1A SA kaya vei Mosese ko Jiova, Mo laʼki curu vei Fero, ka kaya vua, Sa vakaoqo ko Jiova na nodra Kalou na Iperiu, Mo laivi ira na noqu tamata me ra lako, me ra qaravi au:
2ia kevaka ko sa bese tiko ni laiva me lako, ka sa tauri ira tiko,
3raica, sa na tara na liga i Jiova na nomu manumanu sa tiko mai na veico, io, na ose, na asa, na kameli, na karavau, kei na sipi: e dua na mate dauveitauvi e rerevaki sara:
4ia ena vakaivakatakilakilataka ko Jiova na nodra manumanu na Isireli, kei na nodra manumanu na kai Ijipita: ena sega ni mate e dua e na nodra kecega na luve i Isireli.
5A sa lokuca na kena siga ko Jiova, a sa kaya, E na sabogibogi, ena kitaka na ka o qo ko Jiova e na vanua.
6A sa cakava na ka ko ya ko Jiova e na sabogibogi, a sa ciba na manumanu kecega ni Ijipita: ia na nodra manumanu na luve i Isireli sa sega ni mate o dua.
7A sa talaki ko Fero, ka, raica, sa sega ni mate e dua na nodra manumanu na Isireli. A sa kaukauwa na loma i Fero, a sa tawa laivi ira na tamata me ra lako.
8A sa kaya vei Mosese kei Eroni ko Jiova, Drau qumia e na ligamudrau na dravu mai na matadravu, ia me vakamiraka ko Mosese kivaka ki lomalagi e na mata i Fero:
9ia ena yaco me kuvu matalailai e na vanua kecega ko Ijipita, ia ena yaco me bo, sa tetela ka vidikoso mai, e na tamata, kei na manumanu, e na vanua kecega ko Ijipita.
10A rau a kauta na dravu mai na matadravu, ka tu e na mata i Fero; a sa vakamiraka ko Mosese kivaka ki lomalagi; a sa yaco me bo, sa tetela ka vidikoso mai, e na tamata, kei na manumanu.
11A ra sa sega ni tu rawa e na mata i Mosese ko ira na daucaka-mana, e na vuku ni bo; ni sa tauvi ira era daucaka-mana na bo, kei ira kecega na kai Ijipita.
12A sa vakaukauwataka na loma i Fero ko Jiova, a sa sega ni vakarorogo vei rau; me vaka ka kaya vei Mosese ko Jiova.
13A sa kaya vei Mosese ko Jiova, Mo sou e na sabogibogi, ka laʼki tu e na mata i Fero, ka kaya vua, Sa vosa vakaoqo ko Jiova na nodra Kalou na Iperiu, Mo laivi ira na noqu tamata me ra lako, me qaravi au:
14niʼu na tala e na gauna o qo na noqu mate veitauvi kecega ki na yalomu, vei ira talega era qaravi iko, kei ira na nomu tamata; mo kila kina ni sa sega e dua me tautauvata kei au e vuravura kecega.
15Ia kevaka kaʼu a dodoka oti na ligaqu, ka yaviti iko, kei ira na nomu tamata, e na mate dauveitauvi; ko qai muduki tani mai vuravura:
16ia e na vuku dina ni ka ga o qo kaʼu sa vakabulai iko tiko, meʼu vakatakila vei iko na noqu kaukauwa, me kuruvaki talega na yacaqa e vuravura kecega.
17O sa vakalevulevui iko tiko li vei ira na noqu tamata, mo kakua ni laivi ira me ra lako, ne?
18raica, e na sabogibogi e na gau-ni-siga vakaoqo kaʼu na vakatauca mai na uca-cevata e ka rerevaki sara, sa sega e tautauvata kaya e Ijipita mai na gauna sa tauyavutaki ka yacova na gauna o qo:
19ia o qo mo talaki, mo maroroya na nomu manumanu, kei na nomu kecega e na were; ena tau na uca-cevata ki na tamata kecega, kei na manumanu, sa kune e na were, sa tawa kauti ki vale, a ra na mate kina.
20Ia ko koya vei ira na tamata i Fero sa rerevaka na vosa i Jiova, sa kauti ira na nona tamata kei na nona manumanu ki na veivale:
21ia ko koya sa tawa vakasama na vosa i Jiova, sa laivi ira na nona tamata kei na nona manumanu e na were.
22A sa kaya vei Mosese ko Jiova, Mo dodoka na ligamu kivaka ki lomalagi, me tau na uca-cevata e na vanua kecega ko Ijipita, ki na tamata, kei na manumanu, kei na co kecega ni vanua, e na vanua ko Ijipita.
23A sa laveta na nonai titoko ko Mosese kivaka ki lomalagi, a sa vakatala mai ko Jiova na kurukuru kei na uca-cevata, a sa cici voli e na dela ni vanua na buka; a sa vakatauca ko Jiova na uca-cevata e na dela ni vanua mai Ijipita.
24A sa tau mai na uca-cevata, kei na buka sa veiwaki vata kei na uca-cevata, a ka rerevaki sara, sa sega e tautauvata kaya e na vanua ko Ijipita mai na gauna sa matanitu kina.
25Ia na uca-cevata sa yavita na ka kecega sa tiko e na were, a tamata kei na manumanu, e na vanua kecega ko Ijipita; ia na uca-cevata sa yavita na co kecega ni vanua, ka musumusuka na kau kecega ni vanua.
26Ia e na yasana ga mai Koseni, era tiko kina na luve i Isireli, sa sega kina na uca-cevata.
27A sa talaki ko Fero, ka kacivi Mosese kei Eroni, a sa kaya vei rau, Au sa valavala ca o qo: sa dodonu ko Jiova, ia koi au kei ira na noqu tamata, keimami sai valavala ca:
28mo vakamasuti Jiova, (ni sa qai levu,) me kakua tale na kurukuru maivei koya na Kalou, se na uca-cevata; ia kaʼu na qai laivi kemuni mo ni lako, ia kemuni na tawa tiko tale.
29A sa kaya vua ko Mosese, Niʼu sa yaco ki nai bili ni koro, au na dodoka yani na ligaqu vei Jiova; ena qai mudu na kurukuru, ka sega tale ni tau na uca-cevata; mo kila kina ni sa nei Jiova ko vuravura:
30ia ko iko kei ira na nomu tamata, au sa kila ni sa bera ga ni kemuni sa rerevaki Jiova na Kalou.
31A sa yaviti na laino kei na parile, ni sa vakasola mai na parile, a sa vaqana na laino.
32Ia na witi kei na rei, sa sega ni yaviti: ni sa tawa votu.
33A sa lako tani vei Fero ki nai bili ni koro ko Mosese, a sa dodoka yani na ligana vei Jiova: a sa mudu na kurukuru kei na uca-cevata, a sa sega ni sova tiko mai ki vuravura na uca.
34Ia ni sa kunea ko Fero sa mudu na uca, kei na uca-cevata, kei na kurukuru, sa qai kuria tale na nonai valavala ca, ka vakaukauwataka na lomana, ko koya kei ira na nona tamata.
35A sa kaukauwa na loma i Fero, a sa bese ni laivi ira na luve i Isireli me ra lako; me vaka ka vosa ko Jiova e na gusu i Mosese.
Who We AreWhat We EelieveWhat We Do
2025 by iamachristian.org,Inc All rights reserved.
