Vei Ira Na Kai Filipai 3 - AI VOLA TABU（FIJ1864）

Sa vakasalataki ira ko koya e na vukudra nai vakavuvuli vakailasu, 1-11. Sa kaya ni sa cici cere, a sa vakarota vei ira me ra vakakina, 12-21.

1MEʼU tinia, oi kemudou na wekaqu, mo dou reki e na Turaga. Me vola vei kemudou na veika kaʼu a vola eliu sa dina ni sa sega ni ka rarawa vei au, ia na ka dou sa tu vinaka kina.

2Dou raici ira vinaka na koli, dou raici ira era sa daucaka ca, dou raici ira na cili.

3Ni da sa lewe ni veicilivi koi keda eda sa masu vakayalo vua na Kalou, ka rekitaki Karisito Jisu, ka sega ni vakararavi ki na yago.

4Ia koi au, e dina sa noqu na ka meʼu vakararavi kina ki na yago. Kevaka sa dua tani sa nanuma ni sa tu vua e dua na ka me vakararavi kina vakayago, au sa uasivi cake kina;

5au a cilivi e nai kawalu ni siga, au a sucu me luve i Isireli, mai na yavusa i Penijamini, oi au na Iperiu maivei rau na Iperiu; e na ka ni vunau au a Farisi;

6e na ka ni lomakatakata au a vakacacana nai vavakoso lewe ni soro; e na veivakadonui sa yaco mai na vunau, au a tawa cala.

7Ia na veikakaʼu a taleitaka au sa vakasama me ka ni veivakayaliyali vei au meʼu rawai Karisito kina me noqu.

8Ia e dina ya, niʼu sa vakasama ni sa ka ni veivakayaliyali walega na ka kece e na vuku ni sa uasivi cake kina na kilai Karisito Jisu na noqu Turaga; o koya kaʼu sa vosota kina me yali vei au na ka kecega, ia kaʼu sa vakasama ni sa de-ni-manumanu walega, meʼu rawai Karisito kina me noqu,

9me keirau kune vata kaya, me kakua ni tu vei au na vakadonui, a ya sa rawa mai na vunau, o qori ga sa rawa mai na vakabauti Karisito, na vakadonui sa mai na Kalou e na vuku ni vakabauta:

10meʼu kilai koya, kei na kaukauwa ni nona tu cake tale mai na mate, ka me keirau veitokani kaya e na ka rarawa, meʼu vakatauvatani kaya e na nona mate;

11deʼu yacova beka na tu cake tale mai na mate.

12Au sa sega ni vaka kaʼu sa rawata oti, seʼu yaco sara oti: ia kaʼu sa muria lako ga, me taura dina na ka ka tauri au kina ko Karisito Jisu.

13Oi kemudou na veiwekani, au sa sega ni vakasami au niʼu sa taura oti ga; ia sa dua bauga na ka, au sa guilecava na ka sa sivi, kaʼu sa kakavaki me tado-lova na ka kiliu,

14kaʼu sa ciciva na cere, meʼu tauca na cere sa kacivi au kina maicake ko na Kalou e na vuku i Karisito Jisu.

15O koya me da qai lomavata e na ka o qo, oi keda kecega sa matua e na lotu; ia kevaka sa dua na ka dou sa tawa lomavata kina, ena vakaraitaka na ka ko ya talega vei kemudou ko na Kalou.

16Ia, na ka eda sa yacova sara ga, me da muria tiko nai vakarau ko ya, me da nanuma tikoga na ka ko ya.

17Oi kemudou na veiwekani, dou muri au vata ga, ka vakaraici ira era sa valavala vakakina, ni keitou sa tu vei kemudou mei vakarau. (

18Ni ra sa lewe vuqa kaʼu sa tukuna wasoma vei kemudou, ia kaʼu sa qai tukuna talega niʼu sa tagi tiko, ni ra sa meca ni kauveilatai i Karisito e na nodrai valavala:

19ia sa nodrai tinitini na rusa, a nodra kalou na ketedra, era sa vakalevulevui e na vuku ni nodra ka e veivakamaduataki, a ra sa daunanuma na veika ni vuravura.)

20Ia eda sa lewe ni koro mai lomalagi koi keda: eda sa namaka maikina nai Vakabula, a Turaga ko Jisu Karisito:

21o koya ena vakamataliataka na yagoda sa malumalumu, me vakatauvatani kei na yagona sa vakaiukuukutaki, me vaka na kaukauwa sa vakamalumalumutaka rawa kina na ka kecega ko koya.