Na Lako Yani 18 - AI VOLA TABU（FIJ1864）

Sa kauta mai na wati i Mosese kei na luvena ko Jiciro, 1-12. Ai vakavuvuli i Jiciro vei Mosese, 13-27.

1IA sa rogoca ko Jiciro na bete ni Mitiani, na vugo i Mosese, na ka kecega sa cakava na Kalou vei Mosese, kei na Isireli na nona tamata, ni sa kauta na Isireli mai Ijipita ko Jiova;

2sa qai kauti Sipora, na wati i Mosese, ko Jiciro na vugo i Mosese, ni ka talai yani oti,

3kei rau na luvena tagane; a yacana e dua ko Kerisomi; ni sa kaya ko koya, Au a tiko vulagi e na vanua e sega ni noqu;

4ia na yacana nai kadua ko Elieseri; ni, Sa vukei au na Kalou ni tamaqu, a sa vakabulai au mai nai seleiwau i Fero:

5ia eratou sa lako mai vei Mosese ko Jiciro na vugo i Mosese, kei rau na luvena, kei na watina, ki na lekutu, sa tiko kina ko koya mai na ulu-ni-vanua ni Kalou:

6a sa kaya ko koya vei Mosese, Oi au ko Jiciro na vugomu, keitou sa lako mai vei iko, kei na watimu, kei iratou kaya na luvena.

7A sa lako yani ko Mosese me tavaki vugona, a sa cuva, ka reguca; a rau sa vei tarogi e na nodrau tiko vinaka; a ratou sa curu ki vale.

8A sa tukuna vua na vugona ko Mosese na ka kecega ka cakava ko Jiova vei Fero kei ira na kai Ijipita e na vukudra na Isireli, kei na ka veivakaocai kecega ka yacovi ira e na gau-ni-sala, sa vakabulai ira maikina ko Jiova.

9A sa reki ko Jiciro e na vuku ni ka vinaka kecega sa cakava ko Jiova vei ira na Isireli, ni sa vakabulai ira ko koya mai na ligadra na kai Ijipita.

10A sa kaya ko Jiciro, Me vakavinavinakataki ko Jiova, ko koya sa vakabulai kemuni mai na ligadra na kai Ijipita, kei na liga i Fero; o koya sa vakabulai ira na tamata mai na ruku ni ligadra na kai Ijipita:

11au sa qai kila ni sa levu cake ko Jiova e na kalou kecega: ni sa qati ira ko koya e na ka era viaviaturaga kina.

12A sa kauta nai soro kama, kei nai madrali e so, vua na Kalou ko Jiciro na vugo i Mosese: a sa lako mai ko Eroni, kei ira kecega na qase ni Isireli, me ra kana vata kei na vugo i Mosese e na mata ni Kalou.

13Ia e na sabogibogi sa tiko ko Mosese me lewai ira na tamata: a ra sa tu e na mata i Mosese na tamata mai na mataka ka yacova na yakavi.

14Ia ni sa raica na vugo i Mosese na ka kecega sa cakava ko koya vei ira na tamata, sa kaya ko koya, A cava beka o qo ko sa cakava vei ira na tamata? e vakaevei ni ko sa tiko duadua, a ra sa tu e matamu na tamata kecega mai na mataka ka yacova na yakavi?

15A sa kaya vua na vugona ko Mosese, E na vuku ni ra sa lako mai vei au na tamata meʼu taroga na Kalou:

16ni sa dua na veileti vei ira, era sa qai lako mai vei au; kaʼu sa qai lewa vei ira, ia kaʼu sa vakatakila nai lesilesi ni Kalou, kei na nona vunau.

17A sa kaya na vugo i Mosese vei koya, Sa sega ni vinaka na ka ko sa cakava:

18o na malumalumu dina mai, ia ko iko kei ira na tamata o qo era sa tiko kei iko: ni sa bibi vei iko na ka o qo; o sa sega ni cakava rawa sai iko ga:

19mo vakarorogo mada ki na domoqu, kaʼu na vakavulici iko, ia ena tiko ga kei iko na Kalou: O iko mo tiko e na kedra maliwa na tamata kei na Kalou, mo kauti ira kina na veileti vua na Kalou:

20ia mo vakavulici ira e nai lesilesi kei na vunau, ka vakatakila vei ira na sala me ra lako kina, kei na cakacaka me ra cakava:

21ia mo raica mai e so na tamata gumatua maivei ira na tamata kecega, na tamata sa rerevaka na Kalou, na tamata vosa dina, sa cata na kocokoco: ka lesia vei ira na tamata, me tauyaudolu era lewa, me tauyadrau era lewa, me tauyali-masagavulu era lewa, ka me tauyatini era lewa:

22ia me ra lewai ira na tamata e na veisiga kecega: ia na ka lelevu kecega me ra kauta mai vei iko, ia na ka lalai kecega me lewa ga ko ira: ena qai rawarawa vei iko, ka ra na veivuke kei iko e nai colacola.

23Kevaka ko na cakava na ka o qo, ka sa vakaroti iko vakakina na Kalou, ko na qai tu rawa, ka ra na lako vakacegu na tamata kecega o qo ki na nodra veiyasana.

24A sa vakarorogo ko Mosese ki na domo i vugona, a sa kitaka na ka kecega sa kaya ko koya.

25A sa digitaka ko Mosese e so na tamata gumatua maivei ira kecega na Isireli, a sa lesi ira me ra liu vei ira na tamata, me tauyaudolu era lewa, me tauyadrau era lewa, me tauyalimasagavulu era lewa, ka me tauyatini era lewa.

26A ra sa lewai ira na tamata e na veisiga kecega: a ka dredre era sa kauta vei Mosese, ia na ka lalai kecega era sa lewa ko ira.

27A sa laiva na vugona ko Mosese me lako yani; a sa lako yani ko koya ki na nona vanua.