1Ia ko Mosese kei ira na luve i Isireli, era sa qai meketaka vei Jiova na meke o qo, a ra sa vosa, ka kaya,
Au na meke vei Jiova, ni sa ka talei na nona gumatua: na ose kei koya sa vodoka sa biuta ko koya ki na wasawasa.
2Sa noqu kaukauwa kei na noqu meke ko Ja, a sa noqu vu-ni-bula ko koya: sa noqu Kalou ko koya, kaʼu na vakavinavinaka vua; na Kalou i tamaqu, kaʼu na vakalevulevui koya.
3A qaqa e nai valu ko Jiova: o Jiova na yacana.
4A vale-vodoki i Fero kei na nonai valu sa biuta ko koya ki na wasawasa: era sa dromu e na Wasa Damudamu na nona turaga vinaka.
5Sa luvuci ira na wai titobu: era sa lutu ki botona e vaka na vatu.
6I Jiova, na ligamu i matau sa rogovaki e na kaukauwa: i Jiova, na ligamu i matau sa musumusuka na meca.
7Ia e na kena levu ni nomu kaukauwa ko sa vukici ira era tu cake me nomu meca: o a vakatala na nomu cudru waqawaqa, a sa vakamai ira me vaka na vu-ni-sila.
8A sa binia na wai e na cegu ni ucumu, sa tu vakadodonu na wai levu me vaka nai bukebuke levu, sa cevata na wai titobu e na loma ni wasawasa.
9Sa kaya na meca, Au na vakasava, au na vauca, au na vota nai toki ni valu; ena mamau vei ira na noqu dodomo; kaʼu na ucuna na noqui seleiwau, ena vakarusai ira na ligaqu.
10O ni a liwa e na nomu cagi, sa luvuci ira na Wasawasa: era sa dromu e na wai kaukauwa e vaka na uma.
11I Jiova, ko cei sa tautauvata kei iko, vei ira na kalou? o cei sa tautauvata kei iko, ko sa vakaiuku-uku e na savasava, sa dokai ni sa vakavinavinakataki, sa caka mana tiko?
12O a dodoka na ligamu i matau, sa tilomi ira ko vuravura.
13E na nomu loloma ko sa tuberi ira yani na tamata ko a volia: e na nomu kaukauwa ko sa kauti ira ki na nomui tikotiko tabu.
14Era na rogoca na veimatanitu, era na taqaya: ena tauvi ira na kai Filisitia na rarawa.
15Era na qai domo bula na turaga ni Itomi; ena tauvi ira na qaqa ni Moapi na sautaninini; era na waicala laivi na kai Kenani kecega.
16Ena tauvi ira na rere kei na domo bula; e na kena levu na ligamu era na tiko lo me vaka na vatu, ka me ra lako madani na nomu tamata, i Jiova, me ra lako madani na tamata ko a volia.
17O na vakayacori ira kina, ka tei ira e na ulu-ni-vanua ko sai taukena, e na yasana ko sa cakava mo tiko kina, i Jiova, e na yasana tabu sa vakarautaka na ligamu, Turaga.
18O Jiova, ena tawa mudu na nona lewa.
19Ni ra sa lako ki loma ni wasawasa na ose i Fero kei na nona vale-vodoki, kei ira sa vodoka na nona ose, a sa vakasuka tale ko Jiova na wai ni wasawasa me luvuci ira; ia ko ira na luve i Isireli, era sa lako e na mamaca e na loma ni wasawasa.
20Ia ko Miriami, na parofita alewa, na gane i Eroni, sa kauta e ligana na lali; a ra sa muri koya lako ko ira na alewa kecega, ka taura na lali ka meke lako.
21A sa saumi ira na tagane ko Miriami, Dou meke vei Jiova, ni sa ka talei na nona gumatua; na ose kei koya sa vodoka sa biuta ko koya ki na wasawasa.
22A sa kauta na Isireli mai na Wasa Damudamu ko Mosese, ka ra sa lako ki na lekutu mai Suri; a ra sa lako ka bogi tolu e na lekutu, ka sega ni kunea na wai.
23A ra sa yaco ki Mara, a ra sa sega ni gunuva rawa na wai mai Mara, ni sa gaga: o koya sa vakayacani kina ko Mara.
24A ra sa vosakudrukudrutaki Mosese na tamata, ka kaya, A cava me keimami gunuva?
25A sa tagi vei Jiova ko koya; a sa vakatakila vua ko Jiova e dua na kau, a sa biuta ko koya ki na wai, a sa kamikamica mai na wai: sa lesia maikea ko koya e so na vunau kei nai vakaro me ra daucakava, a sa vakatovolei ira maikea,
26ka kaya, Kevaka ko na vakarorogo vakavinaka ki na domo i Jiova na nomu Kalou, ka cakava na ka sa dodonu e matana, ka vakatu daligamu ki na nona vunau, ka vakabauta na ka kecega sa lesia ko koya, kaʼu na qai sega ni vakayacora vei iko e dua na mate kaʼu a vakayacora vei ira na kai Ijipita; ni sa ko Jiova koi au, kaʼu sa vakabulai iko tiko.
27A ra sa yaco ki Elimi, sa tu kina e tinikarua na mata-ni-wai, ka vitusagavulu na balabala; a ra sa tiko maikea, voleka ki na wai.
Who We AreWhat We EelieveWhat We Do
2025 by iamachristian.org,Inc All rights reserved.
