Na Lako Yani 22 - AI VOLA TABU（FIJ1864）

Sa cavuta tiko e so na vunau ko Jiova, e na vuku ni butako, 1-5, kei na kama, 6, kei na veiva-qaseni, 7-13, kei na sarava na ka, 14, 15, kei na veibutakoci kei na gonealewa, 16-17, kei na cakai sausau, 18, kei na koto kei na manumanu, 19, kei na soro ki na kalou lasu, 20, kei na vulagi, 21, kei na dawai kei na tawa-vakatamani, 22-24, kei nai valavala e so sa tawa dodonu, 25-28. Ai sevu, 29, 30. Me ra tamata tabu, 31.

1Kevaka sa butakoca na karavau se na sipi na tamata e dua, ka vakamatea, se volitaka; ena sauma ko koya na karavau e dua e na karavau e lima, se na sipi e dua e na sipi e va.

2(Kevaka sa kune na butako ni sa basuka tiko na vale, a sa yaviti mate, ena sega ni tarogi na nona dra:

3kevaka sa cadra vua na siga, ena tarogi na nona dra.) Me sauma vakavinaka ko koya; kevaka sa sega na nona ka, me qai volitaki ko koya mei sau ni ka sa butakoca.

4Kevaka sa kune bula e ligana na ka sa butakoca, se karavau, se asa, se sipi; me qai sauma vakarua.

5Kevaka e dua na tamata sa cakava me kani na were se veivaini, ni sa kauta kina na nona manumanu, a sa kania na nona were na tamata tani; ena buluta ga e na nona were vinaka sara, se nona veivaini vinaka sara.

6Kevaka sa waqa loa mai e dua na buka, a sa katia na veico, a sa visa kina nai binibini sila, se na sila sa tu, se na veiwere; o koya sa vakawaqaca na buka ena sauma vakavinaka.

7Kevaka e dua na tamata sa solia vua na kai nona nai lavo se nai yaya me maroroya, a sa butakoci mai na vale ni tamata ko ya; kevaka sa kune na butako, me qai sauma vakarua ko koya:

8kevaka sa tawa kune na butako, me qai kauti nai taukei ni vale ko ya vei ira na dauveilewai, me vosavavakini ni sa sega ni tara ko koya e dua na nona yau na kai nona.

9E nai valavala vakabutako kecega, se ki na karavau, se na asa, se na sipi, se nai sulu, se dua na ka sa yali, a ya sa kaya e dua sa nona, na ka sa veiletitaki vei rau ena kauti vei ira na dauveilewai; ko koya era sa vakacala na dauveilewai, ena sauma vakarua vua na kai nona.

10Kevaka sa dua na tamata sa solia vua na kai nona e dua na asa, se na karavau, se na sipi, se dua na manumanu, me vakaraica; a sa mate, se vuetaki, se vakasavi tani, ka sega na tamata sa raica;

11me qai e dua na vosa vavakini e matana ko Jiova vei rau, ni sa sega ni tara ko koya e dua na nona yau na kai nona; me qai donuya ga na kenai taukei, ia ena qai tawa sauma ko koya.

12Ia kevaka sa butakoci vua, me qai sauma ko koya vua na kenai taukei.

13Kevaka sa dresulaki, me qai kauta ga mai me kilai; ena tawa sauma ko koya na ka sa dresulaki.

14Ia kevaka sa dua na tamata sa salava na nona ka na kai nona, a sa vuetaki, se mate, ni sa sega ni tiko kaya na kenai taukei, ena qai sauma vakavinaka ko koya:

15kevaka sa tiko kaya na kenai taukei, ena qai tawa sauma ko koya: kevaka sa ka e vakai voli taki, sa lako e navuku ni kenai voli.

16Ia kevaka sa dua na tamata sa dau-veretaka e dua na gonealewa sa sega ni musuki, a sa rau koto kaya, me qai solia dina vua ko koya na yau me watina.

17Kevaka sa bese sara na tamana me soli koya vua, me qai solia nai lavo ko koya me vaka na yau sa dausoli vei ira na gonealewa.

18Mo kakua ni Vakabula e dua na alewa sa daucakai sausau.

19O koya sa koto vata kei na manumanu e yavai va ena vakamatei vakaidina.

20O koya sa vakacabora nai soro vua na kalou, ka sega vei Jiova duaduaga, ena vakarusai laivi.

21Ia mo kakua ni vakararawataka e dua na vulagi, se vakasaurarataka: ni kemuni a vulagi mai na vanua ko Ijipita.

22Dou kakua ni vakararawataka e dua na alewa dawai, se na tawa-vakatamani.

23Kevaka ko sa vakararawataka vakalailai, a sa tagi vakalailai ga vei au ko ira, kaʼu na rogoca vakaidina na nodra tagi;

24ia ena waqa mai na noqu cudru, kaʼu na qai vakamatei kemuni e nai seleiwau; ka na dawai na watimudou, ka tawa-vakatamani na luvemudou.

25Kevaka ko sa solia-sarava nai lavo vua e dua na noqu tamata sa dravudravua sa tiko kei iko, mo kakua ni vaka e dua sa via vakaivolitaka, e na nomu cakava vei koya: mo kakua ni taroga vua nai voli.

26Kevaka ko sa kauta na nonai sulu na kai nomu me kenai vakarawarawa, mo vakasuka vua ni sa laʼki dromu na siga:

27ni sa nonai tutuvi ga o qori, nai sulu ni kulina: a cava na ka me moce kina? ia ni sa tagi vei au ko koya, kaʼu na rogoca; niʼu sa yalololoma.

28Mo kakua ni vosavakacacataki ira na dauveilewai, se rukaki koya sa turaga vei ira na kai nomu.

29Mo kakua ni berabera ni cabora nai sevu ni nomu vuata, kei na nomu waini kei na waiwai: mo solia vei au na ulumatua ni luvemu tagane.

30Mo kitaka vakakina ki na nomu karavau, kei na nomu sipi: sa bogi vitu ena tiko kei tinana; e na kenai kawalu ni siga mo solia vei au.

31Ia kemuni na noqu tamata tabu: mo ni kakua talega ni kania na lewe ni manumanu sa dresulaki mai na veikau; dou biuta ga ki na koli.