Na Lako Yani 20 - AI VOLA TABU（FIJ1864）

Sa cavuta ko Jiova na vunau e tini, 1-17. Era rere vakalevu na tamata, 18, 19; a sa vakacegui ira ko Mosese, 20. Sa vakaroti Mosese tiko ko Jiova, 21-25.

1A SA tukuna na vosa kecega o qo ko Jiova, ka kaya,

2Oi au, sa ko Jiova na nomu Kalou, o koya sa kauti iko mai na vanua ko Ijipita, mai na vale ni veivakabobulataki.

3Me kakua vei iko na Kalou tani, oi au duaduaga.

4Mo kakua ni cakava vei iko e dua na matakau ceuceu; se dua nai vakatakara-kara ni ka mai lomalagi ecake, se mai vuravura era, se mai na wai e ruku i vuravura:

5mo kakua ni cuva vei ira, se qaravi ira: niʼu sa Kalou vu vu, koi au ko Jiova na nomu Kalou, au sa cudru vaka na nodra caka ca na qase vei ira na luvedra, ka yacova nai katolu ni tabatamata kei na kenai kava, vei ira sa cati au;

6ia kaʼu sa vakatakila na loloma vei ira nai tabatamata e udolu, vei ira sa lomani au, ka kitaka na noqu vunau.

7Mo kakua ni cavuta walega na yaca i Jiova na nomu Kalou; ni na sega ni vakadonui koya ko Jiova sa cavuta wale na yacana.

8Mo nanuma na siga ni vakacecegu, me vakatabuya.

9E ono na siga mo dauca-kacaka kina, ka kitaka kina na nomu cakacaka kecega;

10ia nai kavitu ni siga sa siga ni vakacecegu i Jiova na nomu Kalou; o kakua ni kitaka kina e dua na cakacaka, o iko, se na luvemu tagane se na luvemu alewa, na nomu tamata se nomu vada, se nomu manumanu, se nomu vulagi sa tiko e na nomu lomanibai:

11ni ka cakavi lomalagi kei vuravura kei na waitui, kei na ka kece sa tu maikina, ko Jiova e na siga e ono, a sa vakacegu yani e nai kavitu ni siga: o koya sa vakalougatataka kina ko Jiova na siga ni vakacecegu, ka vakatabuya.

12Mo vakarokoroko vei rau na tamamu kei na tinamu; me balabalavu kina na nomu bula e na vanua sa solia vei iko ko Jiova na nomu Kalou.

13Mo kakua ni laba.

14Mo kakua ni ia na veibutakoci.

15Mo kakua ni butako.

16Mo kakua ni beitaka vakailasu na kai nomu.

17Mo kakua ni kocova na nona vale na kai nomu; o kakua ni kocova na watina na kai nomu, se nona tamata, se nona vada, se nona karavau, se nona asa, se dua na ka sa nona na kai nomu.

18A RA sa kunea na tamata kece na kurukuru, kei na livaliva, kei na domo ni davui, kei na ulu-ni-vanua ni sa kubou tiko: ia ni ra sa kunea na tamata, era toro yani, ka tu vakayawa.

19A ra sa kaya vei Mosese, Mo vosa ga vei keimami ko iko, ia keimami na vakarorogo: ia me kakua ni vosa vei keimami na Kalou, de keimami mate.

20A sa kaya vei ira na tamata ko Mosese, Mo ni kakua ni rere: ni sa yaco mai na Kalou me vakatovolei kemuni, me tu kina na kena rere e matamuni, mo ni kakua ni valavala ca.

21A sa tu vakayawa ko ira na tamata, a sa torova ko Mosese na butobuto loaloa sa tiko kina na Kalou.

22A sa kaya vei Mosese ko Jiova, Mo vosa vakaoqo vei ira na luve i Isireli, Kemuni sa raica niʼu a vosa vei kemuni mai lomalagi:

23mo ni kakua ni cakava na kalou siliva me kuri au, mo ni kakua talega ni cakava vei kemuni na kalou koula:

24mo cakava vei au nai cabocabo-ni-soro qele, ka cabora kina na nomui soro kama, kei na nomui madrali e na veivinakati, na nomu sipi, kei na nomu karavau i e na yasana kecega kaʼu sa lesia me cavu kina na yacaqu, kaʼu na lako kina vei iko, ka vakalougatataki iko:

25ia kevaka ko sa via cakava vei au e dua nai cabocabo-ni-soro vatu, mo kakua ni cakava e na vatu sa ta: kevaka ko sa laveta kina na nomu matau, ko sa vakacacana:

26mo kakua talega ni cabeta na noqui cabocabo-ni-soro e nai cabecabe, me kakua kina ni raici na nomu luvawale.