1A sa vosa vei Mosese ko Jiova, ka kaya,
2Mo vosa vei ira na luve i Isireli, me ra lesu ka laʼki tiko e na mata i Pi-eiroci, e na maliwa kei Mikitoli kei na waitui, me sa donui Peali-sifoni: dou tiko e matana e na matasawa:
3ni na kaya ko Fero e na vukudra na luve i Isireli, Era sa tacori e na vanua, sa sogolati ira na lekutu.
4Ia kaʼu na vakaukauwataka na loma i Fero, ena vakasavi ira kina ko koya; ia kaʼu na vakarokorokotaki e na vuku i Fero, kei na nonai valu kecega; me ra kila kina na kai Ijipita ni sa ko Jiova koi au. A ra sa kitaka vakakina.
5A sa tukuni vua na tui Ijipita ni ra sa dro na tamata: a sa saumaki na lomadra ko Fero kei na nona tamata me veimecaki kei ira na tamata, a ra sa kaya, A vuku ni cava beka eda sa kitaka kina na ka o qo, ni da sa laiva na Isireli me ra lako tani me kakua ni qaravi keda tiko?
6A sa cokonaka na nona vale-vodoki ko koya, ka kauta kaya na nona tamata;
7a sa kauta e ono na drau na vale-vodoki sa digitaki, kei na vale-vodoki kecega ni Ijipita, kei na turaga vei ira yadua.
8A sa vakaukauwataka na loma i Fero na tui Ijipita ko Jiova, a sa vakasavi ira kina na luve i Isireli: a ra sa lako yani na luve i Isireli e na liga cecere.
9A sa vakasavi ira ko ira na kai Ijipita, na ose kei na vale-vodoki kecega i Fero, kei ira sa vodoka na nona ose, kei na nonai valu, a sa vauci ira ni ra sa tiko voleka ki na waitui, e voleka ki Pi-eiroci, sa donui Peali-sifoni.
10A sa laʼki voleka ko Fero, a ra sa ta cake na matadra na luve i Isireli, ka, raica, sa muri ira na kai Ijipita; a ra sa rere vakalevu: a ra sa tagi vei Jiova na luve i Isireli.
11A ra sa kaya vei Mosese, E na vuku beka ni sa sega nai bulubulu mai Ijipita, ko sa kauti keimami tani mai me mate e na lekutu? a cava ko sa cakava kina na ka o qo vei keimami, me kauti keimami tani mai Ijipita?
12sa sega beka o qo na vosa keimami a kaya vei iko mai Ijipita, ka vaka, Mo laivi keimami, me keimami qaravi ira na kai Ijipita? ni sa vinaka me keimami qaravi ira tiko na kai Ijipita, ka ca me keimami mate e na lekutu.
13A sa kaya vei ira na tamata ko Mosese, Mo ni kakua ni rere, mo ni tu vakadua, ka raica na veivakabulai i Jiova ena cakava vei kemuni edaidai: ni dou na sega ni raici ira tale maimuri na kai Ijipita, me vaka dou sa raica edaidai:
14ena vala e na vukumudou ko Jiova, ia dou na tiko lo.
15A sa kaya vei Mosese ko Jiova, A cava ko sa tagi kina vei au? mo vosa vei ira na luve i Isireli, me ra lako kiliu:
16ia ko iko, mo laveta ga na nomui titoko, ka dodoka yani na ligamu kivaka ki na waitui, ka wasea; a ra na lako na luve i Isireli e na mamaca e na loma ni wasawasa.
17Ka, raica, koi au, kaʼu na vakaukauwataka na lomadra na kai Ijipita, era na muri ira kina: ia kaʼu na vakarokorokotaki e na vuku i Fero, kei na nonai valu kecega, e na vuku ni nona vale-vodoki, kei na vukudra sa vodoka na nona ose.
18Ia era na kila na kai Ijipita ni sa ko Jiova koi au, niʼu sa vakarokorokotaki e na vuku i Fero, e na vuku ni nona vale-vodoki, kei ira sa vodoka na nona ose.
19Ia na agilose ni Kalou, o koya ka liutaka na nodrai vavakoso na Isireli, sa toki ka laʼki muri ira; a sa lako tani na duru o mai na matadra, ka laʼki tu e dakudra:
20a sa lako ki na maliwa ni nodrai tikotiko na kai Ijipita kei na nodrai tikotiko na Isireli; a sa o kei na butobuto vei ira ko ya, ia ka sa cilavi ira o qo e na bogi: a ra sa sega ni veitorovi kina e na bogi ka siga.
21A sa dodoka na ligana ko Mosese kivaka ki na waitui; a sa vakasuka na wasawasa ko Jiova e na tokalau kaukauwa e na bogi ka siga, a sa vakamamacataka na waitui, ka sa wase rua na wai.
22A ra sa lako e loma ni wasawasa e na mamaca: a sa bai vei ira na wai, e na kedra i matau kei na kedra i mawi.
23A sa vakasava, ka lako muri ira ki loma ni wasawasa, ko ira na kai Ijipita, na ose kecega i Fero, na nona vale-vodoki, kei ira sa vodoka na nona ose.
24A sa yaco ni sa veivuke nai vakatawa e na sabogibogi, sa qai dikeva ko Jiova na nodrai valu na kai Ijipita mai na duru buka waqa kei na o, ka vakataqayataka na nodrai valu na kai Ijipita,
25ka serekabiuta na yava ni nodra vale-vodoki, ka cakava me ra lako vakabibi kina: a ra sa kaya kina na kai Ijipita, Me da drotaka na matadra na Isireli; ni sa totaki ira ko Jiova, a sa nodra meca na kai Ijipita.
26A sa kaya vei Mosese ko Jiova, Mo dodoka na ligamu kivaka ki na waitui, me suka tale na wai me luvuci ira na kai Ijipita, na nodra vale-vodoki, kei ira sa vodoka na nodra ose.
27A sa dodoka na ligana ko Mosese kivaka ki na waitui, a sa suka tale na waitui e na kena kaukauwa ni sa kida mai na mataka; a ra sa dro ka sota ga na kai Ijipita; a sa biuti ira na kai Ijipita ko Jiova ki loma ni wasawasa.
28A sa lesu na wai, ka luvuca na vale-vodoki, kei ira sa vodoka na ose, io nai valu kecega i Fero ka muri ira ki na wasawasa; sa sega e dua vei ira sa vo.
29Ia ko ira na luve i Isireli era sa lako e na mamaca e na loma ni wasawasa; a sa bai vei ira na wai e na kedra i matau kei na kedra i mawi.
30A sa Vakabula na Isireli e na siga ko ya ko Jiova mai na ligadra na kai Ijipita; a sa raici ira na kai Ijipita ko ira na Isireli ni ra sa mate koto e na matasawa.
31Ia na Isireli sa kunea na cakacaka levu ko ya ka cakava ko Jiova ki na kai Ijipita; a ra sa rerevaki Jiova na tamata, ka vakabauti Jiova, kei na nonai talatala ko Mosese.
Who We AreWhat We EelieveWhat We Do
2025 by iamachristian.org,Inc All rights reserved.
