Na Lako Yani 6 - AI VOLA TABU（FIJ1864）

Sa kaya vei Mosese ko Jiova ni na vakabulai ira na luve i Isireli, 2-13. A kawa i Rupeni kei Simioni, 14, 15. A kawa i Levi, 16-30.

1A sa kaya vei Mosese ko Jiova, O qo, ko na raica na ka kaʼu na kitaka vei Fero: ni na laivi ira me lako e na vuku ni liga kaukauwa, ia e na vuku ni liga kaukauwa ena vakasevi ira tani e nona vanua.

2A SA vosa na Kalou vei Mosese, ka kaya vua, Sa ko Jiova koi au:

3ia kaʼu a rairai vei Eparaama, vei Aisake, kei Jekope, niʼu Kalou Kaukauwa, ia kaʼu a sega ni kilai vei ira e na yacaqu ko Jiova:

4ia kaʼu a vakataudeitaka talega na noqu vosa ni yalayala vei iratou, me solia vei iratou na vanua ko Kenani, na vanua era veilakoyaki kina, eratou a tiko vulagi kina:

5ia kaʼu sa rogoca talega na nodra vutugu na luve i Isireli, era sa vakabobulataka ko ira na kai Ijipita; ia kaʼu sa nanuma na noqu vosa ni yalayala.

6O koya o qo mo kaya kina vei ira na luve i Isireli, Sa ko Jiova koi au, ia kaʼu na kauti kemudou tani mai na ruku ni nodrai lesi-bibi na kai Ijipita, ia kaʼu na vakabulai kemudou mai na nodra veivakabobulataki, ka vakabulai kemudou e na liga sa lave tu, kei na cudru levu:

7ia kaʼu na kauti kemudou me noqu tamata, ia kaʼu na nomudou Kalou koi au: ia dou na kila niʼu sa Jiova na nomudou Kalou, o koya sa kauti kemudou tani mai na ruku ni nodrai lesi-bibi na kai Ijipita:

8ia kaʼu na kauti kemudou ki na vanua kaʼu a vosavavakini kina meʼu solia vei Eparaama, vei Aisake, kei Jekope; ia kaʼu na solia vei kemudou mo dou kenai taukei: sa ko Jiova koi au.

9A sa vosa vakakoya ko Mosese vei ira na luve i Isireli: a ra sa sega ga ni vakarorogo vei Mosese e na vuku ni yalo lekaleka, kei na veivakabobulataki rarawa.

10A sa vosa vei Mosese ko Jiova, ka kaya,

11Mo curu, mo vosa vei Fero na tui Ijipita, me laivi ira na luve i Isireli mo ra lako tani e nona vanua.

12A sa vosa ko Mosese e na mata i Jiova, ka kaya, Raica, ko ira na luve i Isireli era sa sega ni vakarorogo vei au; ka na rogoci au vakacava ko Fero, niʼu sa belenigusu tawa cilivi?

13A sa vosa vei Mosese kei Eroni to Jiova, ka vakaroti rau ni ka tala vei ira aa luve i Isireli, vei Fero talega na tui Ijipita, ka me kauti ira tani na luve i Isireli nai na vanua ko Ijipita.

14O ira o qo sa turaga e na mataqali ni nodra qase: o iratou na luvena tagane ko Rupeni, na ulumatua i Isireli; ko Enoke, kei Falu, ko Esironi, kei Karimi: sa vakaoqo na veimataqali i Rupeni.

15Ia na luvena tagane ko Simioni; ko Yimueli, kei Yamini, kei Oati, kei Yakini, kei Sobari, kei Saula, a luvena e dua na alewa ni Kenani: sa vakaoqo na veimataqali i Simioni.

16Ia o qo na yacadratou na luvena tagane ko Levi, e na nodrai tabatamata; ko Kerisoni, kei Koaca, kei Mirari: ia na yabaki ni bula i Levi, e dua na drau ka tolusagavulu ka vitu na yabaki.

17A luve i Kerisoni; ko Lipini, kei Simi, e na nodrau mataqali.

18Ia na luve i Koaca; ko Amirami, kei Isari, kei Hepironi, kei Usieli: ia na yabaki ni bula i Koaca, e dua na drau ka tolusagavulu ka tolu na yabaki.

19Ia na luve i Mirari; ko Mali, kei Musi. Sa vakaoqo na veimataqali i Levi, e na nodrai tabatamata.

20Ia ko Amirami sa tauri Jokepeti na gane i tamana, me watina; a sa vakasucumi Eroni kei Mosese vei koya: ia na yabaki ni bula i Amirami, e dua na drau ka tolusagavulu ka vitu na yabaki.

21Ia na luvena tagane ko Isari; ko Kora, kei Nefeki, kei Sikiri.

22Ia na luve i Usieli; ko Misaeli, kei Elisapani, kei Siciri.

23Ia ko Eroni sa tauri Elisepa me watina, o koya na luve i Aminatapi, na gane i Nasoni; a sa vakasacumi Natapi, kei Epiu, ko Eliasari, kei Icamari, vei koya.

24Ia na luve i Kora; ko Asiri, kei Elikana, kei Epiasafi: sa vakaoqo na nodra mataqali na luve i Kora.

25Ia ko Eliasari, na luve i Eroni, sa taura me watina e dua vei ira na luvena alewa ko Putieli; a sa vakasucumi Piniasi vua. Sa vakaoqo na turaga vei ira na qase ni luve i Levi, e na nodra veimataqali.

26Oi rau o qo ko Eroni kei Mosese sa kaya kina ko Jiova, Drau kauti ira na luve i Isireli mai na vanua ko Ijipita me vaka na nodra vei vavakoso.

27Oi rau o qo ka vosa vei Fero na tui Ijipita, me rau kauti ira na luve i Isireli mai Ijipita: na Mosese kei na Eroni ko ya.

28Ia e na siga ka vosa kina ko Jiova vei Mosese mai na vanua ko Ijipita,

29sa vosa vei Mosese ko Jiova, ka kaya, Sa ko Jiova koi au: mo tukuna vei Fero na tui Ijipita na ka kecega kaʼu sa kaya vei iko.

30A sa kaya ko Mosese e na mata i Jiova, Raica, au sa belenigusu tawa cilivi, ka na vakarorogo vakacava vei au ko Fero?