Na Lako Yani 23 - AI VOLA TABU（FIJ1864）

A vunau e nai tukutuku lasu, 1-3. A ka dodonu e so, 4-13. A solevu e tolu, 14-19. Ena liutaki ira na Agilose, 20-24. Ena vukei ira na Kalou ka vakalougatataki ira e na vanua ko Kenani, 25-33.

1Mo kakua ni tukuna e dua nai rogorogo lasu: mo kakua ni vukei koya nai valavala ca, ni ko sa vakadinadina tawa dodonu.

2Mo kakua ni muri ira na lewe vuqa me caka ca; mo kakua talega ni vosa e na veileti me lako tani me muri ira na lewe vuqa, me kauta vakatani na lewa.

3Mo kakua talega ni goleva na dravudravua e na nona veileti.

4Kevaka ko sa veisotaraki kei na nona karavau se nona asa na nomu meca ni sa lako sese, mo kauta sara tale vua.

5Kevaka ko sa raica na nona asa sa cati iko, ni sa koto e ruku ni nonai colacola, mo kua so ni laiva vei koya: mo drau laiva vata kaya ga.

6Mo kakua ni kauta vakatani na lewa vua na nomu dravudravua, e na nona veileti.

7Mo yawa ki na ka lasu; kakua talega ni vakamatea na tawa cala, kei na yalododonu: niʼu na sega ni vakadonui koya nai valavala ca.

8Mo kakua talega ni taura nai solisoli: ni sa vakamataboko-taki ira era rai vinaka nai solisoli, ka kauta vakatani na nodra vosa na yalododonu.

9Mo kakua talega ni vakasaurarataka na vulagi: ni dou sa kila na yalo ni vulagi, ni dou a vulagi mai na vanua ko Ijipita.

10E ono na yabaki mo tea kina na nomu vanua, ka kumuna na vuana:

11ia e na kenai kavitu mo laiva me vakacegu, ka koto wale; me ra kana kina ko ira na kai nomu era sa dravudravua: ia na ka era vakavoca, me kania na manumanu ni vanua. Mo cakacaka vakakina ki na nomu veivaini, kei na nomu veiolive.

12E ono na siga mo kitaka kina na nomu cakacaka, ia e na kenai kavitu ni siga mo vakacegu: me vakacegu kina na nomu karavau kei na nomu asa, ka me kaukauwa kina na luvena na nomu vada, kei na vulagi.

13Ia e na ka kecega kaʼu sa kaya vei kemudou, dou qarauni kemudou: ia dou kakua ni cavuta na yacadra na kalou tani: me kakua ni rogo mai na gusumu.

14Mo iataka vakatolu na solevu vei au e na yabaki.

15Mo qarava na solevu ni ka sa tawa vakaleveni: (mo kania na ka sa tawa vakaleveni ka bogi vitu, me vaka kaʼu a vunau kina vei iko, e na gauna sa lokuci, e na vula ko Apipi; ni ko a lako mai kina mai Ijipita: ia me kakua e dua me rairai lala e mataqu:)

16kei na solevu ni magomago, nai sevu ni nomu cakacaka, ko a tea e na nomu veiwere: kei na solevu ni kumukumuni, ni sa cava na yabaki, ni ko sa kumuna vata oti na nomu cakacaka mai na veiwere.

17Me rairai vakatolu e na mata i Jiova na Turaga ko ira kecega na nomu yatagane e na yabaki.

18Mo kakua ni cabora vata kei na ka sa vakaleveni na dra ni noqui soro; ia me kakua ni vo me yacova na sabogibogi na uro ni noqu solevu.

19Ai sevu sa liu sara e na nomu vanua mo kauta ki na vale i Jiova na nomu Kalou.

Mo kakua ni vakasaqa na luve ni koti e na wai-ni-sucu i tinana.

20BAICA, kaʼu sa tala e dua na Agilose me liutaki iko, me maroroi iko e na sala, ka me vakayacori iko ki na yasana kaʼu sa cokonaka oti.

21Mo qarauni Iko e na vukuna, ka vakarorogo ki na domona; dou kakua ni vakacudrucudruya: ni na cudruvaka ko koya na nomudou caka cala: ni sa tiko vua na yacaqu.

22Ia kevaka ko sa vakarorogo sara ki na domona, ka kitaka na ka kecega kaʼu sa kaya; au na qai nodra meca na nomu meca, ka vakararawataki ira era sa vakararawataki iko.

23Ni na liutaki iko na noqu Agilose, ka kauti iko vei ira na luve i Amori, kei na luve i Eci, kei na lewe ni Veikoro lalai, kei na kai Kenani, na luve i Evi, kei na kai Jepusa: ia kaʼu na muduki ira tani.

24Mo kakua ni cuva ki na nodra kalou, se qaravi ira, se muria na nodrai valavala; ia mo vukici ira sara ga, ka basuka sara na nodra matakau.

25Ia dou qaravi Jiova ga na nomudou Kalou, ena qai vakalougatataka ko koya na kemu kakana kei na memu wai; ia kaʼu na kauta tani vei iko na mate.

26Ena sega e dua na ka me lutu dole, se yava, e na nomu vanua: au na vakayacora ga nai wiliwili ni nomu veisiga.

27Au na tala na kequ veivakarerei e matamu, ka vakataqayataka na tamata kecega ko na yaco kina; ia kaʼu na cakavi ira na nomu meca kecega me vukica na dakudra vei iko:

28ia kaʼu na tala e dua na ka rerevaki me liutaki iko, ia ena vakasevi ira tani e matamu na luve i Evi, kei na kai Kenani, kei na luve i Eci.

29Au na tawa vakaseva tani e matamu e na yabaki e dua; de lala na vanua, a sa vuqa mai vei iko na manumanu ni veikau:

30au na vakaseva tani vakamalua tiko e matamu, mo lewe vuqa mada mai, ka taukena na vanua.

31Ia kaʼu na yalayalana na nomu vanua ka vakatekivu mai na Wasa Damudamu ka yacova na nodra Wasawasa na kai Filisitia, ka vakatekivu tale mai na lekutu ka yacova na Uciwai: niʼu na solia ki na ligamudou na lewe ni vanua; ia ko na vakasevi ira tani e matamu.

32Mo kakua ni veiyalayalati kei ira, se ira na nodra kalou.

33Me ra kakua ni tiko e nomu vanua, de ra vaka-calai iko vei au: ia kevaka ko qaravi ira na nodra kalou, ko na tacori dina kina.