Nai Vakatekivu 50 - AI VOLA TABU（FIJ1864）

Era tagicaki Jekope, ka kauta ki Kenani me dui buluta, 1-14. Sa vakacegui ira na tuakana ko Josefa, ni ra sa rerevaki koya, 15-21. Ni sa kolai mate ko Josefa, sa kaya me ra kauta ki Kenani na suina, 22-26.

1A sa baleta na mata i tamana ko Josefa, ka tagicaka, ka reguca.

2A sa vakaroti ira na nona tamata era vu-ni-wai ko Josefa, me ra vakasosoga na tamana e na ka boi vinaka: a ra sa vakasosogi Isireli kina ko ira na vu-ni-wai.

3A sa oti na nona bogi e vasagavulu; ni sa dauoti vakakina na nodra bogi era sa vakasosogi e na ka boi vinaka; a ra sa tagicaki koya na kai Ijipita, ka bogi vitusagavulu.

4Ia ni sa oti na bogi era a tagicaki koya kina, sa qai vosa ko Josefa vei ira na lewe-ni-vale i Fero, ka kaya, Kevaka kemudou sa lomani au, dou vosa mada e na daliga i Fero, ka vaka,

5Sa kitaki au na tamaqu meʼu vosavavakini, ka vaka, Raica, kaʼu mate: na noqui bulubulu kaʼu a kelia me noqu e na vanua mai Kenani, mo buluti au kina. Meʼu lako cake mada meʼu buluti tamaqu, kaʼu na lesu mai.

6A sa kaya ko Fero, Mo lako cake ka buluti tamamu, me vaka ka kitaki iko mo vosavavakini kina.

7A sa lako cake ko Josefa me buluti tamana: a ra sa lako cake kaya na tamata kecega i Fero, na qase e nona vale, kei ira kecega na qase e na vanua ko Ijipita,

8kei ira kece na lewe-ni-vale i Josefa, kei ira na veitacini, kei na lewe-ni-vale i tamana,: a nodra lalai ga, kei na nodra sipi, kei na nodra karavau, era sa biuta laivi e na vanua ko Koseni.

9A ra sa lako cake kaya na vale-vodoki, kei ira sa vodoka na ose: a sai vavakoso levu sara.

10A ra sa yacova na rara ni buturaki sila i a nei Atati, a ya mai tai kadua mai Joritani, a ra sa tagi maikina e na tagi levu ka rarawa sara: a sa ia ko koya na tagi e na vuku i tamana ka bogi vitu.

11Ia ni ra sa raica ko ira na lewe ni vanua, na kai Kenani, na tagi mai na rara ni buturaki sila a nei Atati, era sa kaya, O qo e dua na nodra tagi rarawa na kai Ijipita: o koya sa vakatokai kina na yacana ko Apeli-Misireimi, ko ya mai tai kadua mai Joritani.

12A ra sa kitaka vua na luvena me vaka ka vakarota vei ira:

13a ra sa kauta ki na vanua ko Kenani, ka buluta e na qara-vatu e na tiki-ni-vanua ko Makipila, sa donui Mamire, a ya ka volia ko Eparaama, kei na tiki-ni-vanua, me nona vanua me mara, vei Efironi na luve i Eci.

14Ia ni sa buluti tamana oti, sa lesu ki Ijipita ko Josefa, ko koya, kei ira na veitacini, kei ira kecega era lako cake kaya me buluti tamana.

15IA ni ra sa raica na tuaka i Josefa ni sa mate na tamadra, era sa qai kaya, Ena cati keda beka ko Josefa, ka sauma dina na ka ca kecega eda a kitaka vua.

16A ra sa tala e dua vei Josefa, me kaya, O tamamu, ni sa bula tiko, sa vakarota, ka kaya,

17Dou vosa vakaoqo vei Josefa, Au masuti iko, mo kakua mada ni sauma na nodra caka cala na tuakamu, kei na nodrai valavala ca; ni ra a caka ca vei iko: ia o qo, mo kakua mada ni sauma na nodra caka cala na nona tamata na Kalou i tamamu. A sa tagi ko Josefa ni ra sa vosa vua.

18A ra sa lako na tuakana talega, ka bale e matana; a ra sa kaya, Raica, koi keitou na nomu tamata.

19A sa kaya vei ira ko Josefa, Dou kakua ni rere: oi au li nai karua ni Kalou?

20ia koi kemudou, dou a nanuma ca vei au; sa nanuma na Kalou me vinaka, me vakayacora me vaka: edaidai, ka me vakabula na tamata e lewe vuqa:

21ia o qo, dou kakua mada ni rere: oi au, kaʼu na vakani kemudou, kei ira na nomudou lalai. A sa vakalecataki ira, ka vosa ki lomadra.

22A sa tikotiko mai Ijipita ko Josefa, ko koya, kei na mataqali i tamana; a sa bula ko Josefa ka dua na drau ka mani tini na yabaki.

23A sa raica na kawa i Ifireimi ko Josefa, ka yacova nai katolu ni tabatamata: a luve i Mekiri talega, na luve i Manase, sa susugi e na duru i Josefa.

24A sa kaya vei ira na veitacini ko Josefa, Oi au, kaʼu mate: ia na Kalou, ena talevi kemudou vakaidina, ka kauti kemudou cake tani e na vanua o qo ki na vanua sa vosavavakini kina ko koya kivei Eparaama, kivei Aisake, kei Jekope.

25A sa kitaki ira na luve i Isireli ko Josefa me ra vosavavakini, ka kaya, Ena talevi kemudou vakaidina na Kalou, ia dou kauta cake tani eke na suiqu.

26A sa ciba ko: Josefa, ni sa dua na drau ka tini na nona yabaki: a ra sa vakasosoga e na ka boi vinaka, ka virino ki loma ni dua na kato mai Ijipita.