Nai Vakatekivu 42 - AI VOLA TABU（FIJ1864）

Sa lako ki Ijipita na tuaka i Josefa me voli kakana, 1-28. Era tukutuku vei Jekope, 29-34. Sa rarawa ko Jekope e na vuku ni luvena sa yali, 35-38.

1IA ni sa raica ko Jekope ni sa tiko na sila mai Ijipita, sa kaya ko Jekope vei ira na luvena, A cava dou sa veiraici tu kina?

2Sa kaya talega ko koya, Raica, kaʼu sa rogoca ni sa tiko na sila mai Ijipita dou lako sobu kina, ka volia na keda maikea: me da bula ka tawa mate kina.

3A ra sa lako sobu na tuaka i Josefa e tini, me voli sila mai Ijipita.

4Ia ko Penijamini, na taci i Josefa, sa tawa tala vata kei na tuakana ko Jekope; ni sa kaya, De yacovi koya e dua na ca.

5A ra sa lako vata na luve i Isireli kei ira sa lako: ni sa dausiga na vanua ko Kenani.

6Ia ko Josefa sa lewa na vanua, ia sai koya ga sa volitaki sila vei ira kecega na lewe ni vanua: a ra sa lako mai na tuaka i Josefa, ka cuva vua ki na qele.

7A sa raici ira na tuakana ko Josefa, a sa kilai ira, a sa valavala vakatani vei ira, ka vosa vakaukauwa vei ira; ka kaya vei ira, Dou sa lako maivei? A ra sa kaya, Mai na vanua ko Kenani, me voli kakana.

8A sa kilai ira na tuakana ko Josefa, a ra sa sega ni kilai koya.

9A sa nanuma ko Josefa na tadra ka tadrai ira kina ko koya, a sa kaya vei ira, Kemudou na yamata; dou sa lako mai me raica na dravudravua ni vanua.

10A ra sa kaya vua, E segai, noqu turaga; era sa lako mai na nomu tamata me voli kakana ga:

11oi keitou kece na luvena na tamata e lewe dua; keitou sa dina; era sega ni yamata na nomu tamata.

12A sa kaya vei ira ko koya, E segai; dou sa lako ga mai me raica na dravudravua ni vanua.

13A ra sa kaya, A nomu tamata, era lewe tinikarua na veitacini; keitou na luvena e dua na tamata mai na vanua ko Kenani: ka, raica, ko koya sa gone sa tiko edaidai kei na tama i keitou, ka dua sa yali.

14A sa kaya vei ira ko Josefa, Sai koya ga kaʼu a vosa kina vei kemudou, ka kaya, Kemudou na yamata:

15kemudou na vakatovolei e na ka o qo; Me vaka sa bula ko Fero, dou na tawa lako tani eke, kevaka sa tawa lako mai kike na tacimudou sa gone:

16dou tala e dua vei kemudou, me kauta mai na tacimudou, ia koi kemudou, dou na vesuki, me vakatovolei kina na nomudou vosa, se kemudou dina, se segai: ia kevaka e segai, sa qai dina ni kemudou sa yamata, me vaka sa bula ko Fero.

17A sa vakacurumi ira vata me ra sogoti kina ka me bogi tolu mada.

18Ia e na kenai katolu ni siga, sa qai kaya vei ira ko Josefa, Dou cakava na ka o qo, mo dou bula; (au sa rere vaka na Kalou:)

19Kevaka kemudou sa dina, me dua vei kemudou na veitacini me vesuki tiko e na vale kemudou sa sogoti kina: ia koi kemudou, dou laʼki kauta na sila ni ra dausiga na lewe ni nomudou veivale:

20ia dou kauta ga mai vei au na tacimudou sa gone; ena qai vakadinadinataki na nomudou vosa, ia dou na tawa mate kina. A ra sa kitaka vakakina.

21A ra sa veikayaki vakai ira, Eda sa cala vakaidina e na vuku ni tacida, ni da a raica na rarawa ni yalona, ni ka vakamasuti keda, ia eda a tawa vakarogoca; o koya o qo sa yacovi keda kina na rarawa o qo.

22A sa vosa vei ira ko Rupeni, ka kaya, Au a sega beka ni vosa vei kemudou, ka kaya, Dou kakua ni caka ca vua na gone? ia dou a tawa rogoca: raica, sa tarogi talega kina na kena dra.

23A ra sa tawa kila ni sa kila ko Josefa; ni sa tiko vei ira na tamata veisaui vosa.

24A sa lako tani vei ira ko koya, ka tagi; a sa lesu vei ira, ka veivosaki kei ira, a sa kauti Simioni tani vei ira, ka vauca e matadra.

25A sa vakarota ko Josefa me vakasinaiti na nodra taga e na sila, ka vakasukai na nonai lavo na tamata yadua ki na nona taga, ka soli vei ira nai vaqa ni gau-ni-sala: a sa cakacaka vakaoqo vei ira ko koya.

26A ra sa vakavodoka na nodra sila ki na nodra asa, ka lako tani maikea.

27Ia e dua sa sereka na nona taga e na bure me vakania, na nona asa, a sa kunea na nonai lavo; ka, raica, sa tiko e na gusu ni nona taga.

28A sa kaya vei ira na veitacini, A noqui lavo sa vakasukai; ka, raica, sa tiko e na gusu ni noqu taga. A sa waicala na yalodra, a ra sa rere vata, ka kaya, A ka cava o qo sa cakava vei keda na Kalou?

29A ra sa lako mai vei Jekope na tamadra ki na vanua ko Kenani, ka tukuna vua na ka kecega ka yacovi ira; ka kaya,

30O koya na tamata sa turaga ni vanua, sa vosa vakaukauwa vei keitou, ka kaya ni keitou sa yamata na vanua:

31ia keitou a kaya vua, Keitou sa dina; keitou sa sega ni yamata:

32oi keitou na veitacini e lewe tinikarua, na luvena na tama i keitou: e dua sa yali, ia ko koya sa gone sa tiko edaidai kei na tama i keitou, e na vanua ko Kenani.

33A sa kaya vei keitou na tamata, ko koya sa turaga ni vanua, A ka o qo kaʼu na kila kina ni dou sa dina; dou laiva e dua vei kemudou na veitacini me tiko kei au, ia koi kemudou, dou kauta na kedra na lewe ni nomudou veivale e na dausiga, dou qai ia na lako:

34ia dou kauti koya mai na tacimudou sa gone: au na qai kila ni dou sa sega ni yamata, ni dou sa dina ga: au na qai solia vei kemudou na tacimudou, ia dou na qai mai dauveivoli e na vanua.

35Ia ni ra sa vakalalataka na nodra taga, raica, sa tiko na nonai wolowolo lavo na tamata yadua e na nona taga: ia ni ra sa raica kei tamadra nai wolowolo lavo, era sa rere.

36A sa kaya vei ira ko Jekope na tamadra, Dou sa vakayali iratou na luvequ: sa yali ko Josefa, ka sa yali ko Simioni, ia dou na kauti Penijamini: sa meca vei au na ka kecega o qo.

37A sa vosa vei tamana ko Rupeni, ka kaya, Mo vakamatei rau na luvequ, kevaka kaʼu sa sega ni kauti koya mai vei iko: mo laiva vei au, kaʼu na kauti koya tale mai vei iko.

38A sa kaya ko koya, Ena tawa lako sobu kei kemudou na luvequ; ni sa mate na tuakana, a sa vo duaduaga ko koya: kevaka sa yacovi koya na ca e na sala dou sa lako kina, dou na qai vakayacora e na rarawa na noqu sika ki nai bulubulu.