Na Lako Yani 10 - AI VOLA TABU（FIJ1864）

Sa ca ko Ijipita e na vuku ni vodre, 1-20; kei na butobuto, 21-23; sa qai rere ko Fero, 24-26. Sa vakaukauwataka ko Jiova na loma i Fero, 27-29.

1A SA kaya vei Mosese ko Jiova, Mo laʼki curu vei Fero: niʼu sa vakaukauwataka na lomana, kei na lomadra na nona tamata, meʼu tauca kina na noqui vakatakilakila o qo e na kedra maliwa:

2mo tukuna talega kina e daligadra na luvemu, kei na luvedra na luvemu, na ka kaʼu a kitaka mai Ijipita, kei na noqui vakatakilakila kaʼu sa cakava e na kedra maliwa; mo dou kila kina ni sa ko Jiova koi au.

3A rau a laʼki curu vei Fero ko Mosese kei Eroni, a rau sa kaya vua, Sa vosa vakaoqo ko Jiova na nodra Kalou na Iperiu, A cava na kena dede ni ko sa bese tiko ni vakamalumalumutaki iko e na mataqu? mo laivi ira na noqu tamata me ra lako, me ra qaravi au:

4ia kevaka ko sa bese tiko ni laivi ira na noqu tamata me ra lako, raica, e na sabogibogi kaʼu na kauta mai na vodre ki na nomu veiyasana:

5ia era na ubia na dela ni vanua, me kakua ni raici rawa na vanua: a ra na kania na ka sa vo ka bula tiko, o koya sa vakavoca vei kemuni na uca-cevata, ka kania na kau kecega sa tubu mai na vanua me kemudou:

6ia era na vakasinaita na nomu veivale, kei na nodra veivale kecega era qaravi iko, kei na nodra veivale na kai Ijipita kecega; a ka era sa tawa raica na tamamu, sei ira na tamadra na tamamu, mai na gauna era a tiko kina e dela ni vanua ka yacova kaya na gauna o qo. A sa saumaki ko koya, ka curu tani vei Fero.

7A ra sa kaya vei Fero ko ira era qaravi koya, A cava na kena dede ni coriti keda tiko na tamata o qo? mo laivi ira na tamata me ra lako, me ra qaravi Jiova na nodra Kalou: o ni sa sega beka ni kila rawa ni sa ca ko Ijipita?

8A rau sa kauti tale vei Fero ko Mosese kei Eroni: a sa kaya vei rau ko koya, Dou lako, dou qaravi Jiova na nomuni Kalou: ko cei li ko ira me lako?

9A sa kaya ko Mosese, Keimami na lako vata kei na neimami cauravou kei na neimami qase, na neimami goneatagane kei na neimami gonealewa; keimami na lako vata kei na neimami sipi kei na neimami karavau; ni sa neimami me solevu vei Jiova.

10A sa kaya vei rau ko koya, Me tiko vakakina vei kemuni ko Jiova, me vaka kaʼu na laivi kemuni kei ira na nomuni lalai mo dou lako: mo ni raica; ni sa e matamuni na ca:

11mani kakua ni vakakoya: mo ni lako ga sa tamata bula, ka qaravi Jiova; ni sai koya ga na ka drau a kerea. A rau sa vakasevi tani e ua mata i Fero.

12A sa kaya vei Mosese ko Jiova, Mo dodoka yani na ligamu me donuya na vanua ko Ijipita, me lako mai na vodre, me ra cabe mai ki na vanua ko Ijipita, ka kania na co kecega ni vanua, io na ka kecega sa vakavoca na uca-cevata.

13A sa laveta na nonai titoko ko Mosese kivaka ki na vanua ko Ijipita, a sa kauta mai na cagi mai cake ko Jiova me liwaka na vanua e na siga ko ya ka bogi, kei na bogi ko ya ka Siga; ia ni sa kida na mataka, sa qai kauta mai na vodre na cagi mai cake.

14A sa cabe cake na vodre e na vanua kecega ko Ijipita, ka tiko e na veiyasana kecega mai Ijipita: era ka rerevaki sara, sa sega na vodre e tautauvata kaya eliu, ena sega talega na kedra tautauvata emuri.

15Ia era sa ubia na dela kecega ni vanua, a sa butobuto kina na vanua; a ra sa kania na co kecega ni vanua, kei na vua kecega ni kau sa vakavoca na uca-cevata: a sa sega na ka karakarawa sa vo e na veikau, se na veico ni vanua, e na vanua kecega ko Ijipita.

16Sa qai kusarawa ko Fero ka kacivi Mosese kei Eroni; a sa kaya, Au sa valavala ca vei Jiova na nomudou Kalou, vei kemudrau talega:

17ia o qo, mo kakua mada ni cudruvaka na noqui valavala ca e dua bauga o qo, ia drau masuti Jiova na nomudrau Kalou, me kauta tani vei au na mate ca o qo ga.

18A sa lako tani vei Fero ko koya, ka masuti Jiova.

19A sa vakasuka na cagi ko Jiova me vualiku kaukauwa sara, a sa kauta tani na vodre, ka biuta ki na Wasa Damudamu; sa sega ni vo e dua na vodre e na veiyasana kecega mai Ijipita.

20A sa vakaukauwataka na loma i Fero ko Jiova, a sa sega kina ni laivi ira na luve i Isireli me ra lako.

21A sa vosa vei Mosese ko Jiova, Mo dodoka na ligamu kivaka ki lomalagi, me yaco mai na butobuto e na vanua ko Ijipita, ka me mai vakayayamo e na butobuto.

22A sa dodoka na ligana kivaka ki lomalagi ko Mosese, a sa yaco na butobuto loaloa e na vanua kecega ko Ijipita ka siga tolu:

23era sa sega ni veiraici, a sa sega e dua na tamata sa tu cake mai na nona tikina, ka bogi tolu: ia ka sa tiko na rarama e na nodra veivale na luve i Isireli kecega.

24A sa kacivi Mosese ko Fero, ka kaya, Mo ni lako, mo ni qaravi Jiova; me ra tiko ga na nomuni sipi, kei na nomuni karavau: me ra lako talega na nomuni lalai vata kei kemuni.

25A sa kaya ko Mosese, Mo soli talega vei keimami me so nai soro kei nai soro kama, me keimami vakacabora vei Jiova na neimami Kalou:

26a neimami manumanu talega ena lako vata kei keimami; ena tawa vo e dua na quraqura ni manumanu; ni sai koya me keimami na kauta maikina me qaravi Jiova na neimami Kalou; ia, ni keimami sa yaco ga ki na tikina ko ya, keimami na kila na ka me keimami qaravi Jiova kina.

27Ia sa vakaukauwataka na loma i Fero ko Jiova, a sa bese kina ni laivi ira me ra lako.

28A sa kaya vua ko Fero, Mani lako tani vei au, qarauni iko, mo kakua tale ni raica na mataqu; ni ko na mate e na siga ko sa raica kina na mataqu.

29A sa kaya ko Mosese, Sa vinaka na nomu vosa, au na sega ni raica tale na matamu.