Nai Vakatekivu 39 - AI VOLA TABU（FIJ1864）

Sa tamata yaco mai Ijipita ko Josefa, 1-6. Sa dauveretaki koya na nona marama, ka qai lasutaki koya, 7-18. Sa cudruvi koya na nona turaga, ka vakacuruma ki na vale ni veivesu, 19, 20. A sa tiko kaya ko Jiova, 21-23.

1A SA kauti sobu ki Ijipita ko Josefa; ia ko Potifari, na matanivanua i Fero, ka turaga ni valui vakatawa, a kai Ijipita, sa voli koya vei ira na luve i Isimeeli, era sa kauti koya sobu mai.

2A sa tiko vei Josefa ko Jiova, a sa tamata yaco ko koya; a sa tiko e na vale ni nona turaga na kai Ijipita.

3A sa raica na nona turaga ni sa tiko vua ko Jiova, ka vakayacora vua ko Jiova na ka kecega sa cakava ko koya:

4a sa lomani Josefa, a sa qaravi koya ko Josefa; a sa lesi koya me veitaliataka na nona vale, ka solia ki na ligana na ka kecega sa tu vua.

5Ia mai na siga sa lesi koya kina me veitaliataka na nona vale, kei na nona ka kecega, sa vakalougatataka na nona vale na kai Ijipita ko Jiova e na vuku i Josefa; ia sa vakalougatataka ko Jiova na nona ka kecega e na vale, kei na were.

6A sa laiva na nona ka kecega me lewa ko Josefa; ka sega ni kila ko koya e dua na ka sa tu vua, na kakana ga sa kania ko koya. A sa yagovinaka ka rairai vinaka ko Josefa.

7A sa yaco ni sa oti na ka o qo, ka dau-raici Josefa na wati ni nona turaga; a sa kaya, Daru moce vata.

8A sa bese ko koya, ka kaya ki na wati ni nona turaga, Raica, sa sega ni kila na noqu turaga na ka sa tu vei au e na vale, ka sa solia ki na ligaqu na nona ka kecega;

9sa sega e dua e na vale o qo me levu cake vei au, a sa sega e dua na ka sa bureitaka vei au, o iko duaduaga, ni ko sa watina: au na qai cakava rawa vakaevei na ka ca vakaidina o qo, ka valavala ca vua na Kalou?

10Ia ni sa vosa tikoga vei Josefa e na veisiga kecega, sa sega ga ni rogoci koya ko koya, me moce vata kaya, me rau dua kaya.

11A sa qai dua na siga o qori, sa curu ki vale ko Josefa me kitaka na nona cakacaka, ka sega e dua na tamata vei ira na lewe-ni-vale eloma.

12A sa tauri koya e na nonai sulu, ka kaya, Daru moce vata: a sa biuta na nonai sulu ki ligana ko Josefa, ka dro, ka curu yani kitautuba.

13A sa yaco, ni sa raica ko koya ni sa biuta na nonai sulu ki ligana, ka dro tani,

14sa qai kaci vei ira na tamata era nona lewe-ni-vale, a sa vosa vei ira, ka kaya, Raica, sa kauta mai vei keda ko koya e dua na Iperiu me vakalialiai keda; sa curu mai vei au me keirau moce, ia kaʼu a kaci vakadomoilevu:

15ia ni sa rogoca ko koya niʼu a tabalaka na domoqu, ka kaci, sa qai laiva vei au na nonai sulu, ka dro, ka curu yani kitautuba.

16A sa maroroya kaya na nonai sulu, ka me lako mada mai ki nona vale na nona turaga.

17A sa vosa vua ko koya me vaka na vosa o qo, ka kaya, O koya na Iperiu, nai talatala ko a kauta mai vei keda, sa curu mai vei au me vakalialiai au:

18a sa yaco niʼu a tabalaka na domoqu, ka kaci, sa qai laiva vei au na nonai sulu, ka dro kitautuba.

19Ia ni sa rogoca na nona turaga na vosa ka vosataka vua na watina, ni sa kaya, Sa kitaki au vakaoqo na nomu tamata; sa qai waqa mai na nona cudru.

20A sa kauti koya na turaga i Josefa, ka vakacu-ruma ki na vale ni veivesu, na vale era vesuki tu kina na tamata ka vesuka na turaga levu: a sa tiko maikea e na vale ni veivesu.

21Ia ka sa tiko vei Josefa ko Jiova, ka vakayacora vua na loloma, ka cakava me lomani koya nai vakatawa ni vale ni veivesu.

22Ia ko koya nai vakatawa ni vale ni veivesu sa lesia me lewa ko Josefa na tamata kecega sa vesuki era tiko e na vale ni veivesu; kei na ka kecega era cakava maikina, sa cakava ko koya.

23Ai vakatawa ni vale ni veivesu sa tawa vakaraica e dua na ka sa lewa ko koya; e na vuku ni sa tiko kaya ko Jiova, ka sa vakayacora ko Jiova na ka sa cakava ko koya.