Ai Vola I Osea Na Parofita 1 - AI VOLA TABU（FIJ1864）

A WASE I. —A gauna i Osea na parofita, 1. Sa vakatakarakarataki na nodra ca na Isireli era soro ki na kalou tani, e na dua na alewa dauyatagane; ia na Kalou sa vakaroti Osea me kauta me watina, a sa sucu e so na luvena, a sa dui vakatoka vei iratou na yaca vakaibalebale, 2-9. Sa tini e na vosa ni yalayala, 10, 11.

1A VOSA i Jiova sa yaco vei Osea na luve i Pieri, e na gauna i Usiya, kei Yocami, kei Aasi, kei Isikiya, na tui Juta, kei na gauna i Yaropiami na luve i Yoasi, na tui Isireli.

2AI vakatekivu ni vosa i Jiova vei Osea. A sa kaya ko Jiova vei Osea, Mo laʼki kauta e dua na alewa dauyatagane me watimu, kei iratou na gone ca me luvemu: ni sa dauyatagane vakalevu na vanua, ni sa lako tani vei Jiova.

3A sa lako ko koya ka kauti Komera na luve i Tipileimi; a sa kunekune ko koya, ka vakasucuma e dua na luvena tagane.

4A sa kaya vua ko Jiova, Mo vakatoka na yacana ko Isirieli; ni sa vo e lailai, kaʼu na qai cudruvaka na dra i Isirieli ki na mataqali i Yeu, ka vakaotia na matanitu ni mataqali nei Isireli.

5Ia ena yaco e na siga ko ya, kaʼu na musuka na dakai i Isireli e na buca ko Isirieli.

6A sa kunekune tale ko koya, ka vakasucuma e dua na luvena alewa. A sa kaya vua ko Koya, Mo vakatoka na yacana ko Lo-ruama: niʼu na sega ni lomani ira tale na mataqali nei Isireli; au na kauti ira laivi sara ga.

7Ia na mataqali nei Juta kaʼu na lomani ira, ka vakabulai ira e na liga i Jiova na nodra Kalou, ka sega ni vakabulai ira e na dakai, se nai seleiwau, se nai valu, se na ose, se vei ira era dauvodo e na ose.

8A sa kali Lo-ruama ko koya, a sa kunekune tale, ka vakasucuma e dua na luvena tagane.

9A sa kaya ko Koya, Mo vakatoka na yacana ko Lo-ami: ni dou sa sega ni noqu tamata, ia koi au kaʼu na sega talega ni nomudou.

10Ia na kedrai wiliwili na luve i Isireli ena vaka na mata ni nuku ni waitui, sa tawa vakarauti se wiliki rawa; ia ena yaco, na yasana ka kainaki kina vei ira, Dou sa sega ni noqu tamata, ena kainaki vei ira, Dou sa luve ni Kalou bula.

11Era na qai soqoni vata na luve i Juta kei na luve i Isireli, ka lesia e dua me uludra, ka lako cake mai na vanua: ni na levu na siga ni Isirieli.