Nai Vakatekivu 40 - AI VOLA TABU（FIJ1864）

E rua na tamata i Fero sa vakacurumi ki na vale ni veivesu, 1-4. Erau tadra, a sa vakatoka a ko Josefa nai balebale ni nodrau tadra, 5-19. Sa yaco na ka sa tukuna vei rau ko Josefa, 20-23.

1A SA oti na ka o qori, sa qai cudruvi rau na nodrau turaga na tui Ijipita, o koya sa daucaka mena vua na tui Ijipita, kei koya sa dauvavavi.

2A sa cudru ko Fero vei rau e lewe rua na nona matanivanua, vei koya sa turaga vei ira sa daucaka mena, kei koya sa turaga vei ira sa dauvavavi.

3A sa soli rau me rau sogoti e nona vale na turaga ni valui vakatawa, e na vale ni veivesu, na yasana sa vesuki tu kina ko Josefa.

4Ia na turaga ni valui vakatawa sa lesi Josefa me tiko vei rau, a sa qaravi rau ko koya: a sa dede ni ratou sa sogoti tiko.

5A rau a tadrataka na tadra koi rau ruarua, na tamata yadua na nona tadra e na bogi e dua, na tamata yadua me vaka nai balebale ni nona tadra, ko koya ka daucaka mena, kei koya ka dauvavavi, vua na tui Ijipita, erau sa vesuki e na vale ni veivesu.

6A sa curu vei rau e na sabogibogi ko Josefa, ka raici rau, ka, raica, erau sa ki-droa:

7a sa tarogi rau na matanivanua i Fero eratou sa sogoti kaya tiko e na vale ni nona turaga, a sa kaya, A cava drau sa vakaveveku mata kina edaidai?

8A rau a kaya vua, Keirau sa tadrataka na tadra, ka sa sega me vakaibalebaletaka. A sa kaya vei rau ko Josefa, Sa sega beka ni nona na Kalou me vakaibalebaletaka na ka? drau tukuna mada mai vei au na nomu-draui tadra.

9A sa tukuna vei Josefa na nona tadra ko koya ka turaga vei ira sa daucaka ka-gunuvi, a sa kaya vua, E na noqu tadra, raica, sa dua na vaini e mataqu;

10a sa tolu na tabana na vaini: ia ni sa kubu mai, sa seraka na sena, sa vuataka na vua dreu na kena yawa:

11ia e ligaqu na bilo i Fero: ia kaʼu a vetia na vua-ni-vaini, ka lobaka ki na bilo i Fero, kaʼu a qai solia na bilo ki na liga i Fero.

12A sa kaya vua ko Josefa, O qo na kenai balebale: A tabana e tolu sa siga e tolu:

13sa vo ga na bogi e tolu, ena qai vueta na ulumu ko Fero, ka vakalesui iko ki na nomu cakacaka: ia ko na solia na bilo i Fero ki na ligana, me vaka nai valavala eliu ni ko a daucaka mena:

14ia mo nanumi au ni ko na tiko vinaka, ka lomani au mada, ka tukuni au vei Fero, ka kauti au tani e na vale o qo:

15niʼu a butakoci vakaidina mai na nodra vanua na Iperiu; eke talega, sa sega na ka kaʼu sa cakava, me ra biuti au kina ki na vale butobuto.

16Ia ni sa raica na turaga ni vavavi ni sa vinaka na kenai balebale, sa kaya vei i Josefa, Au a tadra talega, ka, raica, sa tolu; na kato vulavula e uluqu:

17ia e na kato sa toka ecake e so na kakana kecega sa dauvavavi me kei Fero; a ra sa mai kania na manumanu mai na kato, mai na uluqu.

18A sa vosa ko Josefa, ka kaya, O qo na kenai balebale: A kato e tolu sa siga e tolu:

19sa vo ga na bogi e tolu, ena qai vueta na ulumu mai delamu ko Fero, ka vakalilici iko e na kau, a ra na kania na lewemu mai na yagomu na manumanu.

20A sa yaco e na kenai katolu ni siga, a ya na siga ni sucu i Fero, ni sa cakava ko koya e dua na solevu vei ira kecega na nona tamata: a sa vueta na uluna na turaga vei ira sa daucaka mena, kei na uluna na turaga vei ira sa dauvavavi, e maliwa ni nona tamata.

21A sa vakalesuya na turaga vei ira sa daucaka mena ki na nona caka mena; a sa solia ko koya na bilo ki na liga i Fero:

22ia ka sa vakalilica na turaga vei ira sa dauvavavi: me vaka ka vakaibalebaletaka vei rau ko Josefa.

23Ia na turaga vei ira sa daucaka ka-gunuvi sa sega ni nanumi Josefa, sa guile-cavi koya ga.