Na Lako Yani 25 - AI VOLA TABU（FIJ1864）

A vunau me cakavi na vale tabu, kei na kenai yaya.

1A SA vosa vei Mosese ko Jiova, ka kaya,

2Mo vosa vei ira na luve i Isireli, me ra kauta mai vei au nai solisoli: dou taura na noqui solisoli mai vua na tamata yadua sa vakauqeti koya na lomana me vinakata.

3Ia o qo nai solisoli mo dou taura maivei ira; a koula, kei na siliva, kei na parasa,

4kei na ka karakarawa, ka damudamu, ka rusivakula, kei na malo matailalai, kei na vutika ni koti,

5kei na kuli ni sipi-tagane sa somoti damudamu, kei na kuli tani, kei na kau sitimi,

6na waiwai ni cina, nai saluaki ni waiwai mei lumu, me kuria talega na kau boi vinaka me vakamai,

7na vatu onikisa, kei na vatu me vono kina nai sulu-me-vauci kei nai taube.

8Ia me ra cakava e dua na vale tabu me noqu, meʼu tiko kina e na kedra maliwa.

9Me vakatoka na ka kecega kaʼu sa vaka-tokila vei iko, me vaka nai vakatakarakara ni vale-tikotiko, kei nai vakatakarakara ni kenai yaya kecega, dou cakava vakakina.

10Me ra cakava talega e dua na kato e na kau sitimi: me lima na caga na kena balavu, ka tolu na caga na kena raraba, ka tolu na caga na kena cecere.

11Ia mo botona e na koula dina, mo botona eloma etaudaku talega, ia mo cakava e delana e dua nai sala koula me volita.

12Ia mo vakawai-calatoka na koula me mai va na kena mama, ka vakoto ki na kena tutuna e va; e rua na mama e na yasana e dua, ka rua na mama e na yasana kadua.

13Mo cakava talega e so nai vua e na kau sitimi, ka botana e na koula.

14Mo qai daramaka nai vua ki na mama e na yasana e rua ni kato, me colati kina na kato.

15Me tiko ga nai vua e na mama ni kato: me kakua ni kauti tani maikina.

16Ia mo virino ki loma ni kato na vunau kaʼu na solia vei iko.

17Mo cakava talega e dua nai cabocabo-ni-bulubulu e na koula dina: me lima na caga na kena balavu, ka tolu na caga na kena raraba.

18Mo cakava e rua na Jerupi koula, mo cakavi rau e nai tukituki, me tu e na kubu ruarua ni cabocabo-ni-bulubulu.

19Ia mo cakava e dua na Jerupi me tu e na kubu e dua, kei na jerupi kadua e na kubu kadua: mai nai cabocabo-ni-bulubulu dou cakava na jerupi ruarua, e na kena kubu e rua.

20Ia na jerupi, me rau va-kate taba ecake, me ubia nai cabocabo-ni-bulubulu e na tabadrau, ia me veiqa-ravi tu na matadrau; me qarava talega nai cabocabo-ni-bulubulu na matadrau na jerupi.

21Mo qai virikotora nai cabocabo-ni-bulubulu ecake e na dela ni kato; ia mo virino ki loma ni kato na vunau kaʼu na solia vei iko.

22Ia kaʼu na veitovaki kei iko maikeri, ka veivosaki kei iko mai na dela ni cabocabo-ni-bulubulu, mai na maliwa ni jerupi e rua sa tu e dela ni kato ni vunau, e na ka kecega kaʼu na vunautaka vei iko mo tukuna vei ira na luve i Isireli.

23Mo cakava talega e dua nai kana-kana e na kau sitimi: me va na caga na kena balavu, ka rua na caga na kena raraba, ka tolu na caga na kena cecere:

24ia mo botana e na koula dina, ka cakava kina e dua nai sala koula me volita.

25Mo cakava talega e dua na belena, me raba ni liga na rabana me volita, ia mo cakava ki na belena e dua nai sala koula me volita.

26Ia mo cakava e va na kena mama koula, ka vakoto na mama ki na tutuna e va sa tu e na yavana e va.

27Me ra donuya na belena na mama, mei daradara ni vua, me colati kina nai kanakana.

28Ia mo cakava nai vua e na kau sitimi, ka botona e na koula, me colati kina nai kanakana.

29Ia mo cakava na kena dari, kei na kenai taki, kei na kena bilo, kei na kena sedre, me livilivi kina; mo cakava e na koula dina.

30Ia mo tauca ki nai kanakana na madrai dauraici me tu e mataqu e na veisiga.

31Mo cakava talega e dua nai tutu-ni-cina e na koula dina: me cakavi e nai tukituki nai tutu-ni-cina; na tolona, kei na tabana, na kena bilo lalai, na kenai ukuuku momokitikiti, kei na kena se-ni-kau, ena caka vakakina:

32kei na tabana e ono me lako mai na yasana e rua; e tolu na toba ni tutu-ni-cina mai na yasana e dua, ka tolu na taba ni tutu-ni-cina mai na yasana kadua:

33e tolu na bilo me vaka na amodi, e dua nai ukuuku momokitikiti, ka dua na se-ni-kau, e na tabana e dua; ka tolu na bilo me vaka na amodi, e dua nai ukuuku momokitikiti, ka dua na se-ni-kau, e na tabana kadua: me vakakina e na tabana e ono sa lako mai nai tutu-ni-cina.

34Ia e nai tutu-ni-cina me va na bilo sa vaka na amodi, na nodratoui ukuuku momokitikiti, kei na nodratou se-ni-kau.

35Ia me dua nai ukuuku momokitikiti e ruku ni tabana e rua, ka dua nai ukuuku momokitikiti e ruku ni tabana e rua, ka dua nai ukuuku momokitikiti e ruku ni tabana e rua, me rauta na tabana e ono sa lako mai nai tutu-ni-cina.

36Me caka e na ka e dua na kedrai ukuuku momokitikiti kei na tabadra: o koya taucoko ena dua bauga na tiki ni koula dina sa tukilaki.

37Ia mo cakava na kena cina me vitu: ia me ra vakacaudrevi na kena cina, me vaka-raramatoka na kena yasana.

38Kei na kenai koti-ni-cina, kei na kena dari ni de-ni-cina, me koula dina.

39Me cakavi o qo e na toledi koula dina, kei nai yaya kecega o qo.

40Ia mo raica mo cakava me vaka na kedrai vakatakarakara ka vakatakilai vei iko mai na ulu-ni-vanua.