Na Lako Yani 21 - AI VOLA TABU（FIJ1864）

Sa cavuta tiko na vunau e so ko Jiova, e na vukudra na tamata kei na nodra turaga, 1-11, kei na laba, 12-15, kei na butakoca na tamata, 16, kei na rukaka na qase, 17, kei na veivala, 18-27, kei na ka e so me saumi, 28-36.

1Ia o qo na vunau mo tauca vei ira:

2Kevaka ko sa volia e dua na Iperiu me bobula, me na bobula ko koya e na yabaki e ono ga: ia e na kenai kavitu me na lako wale yani me lalaga.

3Kevaka ka lako mai vakai koya ga, ena lako vakai koya yani: kevaka ka vakawati, ena lako yani kaya na watina.

4Kevaka sa solia vua na watina ko na nona turaga, a sa vakasucuma vua ko koya na luvena tagane se na luvena alewa; ena nena na nona turaga na watina kei na luvena, ia ena lako yani vakai koya ko koya.

5Ia kevaka sa kaya vakadodonu na tamata, Au sa lomana na noqu turaga, kei na watiqu, kei na luvequ; au sa sega ni via lako yani me lalaga:

6me qai kauti koya na nona turaga vei ira na dauveilewai; ka kauta talega ki na katuba, se na duru ni katuba; ena qai cula-basika na daligana na nona turaga e nai cula; ena qai qaravi koya ko koya ka tawa mudu.

7Ia kevaka sa volitaka na luvena alewa e dua na tamata me vada, ena sega ni lako yani ko koya me vakataki ira na tagane bobula.

8Kevaka sa sega ni vinakati koya na nona turaga, ni sa kainaka oti me watina, me qai laivi koya ko koya me voli tale: sa tabu vua me volitaka ki na dua tani, e na vuku ni sa vakaisini koya ko koya.

9Ia kevaka sa musuka vua na luvena, me na qai cakacaka vua me vaka na luvena alewa.

10Kevaka sa taura vua e dua tale; ena tawa vakalailaitaki kina na kena kakana, na nonai sulu, kei na nonai valavala vaka-veiwatini.

11Ia kevaka sa sega ni via cakava vua na ka e tolu o qo, me na qai lako wale yani ko koya, sa tawa voli e nai lavo.

12O koya sa yavita vakamatea e dua na tamata, ena vakamatei vakaidina ko koya:

13ia kevaka sa sega ni lawakitaka na tamata, a sa solia ki na ligana na Kalou; au na lesia vei iko na koro me dro kina ko koya:

14ia kevaka e dua na tamata sa nakita ka lutuka na kai nona, me vakamatea ni sa lawakitaka; mo na qai kauta tani mai na noqui cabocabo-ni-soro, me mate.

15Kei koya sa yavita na tamana, se tinana, ena vakamatei vakaidina.

16Kei koya sa butakoca e dua na tamata, ka volitaki koya, se sa kune e ligana, ena vakamatei vakaidina.

17Kei koya sa rukaka na tamana, se tinana, ena vakamatei vakaidina.

18Ia kevaka erau veivala e lewe rua na tamata, a sa dua sa yavita nai kadua e na vatu, se na ligana, a sa sega ni mate ko koya, a sa davo ga e nonai kotokoto:

19kevaka sa duri tale, ka vakaititoko voli etautuba, me na qai kakua ni cudruvi ko koya ka yavita: ia ena volia ga na siga sa davo kina, ka volia na ka me bula vinaka tale kina.

20Ia kevaka sa yavita na nona tamata, se nona vada, na tamata e dua, e na kau, a sa ciba ni sa yaviti tiko; ena saumi vakaidina:

21ia kevaka sa bula e dua na siga se rua, ena sega ni saumi; ni sa nonai lavo ko koya.

22Ia kevaka erau veivala e lewe rua na tamata, ka ca kina e dua na alewa sa bukete, a sa lutu dra kina, a sa sega ni ca tiko; ena cudruvi vakaidina ko koya, me vaka na ka sa lewa vua ko koya na watina na alewa; ia ena buluta e matadra na dauveilewai.

23Ia kevaka sa ca tiko, mo na qai sauma na mate e na mate,

24na mata e na mata, na bati e na bati, na liga e na liga, na yava e na yava,

25na ta vu e na ta vu, na vue e na vue, na lauti e na lauti.

26Ia kevaka sa yavita na mata ni nona tamata, se na mata ni nona vada, na tamata e dua, a sa boko kina; me na laivi koya me lako yani me lalaga, e na vuku ni matana.

27Ia kevaka sa tila yani na batina na nona tamata, se na batina na nona vada; me na laivi koya me lako yani me lalaga, e na vuku ni batina.

28Kevaka sa cula e dua na tagane se dua na alewa na karavau, a sa mate kina; ena lauviri mate vakaidina na karavau, ka tawa kani na lewena; ia ena tawa cudruvi ga na kenai taukei:

29ia kevaka sa dau-veicula eliu na karavau ko ya, a sa tukuni oti vua na kenai taukei, a sa sega ni qarauna ko koya, a sa vakamatea kina e dua na tagane se dua na alewa, ena lauviri mate na karavau, ena vakamatei talega na kenai taukei.

30Kevaka sa lewai vua e so nai lavo me kenai sau, me qai solia ko koya na ka sa lewai vua me kenai sau me bula kina.

31Se cula na goneatagane, se cula na gonealewa, ena kitaki vua me vaka na lewa o qo.

32Kevaka sa cula na tamata se na vada na karavau; ena solia ko koya vua na nona turaga e tolusagavulu na sikeli siliva, me qai lauviri mate na karavau.

33Ia kevaka sa carata nai keli-wai na tamata e dua, se dua na tamata sa kelia nai keli-wai, ka sega ni ubia, a sa sikalutu kina e dua na karavau, se dua na asa;

34ena sauma ga nai taukei ni keli-wai, ena solia nai lavo ki na nonai taukei; ena qai nona na ka sa mate.

35Ia kevaka sa vakacacana na nona karavau na tamata e dua na nona karavau na tani, a sa mate kina; erau na qai volitaka na karavau sa bula, ka wasea rua na kenai voli; me rau wase rua talega na ka sa mate.

36Ia kevaka sa kilai ni sa dauvei-cula eliu na karavau, a sa sega ni qarauna na kenai taukei; ena sauma vakaidina na karavau e na karavau; ia ena nona ga na ka sa mate.