Vei Ira Na Kai Filipai 2 - AI VOLA TABU（FIJ1864）

Sa vakarota vei ira ko koya me ra veilomani, ka yalomalumalumu, me vakataki Jisu, 1-11. Me ra gumatua sara me ra bula: me ra yaga talega, 12-18. Sa tukuni Timoci kei Epafirotito vei ira, 19-30.

1IA kevaka sa so na veivakacegui e na vuku i Karisito, se so na vakaleca ni loloma, se so na veilomani ni Yalo, se so na dauloloma kei na yalovinaka,

2mo dou vakayacora sara na noqu marau, mo dou lomavata kina, mo dou tautauvata e na loloma, mo dou lomavata, mo dou yalovata.

3Me kakua ni caka e dua na ka e na veileti se na veidoka-dokai walega; mo dou yalomalumalumu ka dui vakasama ni sa uasivi cake vua ko koya kadua.

4Mo dou kakua ni raica na nomudou ka ga koi kemudou yadua, ia na nodra veika na tamata tani talega, oi kemudou yadua.

5Me tiko e na lomamudou na yalo o qo ka tiko talega vei Karisito Jisu:

6o koya, ni sai tovo vata kei na Kalou, sa sega ni vakasama ni sa butako ni sa vakatauvatani kei na Kalou:

7a sa vakadravudravuataki koya, ka kauta nai tovo ni tamata kaisi, a sa caka me tautauvata kei na tamata:

8ia ni sa kune ni sai tovo vata kei na tamata, sa vakamalumalumutaki koya, a sa talairawarawa me mate, io me mate e na kauveilatai.

9O koya o qo sa vakalevulevui koya cake kina ko na Kalou, a sa solia vua na yaca sa uasivi cake e na yaca kecega:

10me tekiduru kina e na yaca i Jisu na duru vakaaduaga, mai lomalagi, kei vuravura, kei na ruku i vuravura;

11me vakatusa talega na yame kecega ni sa Turaga ko Jisu Karisito, me vakarokorokotaki kina ko na Kalou na Tamada.

12Ia koi kemudou, kaʼu sa daulomana, me vaka na nomudou talairawarawa e na veisiga sa oti, dou sa sega ni ia walega niʼu sa tiko vei kemudou, dou sa uasivi cake kina niʼu sa takali, dou kitaka vakakina na cakacaka dou sa bula sara kina, e na rere kei na sautaninini.

13Ni sai koya na Kalou sa cakacaka e na lomamudou me vaka na nona veitalia, mo dou nakita ka kitaka talega.

14Me kakua sara na didi kei na veileti e na nomudou cakacaka:

15mo dou tawa cala ka tawa veiwaki vata kei na ca, mo dou luve ni Kalou ka tawa beitaki me ca, e na kedra maliwa nai tabatamata takelo ka lomavakatani, mo dou sa cila e na kedra maliwa me vaka na cina e so e vuravura;

16ni dou sa taura tiko na vosa ni bula; meʼu reki kina e na siga i Karisito, niʼu sa sega ni cici walega, seʼu daucakacaka walega.

17Ia kevaka kaʼu sa sovaraki yani e na nomudou vakabauta ni sa cabo mei madrali, au sa reki kina, ka marau vata kei kemudou kecega.

18E na vuku ni ka o qo mo dou reki koi kemudou talega, ka marau vata kei au.

19Ia kaʼu sa vakararavi vua na Turaga ko Jisu me voleka na noqu talai Timoci vei kemudou, meʼu vakacegui talega, niʼu sa kila na nomudou tiko.

20Ni sa sega e dua sa tiko vei au sa yalovata kaya, me daunanuma na nomudou ka e na lomana dina.

21Ni ra sa vakasaqara na nodra ka ko ira kecega, sa sega na ka nei Karisito Jisu.

22Ia dou sa kilai koya ni sa vakatovolei, ni sa vaka na gone vei tamana, ni sa daucakacaka vata kei au e nai tukutuku-vinaka.

23O koya kaʼu sa nakita kina me malua vakalailai kaʼu na qai talai koya, meʼu raica mada se sa vakaevei koi au.

24Ia kaʼu sa vakararavi vua na Turaga niʼu sa voleka talega koi au meʼu lako yani.

25Ia kaʼu sa vakasama ni sa dodonu meʼu talai Epafirotito mada vei kemudou, a taciqu, kei na qaui caba e na cakacaka, kei na noqui tokani e nai valu o qo, kei na nomudoui talatala, kei koya sa cakava na ka e rauta na noqu dravudravua.

26Ni sa domoni kemudou kecega, a sa rarawa ua yalona, ni dou a rogoca ni ka tauvi-mate ko koya.

27E dina ga ni ka tauvi-mate ka voleka ni ciba: ia ka sa yalovinaka ko na Kalou vei koya; a sa sega walega vei koya, vei au talega, de vakaikuritaki na noqu rarawa e na ka tale e rarawa.

280 koya o qo kaʼu sa gumatua cake kina meʼu talai koya, mo dou reki kina, ni dou sa raica tale, ka me lailai sobu kina na noqu rarawa.

29O koya mo dou qai kauti koya e na Turaga, e na reki levu sara; ka mo dou vakarokorokotaki ira era sa vakakina:

30ni sa voleka ni mate ko koya e na vuku ni cakacaka i Karisito, a sa sega ni maninitaka na nona bula, me vakaikuritaka na nomudou cakacaka vei au sa vo tu.