1A sa kaya vei Mosese ko Jiova, Raica, au sa cakavi iko mo vaka na Kalou vei Fero: ia ena nomu dautukutuku ko Eroni na tuakamu:
2mo tukuna na ka kecega kaʼu sa vunautaka vei iko: ia ko Eroni na tuakamu, ena vosa vei Fero, me talai ira na luve i Isireli mai na nona vanua:
3ia kaʼu na vakaukauwataka na loma i Fero, ka vakavuqataka na noqui vakatakilakila, kei na noqu cakacaka-mana, e na vanua ko Ijipita:
4ia ena tawa vakarorogo vei kemudrau ko Fero, kaʼu na tabaki Ijipita e na ligaqu, ka kauti ira tani mai na noqu veivavakoso, na noqu tamata na luve i Isireli, mai na vanua ko Ijipita, e na cudru levu:
5ia era na kila na kai Ijipita ni sa ko Jiova koi au, niʼu sa dodoka yani na ligaqu ki Ijipita, ka kauti ira tani na luve i Isireli e na kedra maliwa.
6A sa kitaka ko Mosese kei Eroni me vaka ka vunautaka vei rau ko Jiova; erau sa kitaka vakakina.
7Ia sa walusagavulu na yabaki i Mosese, ka walusagavulu ka tolu na yabaki i Eroni, ni rau sa vosa vei Fero.
8A sa vosa vei Mosese kei Eroni ko Jiova, ka kaya,
9Ni sa vosa vei kemudrau ko Fero, ka kaya, Drau vakatakila mai e dua na cakacaka-mana e na vukumu-drau: mo qai kaya vei Eroni, Mo taura na nomui titoko, ka viria e na mata i Fero, ia ena yaco me gata.
10A rau sa laʼki curu vei Fero ko Mosese kei Eroni, a rau sa kitaka me vaka ka vunautaka ko Jiova: a sa viria na nonai titoko ko Eroni e na mata i Fero, kei na matadra na nona tamata, a sa yaco me gata.
11Sa qai kacivi ira na tamata vuku ko Fero, kei ira era daucakai-sausau: a ra sa kitaka vakakina na daucaka-mana mai Ijipita e na nodrai valavala vuni.
12A ra sa dui viria na tamata yadua na nonai titoko, a sa yaco me gata: ia nai titoko i Eroni sa tiloma na nodrai titoko.
13A sa kaukauwa na loma i Fero, a sa tawa vakarorogo kina vei rau: me vaka ka kaya ko Jiova.
14A sa kaya vei Mosese ko Jiova, Sa kaukauwa na loma i Fero; sa bese ko koya ni laivi ira na tamata me ra lako:
15mo lako vei Fero e na sabogibogi; raica, sa lako yani ki na wai; ia mo tu e na bati ni uciwai, me waraki koya; ia nai titoko ka vuki me gata mo taura lako e ligamu:
16ia mo kaya vua, O Jiova na nodra Kalou na Iperiu sa talai au vei iko, meʼu kaya, Mo laivi ira na noqu tamata me ra lako, me ra qaravi au mai na lekutu: ia raica, ko sa bese tiko ni vakarorogo:
17sa vosa vakaoqo ko Jiova, E na ka o qo ko na kila ni sa ko Jiova koi au. Raica, kaʼu na yavita na wai ni uciwai e nai titoko sa taura na ligaqu, ia ena vuki kina me dra:
18ia ena mate na ika sa tiko e na uciwai, ena boi ca talega na uciwai; a ra na cata ni gunuva na wai ni uciwai ko ira na kai Ijipita.
19Sa vosa talega vei Mosese ko Jiova, Mo kaya vei Eroni, Mo taura na nomui titoko, ka dodoka na ligamu vaka ki na wai ni Ijipita, kivaka ki na nodra uciwai lalai, vaka ki na nodra uciwai, ka vaka ki na nodra drano, ka vaka ki na nodrai keli-wai kecega, ka me yaco me dra; ka na tiko ga na dra e na veiyasana kecega e Ijipita, e na takona, kei na sedre vatu.
20A rau sa kitaka vakakina ko Mosese kei Eroni, me vaka ka vunautaka ko Jiova; ni sa laveta nai titoko, ka yavita na wai mai na uciwai, ni sa raica ko Fero, era raica talega na nona tamata; a sa vuki me dra mai na wai kecega sa tiko e na uciwai.
21A sa mate na ika sa tiko e na uciwai; a sa boi ca mai na uciwai, a ra sa sega ni gunuva rawa na kai Ijipita na wai mai na uciwai; a sa tiko na dra e na veiyasana kecega mai Ijipita.
22A ra sa kitaka vakakina na daucaka-mana mai Ijipita e na nodrai valavala vuni: a sa kaukauwa na loma i Fero, a sa sega ni vakarorogo vei rau: me vaka ka kaya ko Jiova.
23A sa lesu ko Fero ka lako ki na nona vale, a sa sega ni vakasama na ka o qo talega.
24A ra sa keli voleka ki na uciwai ko ira kecega na kai Ijipita me dua na wai me gunu; ni ra sa sega ni gunuva rawa na wai ni uciwai.
25A sa oti e vitu na bogi, ni sa yavita oti na uciwai ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
