1A ra sa lako tani mai Elimi, a sa lako nai vavakoso taucoko ni luve i Isireli ki na lekutu mai Sini, a ya e na maliwa kei Elimi kei Sinei, ni ra sa lako tani oti mai na vanua ko Ijipita, ka sa oti na vula e dua kei na siga e tinikava.
2A ra sa didivaki Mosese kei Eroni nai vavakoso taucoko ni luve i Isireli, e na lekutu:
3a sa kaya vei rau ko ira na luve i Isireli, E vinaka kevaka keimami a mate e na liga i Jiova mai na vanua ko Ijipita, ni keimami a tiko kei na kuro lewe ni manumanu, ni keimami a kana magiti ka mamau kina! ia drau sa kauti keimami mai ki na lekutu o qo, me vakamatea nai vavakoso taucoko o qo e na viakana.
4A sa kaya vei Mosese ko Jiova, Raica, kaʼu na vakatauca vei kemudou na kakana mai lomalagi; a ra na curu yani na tamata, ka kumuna vata nai votavota ni veisiga e na veisiga, meʼu vakatovolei ira kina, se ra na muria na noqu vunau, se sega:
5ia e na kenai kaono ni siga me ra cokonaka ga na ka era sa kauta ki vale; ia ena vakarua na ka era kumuna vata e na veisiga.
6A rau sa kaya ko Mosese kei Eroni vei ira kecega na luve i Isireli, Ni sa yakavi mai, o ni na qai kila ni sa kauti kemudou ko Jiova mai na vanua ko Ijipita:
7ia e na sabogibogi, o ni na qai raica na serau i Jiova; ni sa rogoca ko koya ni dou sa didivaki Jiova: ia ko cei ko keirau, mo dou didivaki keirau?
8A sa kaya ko Mosese, Dou na kila o qo, ni sa solia ko Jiova na kemuni lewe ni manumanu e na yakavi, kei na kemuni kakana e na sabogibogi mo dou mamau kina: ni sa rogoca ko Jiova na nomuni didi kemuni sa didivaki koya kina: ia ko cei ko keirau? a nomuni didi sa sega ni baleti keirau, sa baleti Jiova ga.
9A sa vosa vei Eroni ko Mosese, Mo kaya ki nai vavakoso taucoko ni luve i Isireli, Dou lako mai ki na mata i Jiova; ni sa rogoca ko koya na nomudou didi.
10A sa yaco ni sa vosa tiko ko Eroni ki nai vavakoso taucoko ni luve i Isireli, era sa rai vuki kivaka ki na lekutu, ka, raica, sa rairai mai na serau i Jiova e na o.
11A sa vosa vei Mosese ko Jiova, ka kaya,
12Au sa rogoca na nodra didi na luve i Isireli: mo vosa vei ira, ka kaya, E na yakavi kemuni na kania na lewe ni manumanu, ia e na sabogibogi kemuni na mamau e na kakana; ia kemuni na kila ni sa ko Jiova na nomuni Kalou koi au.
13A sa yaco e na yakavi, sa lako cake mai na toa ni veikau, ka ubia nai tikotiko: ia e na sabogibogi sa koto volita nai tikotiko na tegu.
14Ia ni sa lako cake na tegu ka koto, raica, sa koto e na dela ni lekutu e dua na ka lailai sa momokitikiti, sa matailalai e vaka na tegu cevata e na dela ni vanua.
15Ia ni ra sa raica na luve i Isireli, era sa veikayaki vakai ira, A cava o qo? ni ra sa sega ni kila se cava beka.
A sa kaya vei ira ko Mosese, O qo na kakana sa solia vei kemuni ko Jiova mo ni kania:
16o qo na ka sa vunautaka ko Jiova, Mo ni kumuna vata na tamata yadua na ka sa ganiti koya; me tauyadua na omeri, me rauta nai wili wili ni tamata: mo ni kauta na tamata yadua na kedra sa tiko e nona vale.
17A ra sa kitaka vakakina na luve i Isireli, ka kumuna vata, ko koya sa vakalevu, kei koya sa vakalailai.
18Ia ni ra sa vakarauna e na omeri, o koya sa vakalevu sa sega na ka e vo vua, kei koya sa vakalailai sa sega na ka e yali vua: era sa kumuna na tamata yadua na ka sa ganiti koya.
19A sa kaya ko Mosese vei ira, Me kakua na tamata me maroroya e so ki na sabogibogi.
20A ra sa sega ga ni vakarorogo vei Mosese; ni sa so vei ira sa maroroya e so ki na sabogibogi, a sa ulouloa mai, ka boi ca: a sa cudruvi ira ko Mosese.
21A ra sa daukumuna e na sabogibogi kecega, na tamata yadua na ka sa ganiti koya: ia ni sa katakata mai na mata-ni-siga, sa waicala.
22Ia e na kenai kaono ni siga era sa qai kumuna na kakana me vakarua na kena levu, sa tauyarua na omeri: a ra sa lako mai na turaga kecega ni vavakoso, ka tukuna vei Mosese.
23A sa kaya vei ira ko koya, O qo na ka sa kaya ko Jiova, Na sabogibogi sa siga ni vakacecegu, na vakacecegu tabu vei Jiova: na ka dou sa vavia dou vavia, kei na ka dou sa vakasaqa dou vakasaqa; ia na ka sa vo dou karona vei kemudou, me karoni ki na sabogibogi.
24A ra sa karona ki na sabogibogi, me vaka ka vakarota ko Mosese: a sa sega ni boi ca, a sa sega kina na ulo.
25A sa kaya ko Mosese, Dou kania o qori edaidai; ni sa siga ni vakacecegu vei Jiova na siga edaidai: dou na tawa kunea edaidai e na vanua:
26e ono na siga dou kumuna; ia e na kenai kavitu ni siga, ko ya na siga ni vakacecegu, ena sega kina.
27Ia ka so vei ira na tamata era a lako yani e nai kavitu ni siga me kumuna, a ra sega ni kunea.
28A sa kaya vei Mosese ko Jiova, Sa bogi vica tale mo dou bese tiko ni vakabauta na noqui vakaro kei na noqu vunau?
29raica, e na vuku ni sa solia vei kemudou na siga ni vakacecegu ko Jiova, sa solia kina vei kemudou e na kenai kaono ni siga na kakana me rauta e rua na siga; mo dou dui tiko na tamata yadua e na nona tikina; me kakua e dua na tamata me lako tani mai na nona tikina e na kenai kavitu ni siga.
30A ra sa qai vakacegu na tamata e na kenai kavitu ni siga.
31A ra sa vakayacana na ka na mataqali i Isireli na Mana: a sa vaka na sore ni koriada, sa vulavula; ia ni sa tovolei sa vaka na madrai sa caka vata kei na oni.
32A sa kaya ko Mosese, O qo na ka sa rotaka ko Jiova, Dou vakasinaita kina e dua na omeri, me maroroi me yacova na nomudoui tabatamata maimuri; me ra raica na kakana kaʼu sa vakani kemudou kina e na lekutu, niʼu a kauti kemudou tani mai na vanua ko Ijipita.
33A sa kaya vei Eroni ko Mosese, Mo kauta e dua na bilo, ka sova kina e dua na omeri ni mana, ka viritu e na mata i Jiova, me maroroi me yacova na nomudoui tabatamata maimuri.
34A sa viritu ko Eroni e na mata ni kato ni vunau me maroroi tu, me vaka ka vakarota vei Mosese ko Jiova.
35Ia ko ira na luve i Isireli, era kana mana ka vasagavulu na yabaki, me yacova na gauna era yaco kina ki na vanua tawa: era sa kana mana tiko ka ra yacova mada na yalayala ni vanua ko Kenani.
36Ia sa kenai katini ni efa na omeri.
Who We AreWhat We EelieveWhat We Do
2025 by iamachristian.org,Inc All rights reserved.
