Na Lako Yani 17 - AI VOLA TABU（FIJ1864）

Era didi na tamata mai Rifitimi ni sa sega na wai, 1-3. Sa lako mai na wai mai na vatu, 4-7. Era veivala kei na Amaleki, ka ra gumatua ni sa lave tu na liga i Mosese: era qai cakava na kenai vakananumi, 8-16.

1A RA sa toki tani mai na lekutu ko Sini nai vavakoso taucoko ni luve i Isireli, e na nodrai lakolako, me vaka na vosa i Jiova, ka laʼki tiko mai Rifitimi: a sa sega na wai me ra gunuva na tamata.

2A ra sa veileti kina na tamata kei Mosese, ka kaya, Dou solia mai vei keimami na wai me keimami gunuva. A sa kaya vei ira ko Mosese, A cava dou sa veileti kina kei au? a cava dou sa vakatovolei Jiova kina?

3A ra sa viagunu wai maikea na tamata; a ra sa didivaki Mosese na tamata, ka kaya, A cava na ka o qo ni ko sa kauti keimami cake mai Ijipita, me vakamatei keimami, kei na neimami gone, kei na neimami manumanu e yavai va, e na viagunu?

4A sa tagi vei Jiova ko Mosese, ka kaya, A cava meʼu kitaka vei ira na tamata o qo? sa vo e lailai me ra viriki au e na vatu.

5A sa kaya vei Mosese ko Jiova, Mo lako yani e na matadra na tamata, ka kauta vata kei iko e so vei ira na qase ni Isireli; kei na nomui titoko, ko a yavita kina na uciwai, mo kauta ga e ligamu, ka lako:

6raica, kaʼu na laʼki tu e matamu maikeri e na dela ni Uluvatu, mai Orepi; ia ko na yavita na vatu, ka na lako maikina na wai, me ra gunu na tamata. A sa cakacaka vakakina ko Mosese e na matadra na qase ni Isireli.

7A sa vakatoka ko koya na yaca ni yasana ko ya ko Masa, kei Miripa, e na vuku ni nodra veileti na luve i Isireli, e na vuku talega ni ra sa vakatovolei Jiova, ni ra kaya, Sa tiko kei keda ko Jiova, se segai?

8Sa qai lako mai na luve i Amaleki, ka veivala kei Isireli mai Rifitimi.

9A sa kaya vei Josua ko Mosese, Mo digitaka vei keda e so na tamata, ka lako yani me veivala kei na Amaleki: e na sabogibogi kaʼu na laʼki tu e na dela ni vanua-cecere, kei nai titoko ni Kalou e ligaqu.

10A sa cakava ko Josua me vaka ka kaya vua ko Mosese, ka vala kei na Amaleki: a ratou sa cabe ki dela ni vanua cecere ko Mosese, ko Eroni, kei Uri.

11A sa yaco, ni sa laveta tiko na ligana ko Mosese, sa qai gumatua na Isireli: ia ni sa lutuka sobu ko koya na ligana, sa qai gumatua na Amaleki.

12A sa bibi mai na liga i Mosese; a rau sa kauta e dua na vatu, ka tokara e Tukuna, a sa tiko kina ko koya: ia ko Eroni kei Uri, erau sa tokona na ligana, e dua vaka, ka dua vaka; a sa tawa yavala kina na ligana ka me dromu mada na siga.

13Ia ko Josua, sa vakamalumalumutaka na Amaleki, io na nona tamata, e na bati ni seleiwau.

14A sa kaya vei Mosese ko Jiova, Mo vola o qo e nai vola me nanumi, ka tukuna e na daliga i Josua: niʼu na vakawabokotaka laivi na Amaleki mai na ruku i lomalagi, me kakua ni nanumi.

15A sa cakava e dua nai cabocabo-ni-soro ko Mosese, ka vakayacana ko Jiova-nisi:

16a sa kaya, E na vuku ni sa vala na liga kei nai tikotiko-vakaturaga i Ja, ena vala ko Jiova kei na Amaleki e nai tabatamata kecega.