Na Lako Yani 11 - AI VOLA TABU（FIJ1864）

Sa kaya ko Jiova vei ira na Isireli me ra kere ka maivei ira na kai Ijipita, 1-3. Sa tukuna vei Fero ko Mosese ni na mate na ulumatua kecega, 4-10.

1A sa kaya vei Mosese ko Jiova, Sa vo tale e dua na yaviti, kaʼu na vakayacora vei Fero, kei Ijipita; sa oti ena qai laivi kemudou ko koya mo dou lako tani eke: ni sa laivi kemudou ko koya mo dou lako, ena qai vakasavi kemudou tani sara eke.

2Mo vosa mada e na daligadra na tamata, ka me kerea nai yaya siliva kei nai yaya koula, na tagane yadua mai vua na nona lewe-ni-koro, kei na alewa yadua mai vua na nona lewe-ni-koro.

3A sa cakavi ira na kai Ijipita ko Jiova me ra lomani ira na tamata. Ia na tamata ko Mosese talega, sa turaga sara e na vanua ko Ijipita, e na matadra era qaravi Fero, kei na matadra na tamata kecega.

4A sa kaya ko Mosese vei Fero, Sa vakaoqo ko Jiova, E na lomaloma ni bogi kaʼu na lako voli yani e loma i Ijipita:

5a ra na mate na ulumatua kecega e na vanua ko Ijipita, io, na ulumatua i Fero, o koya sa tiko e nonai tikotiko-vakaturaga, na nona ulumatua talega na vada sa tiko mai daku ni vatu ni varo sila; kei na ulumatua kecega ni manumanu e yavai va:

6ia e na vanua ko Ijipita ena dua na tagi levu, ka sega e tautauvata, ka na sega e dua tale e tautauvata kaya:

7ia ena sega ni yavalata na yamena e dua na koli, me ca e dua vei ira na luve i Isireli, me ca na tamata se na manumanu: mo dou kila kina ni sa vakai-vakatakilailataki ira na kai Ijipita, kei ira na Isireli, ko Jiova.

8Ia ko ira kecega o qo sa qaravi iko, era na lako sobu mai vei au, ka cuva vei au, ka kaya, Mo lako tani, kei ira kecega na tamata era sa muri iko: ka sa oti kaʼu na qai lako tani. A sa waqawaqa na nona cudru, ni sa lako tani ko koya mai na mata i Fero.

9Asa kaya vei Mosese ko Jiova, Ena sega ni vakarorogo vei kemudou ko Fero; ka me vakavuqataki na noqu cakacaka-mana e na vanua ko Ijipita.

10A sa cakava na ka-mana kecega o qo ko Mosese kei Eroni e na mata i Fero: a sa vakaukauwataka na loma i Fero ko Jiova, a sa sega kina ni laivi ira na luve i Isireli me ra lako tani mai na nona vanua.