Nai Vakatekivu 49 - AI VOLA TABU（FIJ1864）

Sa vosavakalougatataki ira yadua na luvena ko Jekope, 1-28. Sa kaya me bulu vata kei Eparaama, a sa qai mate, 29-33.

1A SA kacivi ira na luvena ko Jekope, a sa kaya, Dou soqoni vata, meʼu tukuna vei kemudou na ka ena yacovi kemudou e na gauna maimuri:

2dou soqoni vata mai, ka vakarorogo, na luve i Jekope; ia dou rogoci Isireli na tamamudou.

3I Rupeni, o iko na noqu ulumatua, na noqu qaqa, kei nai vakatekivu ni noqu kaukauwa, sa uasivi e na vakaturaga, ka uasivi e na kaukauwa:

4sa tawa tarovi e vaka na wai, ka ko na tawa uasivi cake; e na vuku ni ko a cabeta nai mocemoce i tamamu; o a qai vakasisilataka:— sa cabeta ko koya na noqui davodavo.

5Erau veitacini ko Simioni kei Levi; ai yaragi ni veivakasaurarataki na nodraui yalayala:

6na yaloqu, mo kakua ni curuma na nodrau vere vuni; na yamequ, mo kakua ni dua vata kei na nodraui soqo-soqo: ni rau a vakamatea na tamata e na nodrau cudru, ka vakalokilokitaka na karavau e na nodrau lomaqa:

7me cudruvi na nodrau cudru, ni sa kaukauwa; kei na nodrau cudru waqawaqa, ni sa dauveituri-sautaki: au na tawasei rau e Jekope, ka dui biubiuti rau e Isireli.

8I Juta, o iko era na vakavinavinaka kina na veitacini: a ligamu ena boboka na domodra na nomu meca; era na cuva vei iko na luve i tamamu.

9A luve ni laioni ko Juta; o sa lako cake, na luvequ, ni ko rawa na kemu:— sa lako roko ko koya, sa koto me vaka na laioni, ia ka vaka na laioni qase; o cei me vakacudruya?

10Ena sega ni lako tani vei Juta nai titoko vakaturaga, se na turaga ni lewa maivei ira na nona kawa, ka me lako mada mai ko Silo, ko koya era na talai-rawarawa kina na veimataqali.

11Ena nokata ko koya na nona asa ki na vaini, kei na nona luve ni asa ki na vaini talei; ena vuya na nonai tutuvi e na waini, kei na nonai sulu e na dra ni vua-ni-vaini:

12ena damudamu na matana e na waini, ka vulavula na batina e na wai-ni-sucu.

13O Sepuloni, ena tiko mai na toba mai waitui: ia ena tiko ko koya mai na toba ni waqa; ia ena yacori Saitoni na nonai yalayala.

14O Isakari, na asa kaukauwa, sa koto sobu e na maliwa ni ka colati e rua:

15a sa kunea ko koya ni sa vinaka na vakacegu, ka ni sa ka me marautaki na vanua; a sa solia na tabana me colacola, a sa dau-qarava nai vakacavacava.

16O Tani, ena lewai ira na nona tamata, me vaka e dua vei ira na mataqali i Isireli.

17O Tani ena gata e na bati ni sala, a gata daukata e na bati ni salatu, a ya sa katia na bukubuku-ni-yava ni ose, a sa lutu kimuri kina ko koya sa vodoka.

18Au sa waraka oti na bula maivei iko, i Jiova!

19O Kata, ena gumatua vua e dua na matai valu: ia ni sa oti, ena qai gumatua ko koya.

20O Aseri, ena uro na magiti mai nona, ena vuataka talega ko koya na kakana talei vaka turaga.

21O Nafitali, sa koti kila sa taseri; sa vuataka ko koya na vosa me marautaki.

22O Josefa, sa taba ni kau dauvua, io na taba ni kau dauvua e na bati ni mata-ni-wai; sa salava na dela ni bai-vatu na tabana.

23A ra sa dauvakararawataki koya na dauvavana, ka vana, ka cati koya:

24ia sa kaukauwa tiko ga na nona dakai, a sa vakaukauwataki na taba ni ligana, e na ligana na Kaukauwa i Jekope. Maikina, mai nai Vakatawa, na Uluvatu i Isireli;

25mai na Kalou i tamamu, o koya ena vukei iko; o koya sa Kaukauwa talega, o koya ena vakalougatataki iko; me yaco na ka veivakalougatataki mai lomalagi ecake, na ka veivakalougatataki mai na titobu sa koto era, kei na ka veivakalougatataki ni sucu kei na kete:

26na vosavakalougatataka i tamamu sa levu cake e na ka veivakalougatataki mai na veiulu-ni-vanua tawa mudu; ka yacova na ka domoni mai na veiulu-ni-vanua e tawa oti rawa: ena tauca na ulu i Josefa, kei na buradelana ka tawase maivei ira na tuakana.

27O Penijamini, ena daukata me vaka na wolifa: ena kania e na sabogibogi na kena sa rawa, ka vota e na yakavi nai toki.

28O ira kecega o qo na mataqali i Isireli e tinikarua: ia o qo na ka sa vosataka vei ira ko tamadra, ni sa vosavakalougatataki ira; sa vosavakalougatataki ira yadua me vaka na ka era dui kalougata kina.

29A sa vakaroti ira, ka kaya vei ira, Au sa na soqoni vata kei ira na kai noqu: dou buluti au kei ira na tamaqu e na qara-vatu mai na tiki-ni-vanua i Efironi na luve i Eci;

30e na qara-vatu a ya e na tiki-ni-vanua ko Makipila, a ya sa donui Mamire, mai na vanua ko Kenani, ko ya sa volia ko Eparaama, kei na tiki-ni-vanua, vei Efironi na luve i Eci, me nona vanua me mara.

31Era a buluti Eparaama kina, kei Sera na watina; era a buluti Aisake kina, kei Repeka na watina; kaʼu a buluti Lia talega kina:

32a tiki-ni-vanua ko ya, kei na qara-vatu sa koto kina, sa voli maivei ira na luve i Eci.

33Ia ni sa vakaotia ko Jekope na vakaroti ira na luvena, sa yavia cake na yavana ki nai mocemoce, ka ciba yani, a sa soqoni vata vei ira na kai nona.