Na Lako Yani 3 - AI VOLA TABU（FIJ1864）

Sa rairai vei Mosese na Kalou, a sa talai koya me kauti ira na luve i Isireli mai Ijipita.

1Ia ko Mosese, sa vakana na sipi i Jiciro na vugona, o koya na bete mai Mitiani: a sa kauta na sipi ki daku ni lekutu, a sa yaco ki na ulu-ni-vanua ni Kalou, ki Orepi.

2A sa rairai vua ko koya na Agilose i Jiova e na yameyame ni buka mai na loma ni kau: a sa irova, ka, raica, sa waqa na kau e na buka, ka sa sega ni yava na kau.

3A sa kaya ko Mosese, Au na lako vakatikitiki mada meʼu dikeva nai rairai vakatani o qo, se cava beka sa tawa yavu kina na kau.

4Ia ni sa raica ko Jiova ni sa lako vakatikitiki me dikeva, sa qai kaci vua na Kalou mai na loma ni kau, ka kaya, I Mosese, i Mosese. A sa kaya ko koya, Raica, koi au.

5A sa kaya ko koya, Mo kakua ni toro voleka mai kike: mo luvata tani na nomui vava mai na yavamu, ni sa qele tabu na yasana ko sa tu kina.

6Sa kaya talega, Oi au na Kalou ni nomu qase, na Kalou i Eparaama, na Kalou i Aisake, kei na Kalou i Jekope. A sa tabonaka na matana ko Mosese; ni sa rere ni raica na Kalou.

7A sa kaya ko Jiova, Au sa raica dina na nodra rarawa na noqu tamata, era sa tiko mai Ijipita, kaʼu sa rogoca talega na nodra tagi e na vukudra na turaga sa lewa na nodra cakacaka; niʼu sa kila na nodra rarawa:

8ia kaʼu sa lako sobu mai me vakabulai ira mai na ligadra na kai Ijipita, ka me kauti ira cake mai na vanua ko ya ki na vanua e vinaka ka rabailevu, ki na vanua sa dave kina na wai-ni-sucu kei na oni; ki na nodra yasana na kai Kenani, kei na luve i Eci, kei na luve i Amori, kei na lewe ni Veikoro lalai, kei na luve i Evi, kei na kai Jepusa:

9ia o qo, raica, sa lako cake mai vei au na nodra tagi na luve i Isireli: kaʼu sa raica talega na veivakasaurarataki era sa vakasaurarataki ira kina ko ira na kai Ijipita:

10o qo, mo ia talega, au na talai iko vei Fero, mo kauti ira tani kina na noqu tamata na luve i Isireli mai Ijipita.

11A sa kaya vua na Kalou ko Mosese, O cei koi au, meʼu lako kivei Fero, meʼu kauti ira tani talega na luve i Isireli mai Ijipita?

12A sa kaya ko koya, Au na tiko vakaidina kei iko: ia o qo nai vakatakilakila vei iko, niʼu sa talai iko: Ni ko sa kauti ira tani na tamata mai Ijipita, dou na qarava na Kalou e na ulu-ni-vanua o qo.

13A sa kaya vua na Kalou ko Mosese, Raica, niʼu sa lako vei ira na luve i Isireli, ka kaya vei ira, A nodra Kalou na nomudou qase sa talai au vei kemudou; a ra sa kaya vei au, O cei na yacana? a cava meʼu kaya vei ira?

14A sa kaya vei Mosese na Kalou, Sa bula koi au vakai au: a sa kaya, Mo na vosa vakaoqo vei ira na luve i Isireli, O Sa-bula-koi-au sa talai au vei kemudou.

15A sa kaya talega vei Mosese na Kalou, Mo vosa vakaoqo vei ira na luve i Isireli, O Jiova na Kalou ni nomudou qase, a Kalou i Eparaama, a Kalou i Aisake, a Kalou talega i Jekope, sa talai au vei kemudou. O qo na yacaqu ka tawa mudu, ia o qo kaʼu sa nanumi kina e nai tabatamata kecega:

16lako, ka vakasoqoni ira vata na qase ni Isireli, ka kaya vei ira, O Jiova na Kalou ni nomudou qase, a Kalou i Eparaama, ko Aisake, kei Jekope, sa rairai mai vei au, ka sa kaya, Kaʼu sa vaka-raici kemudou vakaidina, kei na ka sa caka vei kemudou mai Ijipita:

17ia kaʼu sa kaya oti, Au na kauti kemudou cake mai na rarawa ni Ijipita, ki na nodra vanua na kai Kenani, kei na luve i Eci, kei na luve i Amori, kei na lewe ni Veikoro lalai, kei na luve i Evi, kei na kai Jepusa, ki na vanua sa dave kina na wai-ni-sucu kei na oni.

18Ta era na rogoca na domomu: ia ko na lako mai, ko iko, kei ira na qase ni Isireli, kivei koya na tui Ijipita, ia dou kaya vua, O Jiova na nodra Kalou na Iperiu sa veitata kei keitou: ia o qo, me bogi tolu mada me keimami lako tiko ki na lekutu, me keimami vakacabora na manumanu vei Jiova na neimami Kalou.

19Ia kaʼu sa kila ena sega ni soli kemudou na tui Ijipita mo dou lako, ka e na liga kaukauwa ga:

20ia kaʼu na dodoka yani na ligaqu, ka yaviti Ijipita e na noqu cakacaka veivakidacalataki kecega, a ya kaʼu na cakava e na vanua ko ya: ka sa oti ena qai laivi kemudou mo dou lako.

21Ia kaʼu na vakayalovinakataki ira na kai Ijipita vei ira na tamata o qo: ia ena yaco ni dou sa lako yani, dou na tawa lako lala:

22ia na alewa kecega ena kerea vua na nona lewe ni koro, vei koya talega sa tiko vulagi kaya, nai yaya siliva, kei nai yaya koula, kei nai sulu: ia dou na vakaisulutaki ira kina na nomudou goneatagane, kei na nomudou gonealewa; ia dou na tokitaka na nodra yau na kai Ijipita.