1A SA yaco ni sa oti vinaka e rua na yabaki, sa qai tadra ko Fero: ka, raica, sa tu mai na uciwai.
2Ka, raica, sa lako cake mai na uciwai e vitu na kou, sa vatukai vinaka, ka sa uro na lewedra; a ra sa kana tiko e veico:
3ka, raica, sa muri ira cake mai e vitu na kou tani mai na uciwai, sa rairai ca, ka sa yali na lewedra; a ra sa tu vata kei ira na kou e na bati ni uciwai:
4ia na kou sa rairai ca ka yali na lewedra, era sa kania na kou e vitu sa rairai vinaka ka uro. A sa yadra mai ko Fero.
5A sa moce ka tadra tale: ka, raica, sa tubu cake e na tolo ni sila e dua e vitu na kena sola, sa tolo levu, ka vinaka:
6ka, raica, sa vitu na sola ca, ka todra e na cagi mai cake, sa tubu cake emuri:
7ia na sola e vitu sa ca sa tiloma na sola e vitu sa tolo levu ka sinai. A sa yadra mai ko Fero ka, raica, sa tadra ga.
8Ia e na sabogibogi sa kidroa na lomana: a sa talaki ka kacivi ira kece mai na daucaka-mana mai Ijipita, kei na tamata vuku kecega sa tiko kina: a sa tukuna vei ira ko Fero na nona tadra; a sa sega me vakaibalebaletaka vei Fero.
9Sa qai vosa vei Fero ko koya sa turaga vei ira sa daucaka mena, ka kaya, Au sa nanuma edaidai na noqu cala:
10sa cudru ko Fero vei rau na nona tamata, ka soli au meʼu sogoti e nona vale na turaga ni valui vakatawa, ko keirau kei na nodra turaga na dauvavavi:
11ia keirau a tadrataka e dua na tadra e na bogi e dua, koi au kei koya; keirau a tadra na tamata yadua me vaka nai balebale ni nona tadra:
12a sa tiko maikea e dua na cauravou, na Iperiu, a sa qarava na turaga ni valui vakatawa ko koya; ia keirau a tukuna vua, a sa vakaibalebaletaka vei keirau na neirau tadra; sa vakaibalebaletaka vei keirau yadua me vaka na neirau tadra:
13ia me vaka sa vakaibalebaletaka vei keirau, sa yaco vakakina; sa vakalesui au ko koya ki na noqu cakacaka, a sa vakalilici koya.
14Sa qai talaki ko Fero me kacivi Josefa mai, a ra sa kauti koya vakasauri mai na vale butobuto: a sa tasi koya, ka suluma nai sulu tani, ka lako kivei Fero.
15A sa kaya vei Josefa ko Fero, Au sa tadrataka e dua na tadra, a sa sega me vakaibalebaletaka: ia kaʼu sa rogoci iko ni ko sa daurogoca na tadra ka mo vakaibalebaletaka.
16A sa vosa vei Fero ko Josefa, ka kaya, Sa sega vei au: a Kalou ga e vosa vinaka rawa vei Fero.
17A sa kaya vei Josefa ko Fero, E na noqu tadra, raica, kaʼu a tu mai na bati ni uciwai:
18ka, raica, sa lako cake mai na uciwai e vitu na kou, sa uro na lewedra, ka vatukai vinaka; a ra sa kana voli e na veico:
19ka, raica, e vitu na kou tani sa muri ira cake mai, sa suivotu, ka vatukai ca sara, ka yali na lewedra; kaʼu sa sega ni raica sa ca vakakina e na vanua kece ko Ijipita:
20ia na kou sa suivotu ka yagoca sa kania na kou e vitu eliu sa uro:
21ia ni sa kania oti, sa dredre ni kilai ni sa kani ira; ni ra sa rairai vakaca tiko, me vaka eliu, Kaʼu a qai yadra.
22Ia kaʼu a qai kunea e na noqu tadra, ka, raica, sa tubu e vitu na sola e na tolo ni sila e dua, sa sinai ka vinaka:
23ka, raica, sa tubu cake emuri e vitu na sola, sa matai ka lalai, e todra e na cagi mai cake:
24ia na sola sa lalai sa tiloma na sola vinaka e vitu: ia kaʼu a tukuna na ka o qo vei ira na daucaka-mana; a sa sega e dua sa tukuna rawa vei au.
25A sa kaya vei Fero ko Josefa, A tadra i Fero sa dua ga: sa tukuna vei Fero na Kalou na ka sa voleka ni cakava ko koya.
26A kou vinaka e vitu sa yabaki e vitu; kei na sola vinaka e vitu sa yabaki e vitu: sa dua ga na tadra:
27ia na kou e vitu sa suivotu ka yagoca sa muri ira cake mai, sa yabaki e vitu; kei na sola e vitu sa lala e todra e na cagi mai cake, ena yabaki dausiga e vitu.
28O qo na ka kaʼu sa kaya vei Fero: na ka sa voleka ni cakava na Kalou sa vakatakila vei Fero.
29Raica, ena lako mai e vitu na yabaki vakalewe sara e na vanua kece ko Ijipita:
30ia ena qai yaco emuri e vitu na yabaki dausiga; ia na sautu kece ena guilecavi e na vanua ko Ijipita; ni na kania na vanua na dausiga;
31ia ena tawa kilai na sautu e na vanua, e na vuku ni dausiga ko ya sa muri mai; ni na ka rerevaki sara.
32Ia ni sa vakania vei Fero na tadra, ka ni sa vakataudeitaka na Kalou, ia sa tawa dede ena qai vakayacora na Kalou.
33O koya o qo me qara mada ko Fero e dua na tamata yalomatua ka vuku, ka lesia me lewa na vanua ko Ijipita.
34Me ia ko Fero, ka lesia e so na matanivanua me lewa na vanua, ka kumuna nai kalima e na vanua ko Ijipita e na veiyabaki vakalewe e vitu:
35ia me ra kumuna vata na kakana kecega e na veiyabaki vinaka ena lako mai, ka binia na sila me lewa ko Fero, me ra maroroya talega na kakana e na veikoro.
36Ia na kakana ko ya ena maninitaki me kena na vanua e na veiyabaki dausiga e vitu, a ya ena yaco e na vanua ko Ijipita; a me kakua ni kawaboko na vanua e na dausiga.
37A sa vinaka na ka o qo vei Fero, kei ira na nona tamata kecega.
38A sa kaya ko Fero vei ira na nona tamata, Eda na kunea li e dua vakaoqo, a tamata sa tiko vua na yalo ni Kalou?
39A sa kaya vei Josefa ko Fero, E na vuku ni sa vakatakila vei iko na Kalou na ka kecega o qo, sa sega e dua sa yalomatua ka vuku me vakataki iko:
40ko na turaga e na noqu vale, ia era na lewai na noqu tamata kecega e na nomu vosa: e nai tikotiko-vakaturaga duaduaga kaʼu na levu cake vei iko.
41Sa kaya tale vei Josefa ko Fero, Raica, kaʼu sa lesi iko mo lewa na vanua kecega ko Ijipita.
42A sa luvata mai na nona mama ko Fero mai na ligana, ka daramaka kina na liga i Josefa, ka vakaisulutaki koya e na malo matailalai, ka vakataubena e na sinucodo koula;
43a sa vakavodoka me lako e nai karua ni nona vale-vodoki; a ra sa kacivaka lako e matana, Mai cuva: a sa lesi koya me lewa na vanua kecega ko Ijipita.
44A sa kaya vei Josefa ko Fero, Oi au ko Fero, ia ena sega na tamata me laveta na ligana se na yavana e na vanua kecega ko Ijipita, ka e na nomu lewa ga.
45A sa vakatoka na yaca i Josefa ko Fero ko Safinaci-pianea; a sa soli Asenaca vua me watina, o koya na luve i Poti-fera na bete mai Oni. A sa lako voli yani ko Josefa e na veiyasana kecega mai Ijipita.
46A SA tolusagavulu na yabaki i Josefa, ni sa tu e na mata i Fero na tui Ijipita. A sa lako tani e na mata i Fero ko Josefa, ka lako voli yani e na veiyasana kecega mai Ijipita.
47Ia e na yabaki vakalewe e vitu sa vuavua na vanua ka sinai kina na liga.
48A sa kumuna vata na kakana kecega e na yabaki e vitu, sa yaco e na vanua ko Ijipita, ka binia na kakana e na veikoro: na kakana ni veiwere sa volita e dua na koro, sa binia kina ko koya.
49A sa binia na sila ko Josefa me vaka na nuku mai na matasawa, na ka levu sara, ka qai tawa wilika tiko; ni sa tawa wili rawa.
50A sa sucu vei Josefa e rua na luvena tagane ni sa tawa yaco na veiyabaki dausiga; a ya ka vakasucuma vua ko Asenaca, na luve i Poti-fera na bete mai Oni.
51A sa vakatoka ko Josefa na yaca ni ulumatua ko Manase; ka kaya, Ni sa cakavi au na Kalou meʼu guilecava na noqu oca kecega, kei na lewe-ni-vale kece i tamaqu.
52A sa vakatoka na yacana nai karua ko Ifireimi; ka kaya, Ni sa cakavi au na Kalou me vakaivakawa e na vanua ni noqu rarawa.
53A sa oti na yabaki vakalewe e vitu e na vanua ko Ijipita.
54A sa vakatekivu me yaco na veiyabaki dausiga, me vaka ka kaya ko Josefa: a sa kania na vanua kecega na dausiga; a sa tiko na kakana e na vanua kecega ko Ijipita.
55Ia ni sa viakana sara na vanua kecega ko Ijipita, era sa qai tagi vei Fero na tamata me soli kedra: a sa kaya ko Fero vei ira na kai Ijipita kecega, Dou lako vei Josefa; a ka sa kaya vei kemudou, dou cakava.
56A sa tiko na dausiga e na dela ni vanua kecega: a sa dolava na lololo kecega ko Josefa, ka volitaki sila vei ira na kai Ijipita; a sa gumatua mai na dausiga e na vanua ko Ijipita.
57A sa lako mai ki Ijipita vei Josefa na lewe ni vanua kecega me voli sila; e na vuku ni sa gumatua na dausiga e na vanua kecega.
Who We AreWhat We EelieveWhat We Do
2025 by iamachristian.org,Inc All rights reserved.
