Na Lako Yani 2 - AI VOLA TABU（FIJ1864）

Sa sucu ko Mosese, a sa vuni ka vula tolu, sa qai vakotori e na waqa lailai, ka biu ki na uciwai, 1-4. Sa kunei koya na luvena alewa ko Fero, ka susuga me luvena, 5-10. Sa yavita e dua na kai Ijipita ko Mosese, ka qai dro ki Mitiani, 11-22. Era tagi vei Jiova na luve i Isireli e na vuku ni nodra rarawa, 23-25.

1A SA lako e dua na tamata e na mataqali i Levi, ka kauta e dua na luve i Levi me watina.

2A sa kunekune na alewa, ka vakasucuma na luvena tagane: ia ni sa raica ni sa matavinaka ko koya, sa vunia ka tolu na vula.

3Ia ni sa sega ni vunia rawa tiko, sa cakava vua e dua na waqa kuta, ka boroya e na qele dregadregata kei nai boro, ka vakotora kina na gone; a sa virikotora e na loma ni veikuta mai na bati ni uciwai.

4A sa tu vakayawa na ganena, me kila se cava na ka ena yaco vua.

5A sa lako sobu na luvena alewa ko Fero, me sili e na uciwai; a ra sa gade voli na nona vada mai na bati ni uciwai; ia ni sa kunea ko koya na waqa e na veikuta, sa tala na nona vada me kauta mai.

6Ia ni sa dolava, sa kunea na gone; ka, raica, sa goneatagane e tagi. A sa lomani koya, ka kaya, O qo e dua na luvedra na Iperiu.

7Sa qai kaya na ganena vua na luve i Fero, Meʼu lako meʼu kaciva mai vei iko e dua na alewa dau-susu gone maivei ira na alewa Iperiu, me susuga vei iko na gone, ne?

8A sa kaya vua na luve i Fero, Lako. A sa lako na gonealewa ko ya, ka kaciva mai na tinana na gone ko ya.

9A sa kaya vua ko koya na luve i Fero, Mo kauta na gone o qo, ka susuga me noqu, kaʼu na solia vei iko na kemui voli. A sa kauta na gone na alewa, ka susuga.

10A sa tubu na gone, a sa kauti koya na alewa ki na luve i Fero, a sa yaco me luvena. A sa vakayacana ko Mosese: a sa kaya, E na vuku niʼu a yavia mai na wai.

11A sa yaco e na gauna ko ya, ni sa tubu ko Mosese, sa qai lako yani vei ira na wekana, a sa vakaraica na nodra lesi bibi: a sa kunea e dua na kai Ijipita ni sa yavita tiko e dua na Iperiu, e dua vei ira na wekana.

12A sa veiraiyaki, ka raica ni sa sega na tamata, sa qai mokuta na kai Ijipita, ka vunia e na nuku.

13A sa lako yani e na siga kadua, ka raica, erau sa veivala e rua na tamata Iperiu: a sa kaya vua sa caka cala, A cava ko sa yavita kina na wekamu?

14A sa kaya ko koya, O cei sa lesi iko mo turaga mo mai lewai keimami? o sa via vakamatei au beka, me vaka ko a vakamatei koya na kai Ijipita? Sa qai rere ko Mosese, ka kaya, Sa dina ga ni sa kilai na ka o qori.

15A sa rogoca na ka o qori ko Fero, a sa qai vakasaqara me vakamatei Mosese. A sa drotaka na mata i Fero ko Mosese, ka sa tiko e na vanua ko Mitiani: a sa tiko voleka ki nai keli-wai.

16Ia na bete mai Mitiani, sa vitu na luvena alewa: a ratou sa lako mai ka taki, ka vakasinaita na takona, me vagunuva na sipi i tamadra-tou.

17A ra sa lako mai na dauvakani manumanu, ka vakasevi iratou yani: ia sa qai tu cake ko Mosese, ka totaki iratou, ka vagunuva na nodratou sipi.

18Ia ni ratou sa lako kivei Riueli na tamadratou, sa kaya ko koya, E vakaevei ni dou sa tale vakasauri mai vakaoqo edaidai?

19A ratou sa kaya, E dua na kai Ijipita sa vakabulai keitou mai na ligadra na dauvakani manumanu, ka taki talega me rauti keitou, ka vagunuva na sipi.

20A sa kaya ko koya vei iratou na luvena alewa, Ka sa evei ko koya? e vakaevei o qo ni dou sa biuta na tamata? kacivi koya mai, me mai kania na kakana.

21A sa leca ga vei Mosese me tiko kaya na tamata: a sa musuki Sipora na luvena vei Mosese.

22A sa vakasucuma e dua na luvena tagane, ia ko Mosese sa vakayacana ko Kerisomi: ni sa kaya, Au a tiko vulagi e na vanua e sega ni noqu.

23IA ni sa oti na yabaki e vuqa, sa qai mate na tui Ijipita; a ra sa vutugu na luve i Isireli e na vuku ni vakasaurarataki, a ra sa tagi; a sa lako cake vua na Kalou na nodra tagi, e na vuku ni vakasaurarataki.

24A sa rogoca na nodra vutugu na Kalou, a sa nanuma na Kalou na nona vosa ni yalayala vei Eparaama, vei Aisake, kei Jekope.

25A sa raici ira na luve i Isireli na Kalou, a sa golevi ira na Kalou.