Ai Vola I Osea Na Parofita 2 - AI VOLA TABU（FIJ1864）

Sa tukuna ko Osea na nodra dauqarava na kalou tani, 1-5. Sa cudruvi ira kina na Kalou, 6-13. A sa ia tale na nona vosa loloma vei ira, 14-23.

1DOU kaya vei ira na tacimu, Ami; kei ira na tacimu alewa, Ruama.

2Dou ia na veilewai kaya na tinamudou, dou ia na veilewai: ni sa sega ni watiqu ko koya, oi au talega, kaʼu sa sega ni watina: me biuta tani ko koya na nona dauyatagane mai na matana, kei na nona veibutakoci mai na maliwa ni sucuna:

3deʼu vakaluvawaletaki koya, ka vakatikori koya me vaka e na siga ka sucu kina, ka cakavi koya me vaka na veikau, ka soli koya me tautauvata kei na vanua dravuisiga, ka vakamatei koya e na viagunu.

4Ia na luvena kaʼu na tawa lomana; ni ra sa gone ca.

5Ni sa ia na dauyatagane ko tinadra: sa caka ka e veivakamaduataki ko koya ka kunekunetaki ira: ni sa kaya ko koya, Au na muri ira na noqui tau, era solia mai na qau madrai kei na mequ wai, na noqu vutika ni sipi kei na noqu laino, na noqu waiwai kei na mequ ka ni gunu.

6O koya o qo, raica, kaʼu na latia kina na nomu sala e na soni, ka viria e dua na bai vatu, me na tawa kunea ko koya na nonai lakolako.

7Ena cicimuri ira talega ko koya era nonai tau, ka sega ni vauci ira; ka vakasaqarai ira, ka sega ni kunea: ena qai kaya ko koya, Au na laʼki lesu tale vua na watiqu eliu; ni ka vinaka na noqu tiko o qori.

8Ia na ka o qo sa lecava ko koya, ni sai au ka solia vua na sila kei na waini, kei na waiwai, ia na siliva kaʼu a vakalevutaka vua, kei na koula, a ya era sa cakava vei Peali.

9O koya o qo kaʼu na lesu kina, ka kauta na noqu sila e na kena gauna, kei na noqu waini e na kena gauna, ka kauta tani na noqu vutika ni sipi kei na noqu laino sa ubi kina na nona luvawale.

10Ia o qo kaʼu na vakaraitaka na nona lialia e matadra na nonai tau, ena sega talega e dua me kaliraki koya mai na ligaqu.

11Ia kaʼu na vakaotia kecega na nona marau, na nona solevu, na nona vula vou, kei na nona siga tabu, kei na nona solevu tabu kecega.

12Au na vakacacana talega na nona veivaini, kei na nona veilolo, a ya sa kaya kina ko koya, Sa qaui soli o qo era solia vei au ko ira na noqui tau: ia kaʼu na cakava me veikau; ena kania talega na manumanu ni vanua.

13Au na cudruvaka talega vua na gauna i Peali, a ya ka vakacaudreva kina na ka boi vinaka vei ira, ka vakaiukuukutaki koya e na nona mama ni ucu kei na nona ka ni uku, ka muri ira na nonai tau, ia koi au, sa guilecava ko koya, sa kaya ko Jiova.

14Ia ka raica, kaʼu na rawai koya, ka kauti koya ki na veikau, ka vosaveivaka-cegui koya.

15Ia kaʼu na solia vua na nona veivainivaini maikea, kei na buca ko Akori me katuba me vakanananu vinaka kina: ia ena meke maikea ko koya, me vaka e na siga sa gonealewa kina, ka vaka e na si ga ka lako cake mai kina ko koya mai na vanua ko Ijipita.

16Ia ena yaco e na siga ko ya, sa kaya ko Jiova, ko na qai vakatokai au ko Isi; ka sega ni vakatokai au tale ko Peali.

17Niʼu na kauta tani na yacadra na Peali e na gusuna, ena sega talega ni nanumi na yacadra.

18Ia kaʼu na ia na veiyalayalati e na vukudra e na siga ko ya kei na manumanu ni vanua, kei na manumanu kei lomalagi, kei na ka sa qasi e na soso; ia na dakai kei nai seleiwau kei nai valu kaʼu na musuka tani mai na vanua, ka cakavi ira me ra koto vakacegu.

19Ia kaʼu na vakabauti iko mo watiqu ka tawa mudu; io, kaʼu na vakabauti iko mo noqu e na yalododonu, kei na lewa dodonu, kei na yalovinaka, kei na yalololoma.

20Io, kaʼu na vakabauti iko mo noqu e na lomadina: ia ko na kilai Jiova.

21Ia ena yaco e na siga ko ya, au na rogoca, sa kaya ko Jiova, au na rogo yani ki na mata-ni-lagi, o qori talega ena rogo yani ki na vuravura;

22o vuravura talega ena rogo yani ki na sila, kei na waiwai, kei na waini; na ka o qori talega ena rogo yani ki Isirieli.

23Ia kaʼu na kaburaki koya e na vanua me noqu; kaʼu na lomani Lo-ruama; au na kaya talega vei Lo-ami, Sai iko na noqu tamata; a ra na dui kaya mai, Noqu Kalou.