Vei Ira Na Iperiu 7 - AI VOLA TABU（FIJ1864）

Sa tukuna ko koya ni sa uasivi cake ko Jisu vei ira na bete eliu, 1-28.

1IA ko Melikiseteki o qo, sa tui mai Salemi, a bete ni Kalou Cecere sara, sa tavaki Eparaama ni sa tale mai na mokuti ira na tui, a sa vosavakalougatataki koya;

2sa solia talega vei koya ko Eparaama nai katini ni ka kecega: nai balebale ni yacana na Tui ni caka dodonu, a yacana talega emuri na Tui Salemi, a kenai balebale na Tui ni veivakacegui;

3e sega ni tukuni na tamana, se na tinana, se na nona mataqali, sa sega ni vakatekivu na nona gauna, se oti na nona bula; a sa caka me vaka na Gone ni Kalou; a sa tikoga me bete ka tawa mudu.

4Dou vakasama na kena levu ni tamata o qo, ni sa solia vei koya ko Eparaama na turaga qase nai katini ni kamunaga sa tokitaka.

5A sa dina vei ira na luve i Levi, era sa bete, ni sa vakaroti vei ira e na vunau, me ra vakaisigana maivei ira na tamata, io, maivei ira na wekadra, ia sa dina ya ni ra sa lako mai na tolo i Eparaama:

6ia ko koya o qo sa vakaisigana maivei Eparaama, a sa tawa wiliki vata kei ira na nona mataqali, a sa vosavakalougatataki koya ka vosataki kina na yalayala.

7Ia sa sega e dua me vakatitiqataka rawa na vosa o qo, ni sa vosavakalougatataki koya sa uasivi sobu ko koya sa uasivi cake vei rau.

8Ia eke era sa taura nai sigana ko ira na tamata era sa daumate; ia kikea ko koya sa tukuni ga ni sa bula tiko.

9Io, kevaka e tara meʼu vosa vakakina, o Levi talega, o koya sa dautaura nai sigana, erau sa solia kei Eparaama nai sigana;

10ni ka tu ga e na tolo i tamana, ni rau a veisotaraki kei Melikiseteki.

11Ia kevaka e yaco rawa na tawa cala e na vuku ni cakacaka ni bete vaka-Levi, (ni sa tukuni vata kaya na vunau vei ira na tamata,) ena yaga vakacava me tubu e dua tale na bete me vaka nai valavala i Melikiseteki, me kakua ni vakatokai me vaka nai valavala i Eroni?

12Ia ni sa qai vakaiso-somitaki na bete, sa dodonu sara me vakai-sosomitaki talega na vunau.

13Ia ko koya sa tukuni vakaoqo, sa dua tani na nona yavusa, a ya sa sega maikina e dua na tamata sa qarava nai cabocabo-ni-soro.

14Ni sa macala sara ni sa tubu maivei ira na Juta na noda Turaga; ia na yavusa ko ya e sega ni vosa kina ko Mosese me ra bete.

15Ia ka sa macala vakalevu sara; ni sa tubu e dua tani tale na bete me vakataki Melikiseteki,

16o koya ka lesi, ka sega ni vaka na vunau vakavuravura, ko ya ga me vaka na kaukauwa ni bula tawa mudu.

17Ni sa tukuna ko koya, O iko na bete tawa mudu me vaka nai valavala i Melikiseteki.

18Sa dina ni sa mudu mai na vunau sa liu ni sa malumalumu ka tawa yaga:

19ni sa sega ni vunau sa yaco kina na tawa cala: ia ka sa vakabuca mai nai nuinui sa vinaka cake, o koya eda sa toro voleka kina vua na Kalou.

20Ia sa vaka ni sa tu na vosa bubului: (

21ni sa buli walega me ra bete ko ira o qori, ia ka sega ni sa tu na vosabubului; ia ko koya o qo e na vosa bubului; e na vuku i koya sa kaya vua, Sa vosa bubului ko Jiova, ka na sega ni veivutuni, O iko na bete tawa mudu me vaka nai valavala i Melikiseteki:)

22sa uasivi cake vakakina na veiyalayalati, o koya sa yaco me kena vakadinadinataki ko Jisu.

23Ia ko ira o qori e lewe vuqa, era sa caka me ra bete, e na vuku ni sa tarova na nodra tiko na mate:

24ia ko koya o qo, e na vuku ni sa tiko ga ka tawa mudu, sa sega ni vakaisosomitaki na nona cakacaka vakabete.

25O koya o qo sa rawarawa kina vua me vakabulai ira sara era sa lako mai vua na Kalou e na vukuna, ni sa bula tikoga ko koya me masulaki ira.

26Ni sa dodonu me noda e dua na bete sa vakaoqo, sa yalosavasava, sa yalovinaka, sa tawa ca, sa tawase tani maivei ira na tamatai valavala ca, a sa caka me uasivi cake kei lomalagi e na nona cecere:

27o koya e sega kina ni yaga e na veisiga, me vakacabora taumada nai soro ni nonai valavala ca, ka emuri na nodra na tamata, me vakataki ira na bete levu: ni sa cakava o qo vakaduaga ko koya, ni sa vakacabori koya.

28Ni sa tamata, era sa malumalumu, sa bulia ko na vunau me ra bete levu; ia sai koya ga na Gone, o koya sa caka me tawa ca ka tawa mudu e na vosa bubului sa muria na vunau.