Ai Vakatakila 22 - AI VOLA TABU（FIJ1864）

Sa tukuni na uciwai ni bula, kei na kau ni bula, kei na rarama ni koro ni Kalou, 1-5. Sa tarovi Joni na agilose me kakua ni masu vua, 8, 9. E so tale na ka sa tukuni, a sa qai tinia nai vola ko koya, 10-21.

1SA qai vakatakila mai vei au ko koya na uciwai ni bula, sa makare sese sara me vaka na karisitala na kena wai, sa drodro mai nai tikotiko-vakaturaga ni Kalou kei na Lami.

2E na loma ni kena sala, kei na batina ruarua talega, sa tei kina na kau ni bula, a sa vua vakatinikarua na vuana, a sa vua e na veivula: ia na drau ni kau o qo na medra wai ni bula na lewe ni veivanua.

3Ia era na sega tale ni cudruvi kina: ia ena tu ga kina nai tikotiko-vakaturaga ni Kalou kei na Lami: ia ena qaravi koya ko ira na nona tamata:

4ia era na raica na matana, ia ena volai e na yadredra na yacana.

5Ia ena sega kina na bogi; ena sega talega ni yaga vei ira na cina, se na rarama ni siga; ni sa vakararamataki ira ko na Turaga na Kalou; ia era na turaga tiko ka sega ni mudu.

6A SA kaya ko koya vei au, A vosa o qo sa mana ka dina: ia na Turaga na nodra Kalou na parofita yalosavasava sa tala na nona agilose me vakatakila vei ira na nonai talatala na ka e sa bera ni caka.

7Raica, au sa lako kusarawa mai: sa kalougata ko koya sa taura matua na vosa ni parofisai e nai vola o qo.

8Ia koi au ko Joni au a raica na veika o qo, ka rogoca. Ia niʼu a rogoca oti, ka raica, au a cuva sobu meʼu masu e na yavana na agilose sa vakatakila mai vei au na; veika o qo.

9Sa qai kaya ko koya vei au, Raica mo kakua ga: ni daru sai talatala vata, kei ira talega na wekamu na parofita, kei ira era sa taura na vosa ni vola o qo: mo masu vua na Kalou.

10A sa kaya ko koya vei au, Kakua ni dregata na vosa ni parofisai ni vola o qo: ni sa voleka na kena gauna.

11O koya sa tawa dodonu, me tawa dodonu tikoga: kei koya sa dukadukali, me dukadukali tikoga: kei koya sa dodonu, me dodonu tikoga: kei koya sa yalosavasava, me yalosavasava tikoga.

12Ka raica, au sa lako kusarawa mai; a sa tu ga vei au na ka meʼu ia kina na sauma dodonu, me solia yadua vei koya na tamata me vaka na nonai valavala.

13Oi au na Alifa kei na Omeka, na kenai vakatekivu kei na kenai vakataotioti, na kenai liuliu kei na kenai murimuri.

14Sa kalougata na tamata sa qarava na nona vosa, me ra kania vakaitaukei na kau ni bula, me ra curu e na matamata-ni-koro ki loma ni koro.

15A sa tu etaudaku na veikoli, kei ira era sa daukitaka na ka vakatevoro, kei ira na dauyalewa, kei ira na daulaba, kei ira era sa daumasu ki na veimatakau, kei ira kece era sa vinakata na lasu ka kitaka tiko.

16Oi au ko Jisu kaʼu sa tala na noqu agilose me vakatakila na veika o qo vei kemudou e na veivavakoso lewe ni soro. Oi au na kena vu kei na kawa nei Tavita, kei na kalokalo i vola siga e serau tu.

17A sa kaya na Yalo, kei koya talega na watina-yalewa, Lako mai. Me kaya talega ko koya sa rogoca, Lako mai. Ia me lako mai ko koya sa viagunu. O koya talega sa vinakata, me mai gunuva walega na wai ni bula.

18Niʼu sa vakatakila vei ira na tamata kecega era sa rogoca na vosa ni parofisai ni vola o qo, Kevaka e dua na tamata ena vakaikuritaka na veika o qo, ena vakaikuritaka ko na Kalou vei koya na mate ca sa volai tu e nai vola o qo;

19ia kevaka sa kauta tani e dua na tamata e so na vosa e nai vola ni parofisai o qo, ena kauta tani ko na Kalou na kenai votavota mai na kau ni bula, mai na koro savasava talega, mai na veika talega sa volai tu e nai vola o qo.

20Sa kaya ko koya sa vakatakila na veika o qo, E dina kaʼu sa lako vakasauri mai. Emeni. Me vakaoqo. Lako mai, Turaga Jisu.

21Me nomudou kecega na loloma ni noda Turaga ko Jisu Karisito. Emimi.

Ai tinitini ni vola ni veiyalayalati vou.