Na Lako Yani 24 - AI VOLA TABU（FIJ1864）

Sa kaya na Kalou me cabe tale vua ko Mosese, 1, 2. A sa qai laʼki tukuna, ka vola, ka wilika na vunau i Jiova vei ira na tamata, 3-8. E so sa cabeta na ulu-ni-vanua, ka raica na Kalou, 9-11. Sa toro vua na Kalou ko Mosese; ai ukuuku ni Kalou; 12-18.

1A SA kaya ko koya vei Mosese, Oi kemudrau kei Eroni, ko Natapi kei Epiu, dou cabeta cake mai vei Jiova, kei na lewe vitusagavulu vei ira na qase ni Isireli; ia dou tiko vakayawa, ka soro:

2ia ko Mosese duaduaga me toro vei Jiova; ia ko ira, me ra kakua ni toro; me ra kakua talega ni cabe kaya na tamata.

3A sa lako ko Mosese, ka tukuna vei ira na tamata na vosa kecega i Jiova, kei na lewa kecega: a ra sa vosa domovata na tamata kecega, ka ra kaya, A vosa kecega sa kaya ko Jiova keimami na cakava.

4A sa vola na vosa kecega i Jiova ko Mosese, a sa sou e na sabogibogi, ka cakava nai cabocabo-ni-soro e ruku ni ulu-ni-vanua, kei na duru e tinikarua, nai wili wili ni veiyavusa i Isireli era tinikarua.

5A sa tala e so na cauravou maivei ira na luve i Isireli, a ra sa cabora e so nai soro kama, ka vakamatea e so na karavau mei madrali e na veivinakati vei Jiova.

6A sa wase-ruataka na dra ko Mosese, ka livia ki na veibilo; a sa bureitaka e dua na wase ni dra e dela ni cabocabo-ni-soro.

7A sa taura nai vola ni veiyalayalati, ka wilika ni ra sa rogoca tiko na tamata: a ra sa kaya, A ka kecega sa kaya ko Jiova keimami na cakava, ka talairawarawa.

8A sa taura na dra ko Mosese, ka kureitaki ira na tamata, ka kaya, Raica, na dra ni veiyalayalati, sa kitaka vei kemuni e na vosa kecega o qo ko Jiova.

9Sa qai cabecabe ko Mosese kei Eroni, ko Natapi kei Epiu, ka vitusagavulu vei ira na qase ni Isireli;

10a ra sa raica na Kalou nei Isireli; ia sa vaka na ka sa caka e na safairi makare sara na ruku ni yavana, a sa vaka na lomalagi dina e na rarama.

11A sa sega ni virikotora ko koya na ligana vei ira na nodra turaga na luve i Isireli; a ra sa raica na Kalou, a sa kana ka gunu.

12A sa kaya vei Mosese ko Jiova, Mo cabe mai vei au ki na ulu-ni-vanua, ka tiko kina: ia kaʼu na solia vei iko na vatu raraba, kei na vunau, kei na ka kaʼu sa lesia, a ya kaʼu sa vola oti; mo vakatavulica vei ira.

13A sa tu cake ko Mosese, kei Josua na nonai talatala; a sa cabeta na ulu-ni-vanua ni Kalou ko Mosese.

14A sa kaya ko koya vei ira na qase, Dou waraki keirau mada eke, me keirau lako tale mada mai vei kemudou: ka, raica, sa tiko kei kemudou ko Eroni kei Uri: na tamata sa so na ka e veiletitaki, me lako mai vei rau.

15A sa cabeta na ulu-ni-vanua ko Mosese, a sa ubia na ulu-ni-vanua na o.

16A sa tiko na serau i Jiova e na dela ni ulu-ni-vanua ko Sinei, a sa ubia na o ka bogi ono: ia e na kenai kavitu ni siga sa kacivi Mosese ko koya mai na loma ni o.

17Ia na serau i Jiova, sa vaka na buka waqa sa daukatikati na kenai rairai e na dela ni ulu-ni-vanua, ni sa raica ko ira na luve i Isireli.

18A sa curu ko Mosese ki loma ni o, a sa cabeta na ulu-ni-vanua: a sa tiko mai na ulu-ni-vanua ko Mosese ka siga e vasagavulu ka bogi e vasagavulu.