Na Lako Yani 13 - AI VOLA TABU（FIJ1864）

Sa nei Jiova na ulumatua, 1, 2, 11-16. A solevu ni lako-sivia, 3-10. Era lako tani mai Ijipita na Isireli, ka kauta na sui i Josefa, 17-19. Sa liutaki ira na o, 20-22.

1A sa vosa vei Mosese ko Jiova, ka kaya,

2Mo vakatabuya me noqu na ulumatua kecega, ko ya kecega sa sucu taumada, vei ira na luve i Isireli, a tamata kei na manumanu e yavai va talega: sa noqu ga.

3A sa kaya ko Mosese vei ira na tamata, Dou nanuma na siga o qo, dou a lako mai kina mai Ijipita, mai na vale ni veivakabobulataki; ni sa kauti kemudou tani maikina ko Jiova e na liga kaukauwa: ia me kakua ni kani na ka sa vakaleveni.

4E na siga o qo dou a lako tani, e na vula ko Apipi.

5Ia ena yaco ni sa kauti iko ko Jiova ki na nodra vanua na kai Kenani, kei na luve i Eci, kei na luve i Amori, kei na luve i Evi, kei na kai Jepusa, a ya ka vosavavakini kina ko koya vei ira na nomu qase me solia vei iko, a vanua sa dave kina na wai-ni-sucu kei na oni, dou na qai qarava na cakacaka o qo e na vula o qo.

6E vitu na siga mo kania kina na ka sa tawa vakaleveni, ia e na kenai kavitu ni siga ena solevu vei Jiova.

7Ena kani tiko na ka sa tawa vakaleveni ka bogi vitu; me kakua ni kunei vei iko na ka sa vakaleveni; me kakua talega ni kunei vei iko na leveni e na nomu veiyasana kecega.

8Ia mo vakatakila vua na luvemu e na siga ko ya, ka kaya, Sa caka na ka o qo e na vuku ni ka sa cakava vei au ko Jiova niʼu a lako tani mai Ijipita.

9Ia ena kemui vakatakilakila e na ligamu, kei nai divi e na yadremu, me tiko kina e na gusumu na vunau i Jiova: ni sa kauti iko tani mai Ijipita ko Jiova e na liga kaukauwa.

10Mo vakabauta kina nai vakaro o qo e na kena gauna sa lokuci, e na veiyabaki.

11Ia ena yaco ni sa kauti iko oti ko Jiova ki na nodra vanua na kai Kenani, me vaka sa vosavavakini vei iko kei ira na nomu qase, ka sa solia vei iko,

12mo qai vakatabuya me nei Jiova ko ya kecega sa sucu taumada, kei na ulumatua kecega ni nomu manumanu e yavai va; ena nei Jiova na tagane.

13Ia na ulumatua kecega ni asa mo volia e na lami; ia kevaka ko sa tawa via volia, mo musuka na domona: ia na ulumatua kecega ni tamata vei ira na luvemu mo volia.

14Ia ena yaco ni sa tarogi iko na luvemu e na gauna maimuri, ka kaya, A cava o qo? mo qai kaya vua, Sa kauti keda tani e na liga kaukauwa ko Jiova mai Ijipita, mai na vale ni veivakabobulataki:

15a sa yaco ni sa dredreta ko Fero ni laivi keda me lako, sa qai vakamatea ko Jiova na ulumatua kecega mai na vanua ko Ijipita, io na ulumatua ni tamata kei na ulumatua ni manumanu e yavai va: o koya kaʼu sa vakacabora kina vei Jiova ko ya kecega sa sucu taumada, ni sa tagane; ia na ulumatua kecega vei ira na luvequ kaʼu sa volia.

16Ia enai vakatakilakila e na ligamu, kei nai ukuuku e na yadremu: ni sa kauti keda tani mai Ijipita ko Jiova e na liga kaukauwa.

17IA sa lekaleka na sala sa lako e na nodra vanua na kai Filisitia, a sa sega ga ni tuberi ira kina na tamata na Kalou, ni sa laivi ira oti ko Fero me lako; ni sa kaya na Kalou, De ra veivutuni na tamata ni ra sa raica nai valu, ka lesu ki Ijipita:

18a sa veituberi ira yaki na tamata na Kalou e na sala mai na lekutu a ya mai na Wasa Damudamu: a ra sa vakarau tu na luve i Isireli, ni ra sa lako cake mai na vanua ko Ijipita.

19A sa kauta kaya ko Mosese na sui i Josefa: ni ka vosavavakinitaki ira vakabibi na luve i Isireli ko koya, ka kaya, Ena talevi kemudou vakaidina na Kalou; ia dou kauta cake tani eke kei kemudou na suiqu.

20A ra sa toki tani mai Sukoci, ka laʼki tiko mai Ecami, ka voleka ki na lekutu.

21A sa liutaki ira tiko ko Jiova e na duru o e na siga, me tuberi ira e na sala; kei na duru buka waqa e na bogi, me vakararamataki ira; me ra lako e na siga kei na bogi:

22sa sega ni kauta tani ko koya na duru o e na siga, se na duru buka waqa e na bogi, mai na matadra na tamata.