakarawa walega.
32Ia me dua na kena qara ecake, e na levukana: me dua nai vau e na ka sa tali me volita na kena qara, me vaka na qara ni sulu ni valu, me kakua ni kadresu.
33Ia e na botona mo cakava e so nai ukuuku e vaka na vua ni kau, e na ka karakarawa, ka damudamu, ka rusivakula, me volita na botona; kei na lali koula e so, me volita e na kedra maliwa:
34e dua na lali koula, ka dua nai ukuuku e vaka na vua ni kau; e dua na lali koula, ka dua nai ukuuku e vaka na vua ni kau, me volita na boto ni sulu ko ya.
35Ia me vakaisulu kina ko Eroni me ia kina na cakacaka: ia ena rogoci na kena rorogo, ni sa curuma ko koya na tikina tabu ki na mata i Jiova, ni sa curu tani talega, me kakua ni mate ko koya.
36Mo cakava talega e dua na tiki ni koula dina me mamare, ka ceuta kina, SA TABU ME NEI JIOVA, me vaka na ceuceu ni mama.
37Ia mo rubeca e na wa karakarawa, me vau ki nai sala, io, me tu e na mata ni sala.
38Ia ena tu e na yadre i Eroni, me colata kina ko Eroni na ka e cala e na ka tabu, a ya era na vakatabuya na luve i Isireli e na nodrai solisoli tabu kecega; ia ena tutu ga e yadrena, me vinakati kina e na mata i Jiova ko ira.
39Ia mo vakaiukuukutaka na kote sa caka e na malo matailalai; ia mo cakava e dua nai sala e na malo matailalai; mo cakava talega e dua nai vau ni tolo e nai cula.
40Mo cakava talega na nedratou kote na luve i Eroni, ia mo cakava nai vau ni tolodra-tou, ka cakava na nodratoui sala, me vakaiukuuku ka matavinaka.
41Mo qai vakaisulutaki Eroni kina na tuakamu, kei iratou kaya na luvena; ka lumuti iratou, ka buli iratou, ka vakatabui iratou, me ratou bete vei au.
42Mo cakava talega vei iratou e na malo nai curucuru ni saga, me tabonaki kina na yagodratou, me kakua ni luvawale; me yala kina tolo ka yacova na saga.
43Ia ena vakaisulu kina ko Eloni kei iratou na luvena, ni ratou sa curuma na vale gatu ni veitata, se ratou sa tarova nai cabocabo-ni-soro me ia na cakacaka e na tikina tabu; de ratou sa cala, ka mate kina: me ka vakaroti tawa mudu vua, vei ira talega na nona kawa sa muri koya.
Who We AreWhat We EelieveWhat We Do
2025 by iamachristian.org,Inc All rights reserved.
