Vei Ira Na Iperiu 6 - AI VOLA TABU（FIJ1864）

Sa vakarota vei ira ko koya me ra vuku sara e na lotu, de ra ca tale, 1-8. Sa vakavulici ira me ra tu dei, ka gumatua sara, me ra kakua ni yalowai, ni sa vosa dina sara na Kalou ni sa yalataka na ka vinaka, 9-20.

1E NA vuku ni ka o qo me da qai laiva nai vakatekivu ni vakavuvuli kei Karisito me da lako kiliu ki na ka vaqase; me da kakua ni tauyavutaka tale e na veivutuni e na vuku ni valavala eda mate kina, e na vakabauta talega na Kalou,

2ai vakavuvuli ni veipapitaisotaki, kei na veitabaki liga, e na nodra tu cake talega ko ira na mate, kei na lewa ka tawa mudu.

3Ia na ka o qo eda na cakava, kevaka e vinaka vua na Kalou.

4Ni sa dredre sara me vakavoui tale me ra veivutuni ko ira ka vakararamataki eliu, era a tovolea nai solisoli vakalomalagi, ka rawata na Yalo Tabu,

5ka tovolea na vosa vinaka ni Kalou, kei na kaukauwa ni bula ena muri mai,

6a ra sa qai vuki tale; ni ra sa vakota tiko vakai ira na Gone ni Kalou ki na kauveilatai, ka vakalialiai koya e na matanavotu.

7Ni sa vakalougatataka ko na Kalou na qele sa gunuva na uca sa lako wasoma kina, a ya sa vakatubura na kau sa yaga vei ira era sa kelia:

8ia sa tawa vakabau ka vo e lailai me biu sara o qori sa vakatubura na kau votovotoa kei na soni; ia na kenai otioti me visa.

9Ia koi kemudou ga, sa lomani, e dina ya ni keitou sa vosa vakaoqo, ia sa ka vinaka cake, kei na ka dou na bula kina, keitou sa vakasami kemudou kina.

10Ni sa sega ni tawa dodonu ko na Kalou me guilecava kina na nomudou cakacaka, kei nai valavala loloma, dou a vakatakila ki na yacana ni dou a qaravi ira era sa lotu, ia dou sa qarava tikoga.

11Ia keitou sa vinakata mo dou vakatakila yadua na mamakutu vakaoqori, mo dou vakanuinui matua sara kina me yaco nai vakataotioti:

12mo dou kakua ni vucesa, mo dou muri ira ga era sa qai taukei ni veika ka yalataki e na vuku ni ra a vakabauta ka vosota vakadede.

13Ia ni sa vosataka na yalayala vei Eparaama na Kalou, e na vuku ni sa sega ni cavuta rawa e dua sa uasivi cake, sa qai cavuti koya ga e na nona bubului,

14ka kaya, E dina kaʼu na vakalougatataki iko vakalevu, ka vakalewevuqataki iko vakalevu sara.

15Sa vaka ga kina, ni sa vosota vakadede mada ko koya, sa qai yaco mei taukei ni ka ka yalataki.

16Ia ni sa bubului ko ira na tamata, era sa daucavuta na ka sa levu cake: a sa oti vei ira na veileti e na bubului mei vakadinadina.

17Sa vakakina ko na Kalou, ni sa vinakata ko koya me vakatakila dina sara kivei ira era na taukena na ka ka yalataki ni sa tu dei na nona lewa, sa vakadinadinataka e na bubului:

18me rua kina na ka sa tu dei sara, sa sega ni rawa kina me vosa lasu ko na Kalou, me da vakacegui sara kina, koi keda eda sa laʼki vakaruru ni da sa taura nai nuinui sa viritu e matada:

19ko ya sa tu vei keda mei kelekele ni yaloda, ni sa dina ka kaukauwa, ia ka sa curu sara ki loma ni lati:

20a tikina sa curu kina e na vukuda ko Jisu, me liu, ni sa caka me bete levu ka tawa mudu me vaka nai valavala i Melikiseteki.