Na Lako Yani 8 - AI VOLA TABU（FIJ1864）

Sa lako mai na boto, 1-7. Sa veivutuni ko Fero, a sa mate na boto: ka qai vakaukauwataka na lomana ko Fero, 8-15. Sa lako mai na kutu, 16-19, kei na gogo, 20-24. Sa kacivi Mosese ko Fero me masuta na Kalou me kauti tani na gogo, a sa kauti tani e na i Mosese; ka qai ta-kaukauwataka tale na lomana ko Fero, 25-32.

1A SA vosa vei Mosese ko Jiova, Mo lako vei Fero, ka kaya vua, Sa vosa vakaoqo ko Jiova, Mo laivi ira na noqu tamata me ra lako, me ra qaravi au:

2ia kevaka ko sa bese ni laiva me lako, raica, kaʼu na yavita na nomu veiyasana kecega e na boto:

3ia ena vakatubura vakalevu na boto na uciwai, a ra na lako cake ka curuma na nomu vale, kei na nomu vale ni moce, ka cabeta na nomui mocemoce, ka curuma na nodra vale era qaravi iko, kei na nodra maliwa na nomu tamata, kei na nomu lovo, kei na nomu sedre sa natuki kina na madrai:

4ia era na mai kabai iko na boto, kei ira na nomu tamata, kei ira kecega era qaravi iko.

5Sa kaya talega vei Mosese ko Jiova, Mo kaya vei Eroni, Mo dodoka na ligamu kei na nomui titoko kivaka ki na uciwai lalai, kei na uciwai, kei na drano, ka vakayacora mai na boto me lako cake e na dela ni vanua ko Ijipita.

6A sa dodoka na ligana ko Eroni kivaka ki na wai kecega mai Ijipita; a sa lako cake mai na boto, ka ubia na vanua ko Ijipita.

7A ra sa kitaka vakakina na daucaka-mana e na nodrai valavala vuni, a ra sa kauta cake mai na boto ki dela ni vanua ko Ijipita.

8Sa qai kacivi Mosese kei Eroni ko Fero, ka kaya, Drau vakamasuti Jiova me kauta tani vei au na boto, vei ira talega na noqu tamata; au na qai laivi ira na tamata me ra laʼki vakacabora na manumanu vei Jiova.

9A sa kaya vei Fero ko Mosese, Mo vakaroti au: meʼu vakamamasu ninaica e na vukumu, kei na vukudra era qaravi iko, kei ira na nomu tamata, me vakaoti na boto vei iko kei na nomu veivale, me ra vo e na uciwai ga?

10A sa kaya, E na sabogibogi. A sa kaya ko koya, Ena vaka na nomu vosa: mo kila kina ni sa sega e tautauvata kei Jiova na neimami Kalou:

11ia era na lako tani vei iko na boto, kei na nomu veivale, kei ira era sa qaravi iko, kei ira na nomu tamata; ena vo e na uciwai ga.

12A rau sa lako tani vei Fero ko Mosese kei Eroni: a sa tagi vei Jiova ko Mosese e na vuku ni boto ka kauta ko koya vei Fero.

13A sa cakava ko Jiova me vaka na vosa i Mosese; a sa mate yani na boto mai na veivale, mai na vei-rara, mai na veiwere talega.

14A ra sa vakasoqona me bini vata: a sa boi ca na vanua.

15Ia ni sa raica ko Fero sa ia na cegu, sa vakaukauwataka na lomana, ka sa sega ni vakarorogo vei rau; me vaka ka kaya ko Jiova.

16A sa vosa vei Mosese ko Jiova, Mo kaya vei Eroni, Mo laveta na nomui titoko, ka yavita na kuvu ni vanua, me yaco kina me nana e na vanua kecega ko Ijipita.

17A rau a kitaka vakakina; ni sa dodoka na ligana kei na nonai titoko ko Eroni, ka yavita na kuvu ni vanua, a sa tiko na nana e na tamata, kei na manumanu; a kuvu ni vanua kecega sa yaco me nana e na vanua kecega ko Ijipita.

18A ra sa kitaka vakakina na daucaka-mana e na nodrai valavala vuni, ka me vakatubura na nana, a ra sa tawa rawata: a sa tiko na nana e na tamata, kei na manumanu.

19A ra sa qai kaya vei Fero na daucaka-mana, O qo nai qaqalo ni Kalou: a sa kaukauwa na loma i Fero, ka sa tawa vakarorogo vei rau ko koya; me vaka ka kaya ko Jiova.

20A sa kaya vei Mosese ko Jiova, Mo sou e na sabogibogi, ka laʼki tu e na mata i Fero; raica, sa lako mai ki na wai; ia mo kaya vua, Sa kaya vakaoqo ko Jiova, Mo laivi ira na noqu tamata me ra lako, me ra qaravi au:

21ia kevaka ko sa bese ni laivi ira na noqu tamata me lako, raica, kaʼu na tala na gogo, vei iko, kei ira era qaravi iko, kei ira na nomu tamata, ka ki na nomu veivale: ia ena oso na nodra veivale na kai Ijipita e na gogo, kei na qele talega era tiko kina:

22ia e na siga ko ya kaʼu na tawasea na vanua ko Koseni, era tiko kina na noqu tamata, me kakua ni tiko kina na gogo; mo kila kina ni sa ko Jiova koi au e na loma i vuravura:

23ia kaʼu na vakaivakatakilakilataki ira na noqu tamata kei na nomu tamata: ena caka e na sabogibogi nai vakatakilakila o qo.

24A sa cakacaka vakakina ko Jiova; a sa lako mai na gogo, na ka levu, ki na vale i Fero, kei na nodra vale na nona tamata: a sa ca na vanua e na veiyasana kecega mai Ijipita, e na vuku ni gogo.

25A sa kacivi Mosese kei Eroni ko Fero, ka sa kaya, Dou lako, mo dou vakacabora na manumanu vua na nomudou Kalou e na vanua o qo.

26A sa kaya ko Mosese, Sa sega ni dodonu me keimami kitaka vakaoqori: ni keimami na vakacabora vei Jiova na neimami Kalou na ka era vakasisilataka na kai Ijipita: raica, keimami na vakacabora e matadra beka na ka era vakasisilataka na kai Ijipita, ka ra na sega beka ni viriki keimami e na vatu?

27keimami na lako ga ka bogi tolu ki na lekutu, ka vakacabora na manumanu vei Jiova na neimami Kalou, me vaka ena vosa vei keimami ko koya.

28A sa kaya ko Fero, Au na laivi kemudou mo dou lako me vakacabora na manumanu vei Jiova na nomudou Kalou e na lekutu: ia dou na kakua ga ni lako vakayawa: drau masulaki au.

29A sa kaya ko Mosese, Raica, kaʼu sa lako tani vei iko, ia kaʼu na vakamasuti Jiova me lako tani na gogo vei Fero, vei ira era qaravi koya, kei ira na nona tamata, e na sabogibogi: ia me kakua ni lasu tale ko Fero, ni sa tawa laivi ira na tamata me ra laʼki vakacabora na manumanu vei Jiova.

30A sa lako tani vei Fero ko Mosese, ka masuti Jiova.

31A sa cakava ko Jiova me vaka na vosa i Mosese; a sa kauta tani na gogo vei Fero, vei ira era qaravi koya, kei ira na nona tamata: sa sega ni vo e dua.

32A sa vakaukauwataka na lomana ko Fero e na siga talega o qo, ka sa bese ni laivi ira na tamata me ra lako.