Vei Ira Na Iperiu 9 - AI VOLA TABU（FIJ1864）

Sa tukuna ko koya na ka e so sai vakatakarakara eliu kei Karisito; ia ka sa uasivi cake sara kina ko koya, 1-28.

1SA dina ya ni sa tu kei na kena o qori ka taumada e so nai vakaro ni lotu, kei na vale-ni-soro vakavuravura.

2Ni sa caka ga na vale tabu; o koya sa taumada, sa tu kina nai tutu-ni-cina, kei nai kanakana, kei na madrai dauraici; a yacana o qo na tikina tabu.

3A sa sivi nai karua ni lati, a sa tu kina na vale tabu sa vakatokai na loqi tabu sara;

4sa tu kina na miqa koula, kei na kato ni veiyalayalati sa ubi na yasana kece e na koula, sa tu kina na bilo koula sa tawa e na mana, kei nai titoko talega i Eroni o koya sa kubu, kei na vatu raraba ni veiyalayalati;

5sa tu ga ecake koi rau na jerupi vakaiukuuku sa vakaruruga nai cabocabo-ni-bulubulu; ia ka sa dredre edaidai me tukuni yadua na veika o qo.

6Ia ni sa vakarautaki oti na veika o qo, sa curu ko ira na bete e na veisiga ki nai matai ni vale tabu, ka ia kina na lotu:

7ia ki na kenai karua ko na bete levu duaduaga vakaduaga e na veiyabaki, ka kauta na dra, a sa vakacabora e na vukuna, kei na vuku ni nodrai valavala ca talega na tamata:

8a sa vakatakila na Yalo Tabu na ka o qo, ni sa sega ni vakarairaitaki mai na sala ki na loqi tabu sara, e na gauna sa tu ga kina na vale tabu ka taumada.

9A kenai vakatakarakara walega o qori, ka yacova na gauna o qo, sa vakacabori kina nai madrali kei nai soro, o koya sa tawa vakasavasavataka rawa na lewa-eloma i koya sa lotu;

10e na kakana kei na ka-ni-gunu, kei na vui vui vakavuqa, kei na veivakaro vakavuravura, sa lesi me yaco mada na gauna ni veivakadodonutaki.

11Ia sa lako mai ko Karisito, a sa bete levu e na ka vinaka ena muri mai, e na vale tabu levu ka uasivi cake na kena vinaka, e tawa tara e na liga, ni sa sega ni caka vakakina;

12e sega talega e na dra ni koti kei na luve ni karavau, e na nona dra ga sa curu vakadua ki na loqi tabu sara, ni sa rawata oti me solia na bula tawa mudu.

13Ia kevaka sa yaga na dra ni karavau kei na koti, kei na dravusa ni luvena-yalewa ni karavau ni sa kureitaki vei ira sa dukadukali, me savasava kina na yagodra:

14ena vakatanievei na dra nei Karisito, o koya ka vakacabori koya vua na Kalou e na vuku ni Yalo tawa mudu ia ka sega vua na ca, ena sega beka ni rawarawa sara me vui laivi kina mai na nomudou lewa-eloma na cakacaka sa vaka na mate, mo dou qarava na Kalou bula?

15O koya ga o qo sa yaco kina ko koya me dautataro e na veiyalayalati vou, me ra rawata kina ko ira ka kacivi nai votavota tawa mudu ka yalataki, e na vuku ni nona mate, sai soro ni valavala ca ka caka oti e na gauna ni veiyalayalati taumada.

16Ia kevaka sa dua na veiyalayalati, sa yaga me mate o koya sa ia kina na veiyalayalati:

17ni sa mate sa vakataudeitaki kina na veiyalayalati; ia ka sa sega ni yaga vakalailai mai ni sa bula tiko o qori sa ia kina na veiyalayalati.

18O koya o qo sa sega kina ni vakatabui o qori sa taumada, e na dra ga:

19io, ni sa cavuta oti ko Mosese nai vakavuvuli kecega ni vunau vei ira kecega na tamata, sa qai kauta ko koya na kedra dra na luve ni karavau kei na koti, kei na wai, kei na vuti ni sipi sa vakadamu-damutaki, kei na isopa, ka kureitaka nai vola, kei ira kecega na tamata,

20ka kaya, O qo na dra ni veiyalayalati sa kitaka vei kemudou ko na Kalou.

21Sa kureitaka vaka talega kina e na dra na vale tabu, kei na bilo kecega ni lotu.

22Ia ka vica na ka sa tawa vakasavasavataki e na dra me vaka na vunau; ia kevaka sa sega ni vakadavei na dra, sa sega ni bokoci nai valavala ca.

23Ia sa dodonu kina me vakasavasavataki nai vakatakarakara ni veika mai lomalagi e na veika o qo; ia na veika dina sa vakalomalagi e nai soro e uasivi cake vei ira.

24Ni sa sega ni curu ko Karisito ki na loqi tabu sa caka e na liga, o qori sai vakatakarakara ga ni ka dina; ki na lomalagi dina ga, me rairai edaidai e na mata ni Kalou e na vukuda:

25sa sega talega ni vakacabori koya vakavuqa, me vaka sa curu na bete levu ki na loqi tabu e na veiyabaki, ka kauta na dra ni ka tani;

26ia ke sa vakakina ke sa dodonu me mate vakavuqa mai nai vakatekivu kei vuravura: ia sa qai vakarairaitaki vakadua ko koya e nai vakataotioti ni veigauna sa loku me kauta tani nai valavala ca ni sa vakacabori koya.

27Ia me vaka sa lesi me mate vakadua ko ira na tamata, ka me muria o qo na siga ni lewa:

28sa vakacabori vakadua vaka talega kina ko Karisito me cudruvi e na vuku ni valavala ca ni lewe vuqa; ka na rairai mai vakarua ko koya kivei ira sa waraki koya me ra bula, ia ka na sega ga mei soro.