Ai Vola I Jemesi 3 - AI VOLA TABU（FIJ1864）

Me da kakua ni viavia vakavuvuli; me da lewa na yameda, 1-12. O ira sa vuku dina, era sa yalomalumalumu, era sa yalovinaka, era sa sega ni dauvuvu, se dauveiba, 13-18.

1OI kemudou na wekaqu, me kakua ni lewe vuqa vei kemudou mei vakavuvuli, ni dou sa kila eda na cudruvi vakalevu kina.

2Ni da sa cala kecega e na ka e vuqa. Kevaka sa dua sa sega ni cala e na vosa, sa tamata sau e sara ko koya, a sa rawarawa vua me tarova na yagona taucoko.

3Raica, eda sa vakaciqira na kedrai tarovi ua ose ki na gusudra, me ra talairawarawa kina vei keda: eda sa qai saumaka na yagodra taucoko.

4Raica na veiwaqa talega, ni sa ka levu vakaidina, a sa savu kalia e na cagi kaukauwa, a ra sa saumaki ga e na uli lailai sara, ki na yasana e veitalia ko koya sa taura na uli.

5Sa vaka talega kina na yameda ni sa tikida lailai ga, a sa vosa vakaviavialevu. Raica, sa vakacaudreva na buka levu na buka-waqa e lailai!

6ia sa buka-waqa na yameda, a ka taucoko ni ca: sa vakakina na yameda e na veitiki ni yagoda taucoko, a sa vakacaudreva nai valavala kecega ni yagoda; a sa vakacaudreva o qori na eli.

7Ni sa dauvakamanoataki na manumanu kecega e yavai va, kei na manumanu vakatabana, kei na gata, kei na ka ni waitui, a sa vakamanoataka ira tu ko ira na tamata:

8ia ka sa sega na tamata sa vakamanoataka rawa na yame; a ka ca sa tawa tarovi rawa, sa sinai e na ka-gaga e dauveivakamatei.

9Eda sa vakavinavinaka kina vua na Kalou, o Tamada; eda sa rukaki ira talega kina na tamata, era sa caka me tautauvata kei na Kalou.

10Alai na gusu e dua ga, sa cavu kina na vakavinavinaka kei na veirukaki. Oi kemudou na wekaqu, e sega ni dodonu me vakakina na veika o qo.

11E dua beka na mata-ni-wai sa vakadavea mai na matana e dua bauga na dranu kei na gaga talega?

12Oi kemudou na wekaqu, sa dua beka na lolo sa vuataka rawa na olive? se dua li na vaini, na lolo? sa vakakina, sa sega e dua na mata-ni-wai me tovure maikina na waitui kei na dranu talega.

13O cei vei kemudou sa vuku ka yalomatua? me vakatakila e nai valavala vinaka na nona cakacaka mai na vuku yalomalua.

14Ia kevaka sa tu e na lomamudou na dauvuvu e gaga kei na dauveiba, dou kakua ni vakalevulevui kemudou, se lasutaka nai vakavuvuli dina.

15A vuku vakakoya sa sega ni lako sobu maicake, sa vakavuravura ga, sa vakayalomakawa, sa vakatevoro.

16Io, kevaka sa tu na vuvu kei na veiba, sa tu kina na veisei kei na cakacaka kecega e ca.

17Ia na vuku maicake sa savasava mada, emuri sa dauia na veivakacegui, sa yalomalua, sa vakamasuti rawarawa, sa sinai e na loloma kei na vua vinaka, sa sega ni digitaki ira na tamata, se dauveivakaisini.

18Ia na vua ni valavala dodonu sa kaburaki vata kei na veivakacegui vei ira era sa ia tiko na veivakacegui.