Na Lako Yani 1 - AI VOLA TABU（FIJ1864）

A WASE I. —Era sa tubu me lewe vuqa na kawa i Isireli mai Ijipita, 1-7. Sa vakacacani ira ko ira na kai Ijipita, ka vakamatea na luvedra tagane, 8-22.

1IA o qo na yacadra na luve i Isireli, ka ra lako mai ki Ijipita kei Jekope; a tamata yadua kei na nona lewe-ni-vale sa lako mai:

2ko Rupeni, ko Simioni, ko Levi, kei Juta,

3ko Isakari, ko Sepuloni, kei Penijamini,

4ko Tani, kei Nafitali, ko Kata, kei Aseri.

5Ia na tamata kecega sa lako mai na saga i Jekope era lewe vitusagavulu: ia ko Josefa, sa tiko eliu mai Ijipita.

6A sa mate yani ko Josefa, kei na veitacini kecega, kei nai tabatamata kecega ko ya.

7A ra sa vakaluveni na luve i Isireli, ka tubu vakalevu, ka lewe vuqa mai, ka tubu me kaukauwa vakalevu sara; a sa sinai na vanua vei ira.

8A sa tubu e dua na tui vou me lewai Ijipita, ka tawa kilai Josefa.

9A sa kaya ko koya vei ira na nona tamata, Raica, ko ira na tamata era luve i Isireli era sa lewe vuqa ka kaukauwa, ia koi keda sa lewe lailai ka malumalumu:

10tou ia, tou cakacaka vaqaseqase vei ira; de ra tiko lewe vuqa mai, ia ni na sa yaco e dua nai valu, ena qai laʼki to taki ira na noda meca ko ira talega, ka veivala kei keda, ka lako cake tani e na vanua o qo.

11A ra sa qai lesia e so na turaga me lewa na nodra cakacaka, me vakasaurarataki ira e na nodra lesi bibi. A sa tara ko ira me nei Fero na koro ni yau, ko Picomi kei Reemisesi.

12Ia me vaka na nodra vakasaurarataki ira, era sa lewe vuqa mai kina, ka tubu tiko. A ra sa rarawa, e na vukudra na luve i Isireli:

13ia ko ira na kai Ijipita, era sa kitaki ira na luve i Isireli me ra vakasaurarataki ni ra cakacaka:

14a ra sa vakagagataka na nodra bula e na vakabobulataki rarawa, e na lase, kei na vatu-buli, kei na cakacaka kecega e na were; io na nodra cakacaka kecega sa ra kitaki kina me ra cakava, ni ra sa vakasaurarataki.

15A sa vosa na tui Ijipita vei rau sa tina-ni-gone vei ira na Iperiu: a yacana e dua ko Sifira, a sa yacana nai kadua ko Pua:

16a sa kaya, Ni dou sa tina-ni-gone vei ira na Iperiu, dou raica na sedre vatu; ke sa goneatagane, dou qai vakamatea: ia ke sa gonealewa, me bula ga.

17A ratou sa rerevaka na Kalou na tina-ni-gone, ka tawa kitaka me vaka ka vosa vei rau ko na tui Ijipita: a ratou sa vakabulai ira na goneatagane.

18A sa kacivi rau na tina-ni-gone ko na tui Ijipita, a sa kaya vei rau, A cava dou sa cakava kina na ka o qo, ka me vakabulai ira na goneatagane?

19A rau sa kaya vei Fero na tina-ni-gone, Era sa sega dina ni vakai ira na alewa ni Ijipita, ko ira na alewa Iperiu; ni ra sa kaukauwa; era sa vakasucu ni sa bera na tina-ni-gone ni curu vei ira.

20A sa caka vinaka kina na Kalou vei iratou na tina-ni-gone: a ra sa lewe vuqa na tamata, ka tubu me kaukauwa sara.

21Ia e na vuku ni ratou sa rerevaka na Kalou na tina-ni-gone, ka cakavi ira na tamata ko koya me vakaluveni;

22sa qai vunauci ira na nona tamata kecega ko Fero, ka kaya, A goneatagane kecega sa sucu mai, dou biuta laivi ki na uciwai, ia na gonealewa kecega dou Vakabula.