Na Lako Yani 5 - AI VOLA TABU（FIJ1864）

Erau sa lako ko Mosese kei Eroni me tukuna na vosa i Jiova vei Fero, 1-14. Era sa tagi vei Fero na luve i Isireli, a sa cudruvi ira ga ko koya, 15-19. Era sa vosa kina vei Mosese, a sa masu kina ko koya ki na Kalou, 20-23.

1A SA oti erau qai lako ko Mosese kei Eroni, ka kaya vei Fero, Sa vosa vakaoqo ko Jiova na Kalou i Isireli, Mo laivi ira na noqu tamata me ra lako me solevu vei au mai na lekutu.

2A sa kaya ko Fero, O cei ko Jiova, meʼu vakarorogo ki na domona, meʼu laiva na Isireli kina me ra lako? au sa sega ni kilai Jiova, au na sega talega ni laiva na Isireli me ra lako.

3A rau sa kaya, A nodra Kalou na Iperiu sa veitata kei keirau: me bogi tolu mada me keimami lako ki na lekutu, ka vakacabora na manumanu vei Jiova na neimami Kalou; de sa lutuki keimami e na mate dauveitauvi, se nai seleiwau.

4A sa kaya vei rau ko na tui Ijipita, Oi kemudrau, ko Mosese kei Eroni, a cava kemudrau sa tarovi ira kina na tamata e na nodra cakacaka? dou lako ki na nomudoui lesilesi.

5Sa kaya talega ko Fero, Raica, era sa qai lewe vuqa mai na lewe ni vanua, ia kemudrau sa vakacegui ira mai na nodrai lesilesi.

6Ia e na siga ko ya sa vakaroti ira ko Fero era sa lewa na nodra cakacaka na tamata, kei na nodra turaga, ka kaya,

7Dou kakua ni solia tale na co vei ira na tamata me ra bulia kina na vatu-buli, me vaka eliu: me ra lako ga me ra kumuna vei ira na co:

8ia nai wiliwili ni vatu-buli, era sa daucakava eliu, dou tauca tiko vei ira; dou kakua ni vakalailaitaka: ni ra sa vucesa; o koya era sa tagi kina, ka kaya, Me keimami lako me vakacabora na manumanu vua na neimami Kalou.

9Me vakabibitaki vei ira na tamata na cakacaka, me ra cakacaka kina; ia me ra kakua ni nanuma na vosa lasu.

10A ra sa lako yani ko ira era lewa na nodra cakacaka na tamata, kei na nodra turaga, a ra sa vosa vei ira na tamata, ka kaya, Sa vosa vakaoqo ko Fero, Au na sega ni solia tiko vei kemudou na co:

11dou lakani, dou kumuna vei kemudou na co e na yasana dou kunea kina: ia ena sega ni vakalai-laitaki vakalailai na nomudou cakacaka.

12A ra sa dui veilakoyaki kina na tamata e na vanua kecega ko Ijipita, me ra kumuna vata na vu-ni-sila, mei sosomi ni co.

13A ra sa vakusakusataka ko ira era lewa na nodra cakacaka, ka ra kaya, Dou vakaotia na nomudou cakacaka, na nomudoui tavi e na veisiga, me vaka ni ka tiko na co.

14Ia ko ira sa turaga vei ira na luve i Isireli, ko ira ka ra lesia me lewai ira, ia ko ira era daulewa vei Fero na nodra cakacaka, era sa vakanakuitataki, ka vaka, A cava dou sa tawa vakaotia kina na nomudoui tavi ni dou buli vatu, e na noa, edaidai talega, me vaka eliu?

15Era sa qai lako mai ka tagi vei Fero ko ira na turaga vei ira na luve i Isireli, ka ra kaya, A cava ko ni sa kitaki ira kina vakaoqo na nomuni tamata?

16sa sega na co sa soli vei ira na nomu tamata, a ra sa kaya ga vei keimami, Dou cakava na vatu-buli: ka, raica, era sa vakanakuitataki na nomu tamata; ia ka ra sa cala ko ira na kai nomu ga.

17Ia ka sa kaya ga ko koya, Dou sa vucesa, sa vucesa: o koya dou sa kaya kina, Me keimami lako me vakacabora na manumanu vei Jiova.

18Ia oʼqo, dou lako, cakacaka; ia ena tawa soli vei kemudou na co, ia dou na solia ga mai nai wiliwili ni vatu-buli.

19A ra sa raica ni sa yacovi ira na ca ko ira sa turaga vei ira na luve i Isireli, ni sa kainaki, Dou kakua ni vakalailaitaka na nomudoui tavi ni vatu-buli e na veisiga.

20A ra sa veisotaraki kei Mosese kei Eroni erau sa tu me waraki ira, ni ra sa lako maivei Fero:

21a ra sa kaya vei rau, Me raici kemudrau ko Jiova, ka lewa; ni drau sa vakaboicataki keitou e na mata i Fero, kei na matadra na nona tamata, sa soli kina ki na ligadra nai seleiwau me ra vakamatei keitou.

22A sa lesu vei Jiova ko Mosese, a sa kaya, Turaga, a cava ko ni sa vakararawataki ira kina na tamata o qo? a cava ko a talai au kina?

23ia mai na gauna kaʼu a lako kina vei Fero me vosa e na yacamu, sa caka ca ko koya vei ira na tamata o qo; ia ko sa sega dina ni vakabulai ira na nomu tamata.