1SA tu ga e na vunau nai vakatakarakara ni veika vinaka me na muri mai, ia ka sega na nodra tautauvata dina, ka sega talega ni rawa e na veisoro era sa cabora tiko e na veiyabaki, me vakasavasavataki ira era daulako kina.
2Ia kevaka sa vakaoqo, sa sega li ni mudu oti na nodra vakacabori, e na vuku ni ra sa sega ni beitaki ira tiko e nai valavala ca ko ira sa dausoro, ni ra sa vakasavasavataki vakadua?
3ia e na veika o qori sa vakananumi tale kina nai valavala ca e na veiyabaki.
4Ni sa dredre sara me kauta tani nai valavala ca na dra ni karavau kei na koti.
50 koya o qo sa kaya kina ko koya ni sa lako mai ki vuravura, Ai soro kei nai madrali ko sa sega ni vinakata, ia ko sa vakarautaka ga vei au na yago:
6ai soro kama, o qori talega sa sorovaki kina nai valavala ca, ko sa sega ni reki kina:
7au sa qai kaya, Raica, au sa lako mai, (au a volai e nai vola vivigi,) meʼu cakava na ka ko sa vinakata, na Kalou.
8Sa kaya oti mada eliu ko koya, Ai soro kei nai madrali kei nai soro kama o qori talega sa sorovaki kina nai valavala ca, ko sa sega ni vinakata, se rekitaka, o koya sa vakacabori me vaka na vunau;
9sa qai kaya ko koya, Raica, au sa lako mai meʼu cakava na ka ko sa vinakata, na Kalou. Sa kauta tani ko koya nai kadua, me vakayacora na kenai karua.
10Ia eda sa vakasavasavataki e na vuku ni veitalia o qo, e na yago i Jisu Karisito ni sa cabori vakadua.
11Ia ko ira kecega na bete era sa tu ka cakacaka e na veisiga, ka vakacabora wasoma nai soro ko ya sa sega ni kauta tani rawa nai valavala ca:
12ia ko koya o qo, ni sa vakacabora vakadua oti nai soro e dua ga e na vuku ni valavala ca, sa qai tiko sobu e na liga i matau ni Kalou;
13a sa qai namaka tiko me yaco ko ira na nona meca mei tutu-ni-yavana:
14ni sai soro e dua ga ka cakava vakadua kina na ka kecega e yaga vei ira era sa vakasavasavataki.
15Ia sai vakadinadina talega vei keda na Yalo Tabu: io, ni sa vosa oti ko koya eliu,
16O qo na veiyalayalati kaʼu na cakava vei ira ni sa oti na gauna ko ya, sa qai kaya na Turaga, Au na tugana na noqu vunau ki na yalodra, ka vola e na lomadra;
17ia na nodrai valavala ca kei na nodra talaidredre kaʼu na sega ni nanuma tale.
18Ia kevaka sa bokoci na veika o qori, sa sega ni cabori tale nai soro ni valavala ca.
19O KOYA o qo, oi kemudou na veiwekani, ni da sa qai doudou rawa me da curu ki na loqi tabu sara e na vuku ni dra i Jisu,
20e na sala vou ka bula, o koya sa qai vakatara vei keda ko koya, ia sa ka e curu kina nai lati, o qori na yagona;
21ni sa dua talega na noda bete levu e na vale ni Kalou;
22tou toro voleka yani e na yalo dina kei na vakabauta dina sara, ni sa kureitaki tu na yaloda me da kakua ni beitaki keda e na ca, ka sa vakasilimi tu na yagoda e na wai makare.
23Tou taura matua na vakatusa ni vakabauta me kakua ni yavala; (ni sa yalodina ko koya sa yalataka;)
24me da veivakananumi keda vakai keda me da veivakatakatai me dauloloma ka valavala vinaka:
25me da kakua ni biuta na vakasoqoni vata, me vaka nai valavala ni tamata e so; me da veivakamasuti tiko: ia me vakalevu, ni dou sa raica ni sa toro voleka mai na siga.
26Io, kevaka eda sa valavala ca ka sa yaloda kina, ni da sa rawata oti me kila nai vakavuvuli dina, sa qai sega tale e dua tani nai soro ni valavala ca;
27ko ya ga na waraka e na rere na siga ni lewa, na cudru waqawaqa talega, o qori ena kati ira na meca.
28O koya sa beca na vunau i Mosese sa mate ga, sa sega tale ni lomani, ni sa beitaka vei koya e rua se tolu na dauveibeitaki:
29dou vakasama se na vakaevei na kena levu cake ni cudruvi, sa dodonu me yaco vua, o koya sa butuka na Gone ni Kalou, a sa nanuma ni sa ka qeleqelewa na dra ni yeiyalayalati sa vakasavasavataki kina, a sa vakasewasewani koya na Yalo ni loloma?
30Ni da sa kilai koya sa kaya, Sa noqui tavi me ia na cudru, au na sauma, Sa kaya ko Jiova. Sa kuri talega, Ena lewai ira na nona tamata ko Jiova.
31Sa ka rerevaki me lutu ki na liga ni Kalou bula.
32Ia dou vakananuma na veisiga eliu, dou a vakararamataki kina ka dou a qai vosota na veivala e na rarawa vakaidina;
33e so, ni dou a vakasesevotuni e na veivakalialiai kei na veivakararawataki; ka so, ni dou a tiko vata kei ira era sa vakakina.
34Ni dou a lomani au ga ni kaʼu sa vesuki, ka reki ni sa kovei na nomudoui yau, ni dou sa kila e na lomamudou ni sa tu ga mai lomalagi na nomudoui yau e vinaka cake kina ka veiqati.
35O koya o qo mo dou qai kakua ni biuta na nomudou dinata ena levu na kenai sau.
36Ni sa yaga vei kemudou na vosota, mo dou cakava na ka sa veitaliataka ko na Kalou, ka me nomudou kina na ka ka yalataki.
37Ni na dede vakalailai, ena qai lako mai ko Koya e lako mai, ka na sega ni dede sara.
38Ia ena bula na tamata yalododonu e na vakabauta: ia, Kevaka sa suka tani tale, ena sega ni vinakati koya na yaloqu.
39Ia koi keda, eda sega ni vakai ira sa suka tale yani ki na rusa; eda sa vakai ira ga era sa vakabauta tiko me bula na yalo.
Who We AreWhat We EelieveWhat We Do
2025 by iamachristian.org,Inc All rights reserved.
