1SA qai kauti au ko koya ki na matamata-ni-koro, io na matamata-ni-koro sa qaradonu ki cake:
2ka, raica, nai ukuuku ni Kalou nei Isireli sa lako mai na sala mai cake: ia na domona sa vaka na domo ni wai levu: ia ko vuravura sa cilavi e na nonai ukuuku.
3A sa rairai tautauvata kei na raivotu kaʼu a raica, io me tautauvata kei na raivotu kaʼu a raica niʼu a lako mai me vakarusa na koro: ia na raivotu o qo sa tautauvata kei na raivotu kaʼu a raica mai na uciwai ko Kipari; ia kaʼu sa bale vakatoboicu.
4Ia nai ukuuku i Jiova sa curuma na vale mai na sala ni matamata-ni-koro sa qaradonu ki cake.
5A sa laveti au cake na Yalo, ka kauti au ki loma ni bai eloma; ka, raica, sa curuoso nai ukuuku i Jiova e na loma ni vale.
6Au a qai rogoci koya sa vosa vei au mai na loma ni vale; ia na tamata keirau sa tu vata.
7A sa kaya vei au ko koya,
Na luve ni tamata, o qo na tikina ni noqui tikotiko, kei nai tutu ni qeteqete ni yavaqu, a ya kaʼu na tiko kina e na kedra maliwa na luve i Isireli ka tawa mudu, a ra na tawa vakacacana tale na mataqali nei Isireli na yacaqu tabu, se ko ira, se na nodra tui, e na nodra dauyalewa, se na yagodra mate na nodra tui, e na nodra veiyasana cecere.
8Ni ra viritaka vata na nodrai lago kei na noqui lago, kei na nodra duru kei na noqu duru, ia na lalaga ga ka tu e na keimami maliwa, a ra sa vakacacana na yacaqu tabu e na nodrai valavala vakasisila era sa kitaka: kaʼu a vakarusai ira kina e na noqu cudru.
9Ia me ra biuta tani mada na nodra dauyalewa, kei na yagodra mate na nodra tui, mo yawa vei au, kaʼu na qai tiko vata kei ira ka tawa mudu.
10O iko na luve ni tamata, mo vakatakila na vale ki na mataqali nei Isireli mo ra maduataka na nodra caka cala: ia mo ra vakarauta na kenai vakarau.
11Ia ke ra maduataka na ka kece era sa cakava, ke sa kenai vakarau ni vale, kei na kenai valavala, kei na kenai curucuru kituba, kei na kenai curucuru kiloma, kei na kenai vakarau kecega, kei na kenai lesilesi kecega, kei na kenai vakarau kecega, kei na kena vunau kecega, ko na qai vakatakila vei ira; ka vola e matadra, me ra vakabauta taucoko na kenai vakarau, kei na kenai lesilesi kecega, ka cakava o qori.
12Sai koya o qo na vunau ni vale e dela ni ulu-ni-vanua, Na kenai yalayala kecega e na veitikina kecega, me sa tabu sara. Raica, sai koya o qo na vunau ni vale.
13A sa vakaoqo na kenai vakarau ni cabocabo-ni-soro ni cagavi. Ia na kena caga rua sa caga rua ka dua na tikina; ia na botona me caga rua na kena cecere, ka caga rua na kena raraba, kei nai yalayala ni bati ni botona me caga dua voli tu: ia me vakaoqo na boto ni cabocabo-ni-soro.
14Ia mai na botona e na qele ka yala ki na kena rara lailai me caga va, ka caga rua na kena raraba; ia mai na kena rara lailai ki na kena rara levu me caga walu, ka caga rua na kena raraba.
15Ia na delana dina me caga walu; ia me vu mai tutuna ka tu kicake e va na kenai tautauri nai cabocabo-ni-soro.
16Ia nai cabocabo-ni-soro me caga ruasagavulu ka va na kena balavu, ka ruasagavulu ka va na kena raraba, me takiveilevu na kena veiyasana e va.
17Ia na kena rara me caga ruasagavulu ka walu na kena balavu, ka ruasagavulu ka walu na kena raraba e na kena veiyasana e va; ia na belena e volita me caga dua; ia na rara e botona me caga rua e na veiyasana; ia na kenai kabakaba me qaradonu ga ki cake.
18A sa kaya vei au ko koya, Na luve ni tamata, sa vosa vakaoqo na Turaga ko Jiova; Me vakaoqo nai valavala ni cabocabo-ni-soro e na siga era na cakava, me vakacabora kina e delana nai soro kama, ka kureitaka ki delana na dra.
19Ia mo solia vei ira na bete na luve i Levi era kawa i Satoki, sa ra torovi au, sa kaya na Turaga ko Jiova, me cakacaka vei au, e dua na luve ni karavau mei soro ni valavala ca.
20Ia mo kauta e so na kena dra, ka boroya kina na kenai tautauri e va, kei na muana e va ni rara, kei na kenai yalayala e na veiyasana: ia mo sa vakasavasavataka ka sorovaka.
21Mo kauta talega na karavau sai soro ni valavala ca, ia ena vakama ko koya e na kena yasana dodonu ni vale mai taudaku ni vale tabu.
22Ia e nai karua ni siga mo vakacabora e dua na luve ni koti o tawa ca mei soro ni valavala ca; a ra na vakasavasavataka nai cabocabo-ni-soro, me vaka sa ra vakasavasavataka e na karavau.
23Ia ni sa oti na nomu vakasavasavataka, mo qai cabora e dua na luve ni karavau sa tawa ca, kei na sipi tagane mai na qele ni sipi, e dua sa tawa ca;
24mo mani cabora e na mata i Jiova, ia ko ira na bete me ra kureitaka e so na masima ki deladrau, ka cabora vei Jiova mei soro kama.
25Me bogi vitu mo cakava tiko e na veisiga e dua na koti mei soro ni valavala ca: e dua na luve ni karavau, kei na sipi tagane mai na qele ni sipi, e dua sa tawa ca, me ra cakava talega.
26Me bogi vitu me ra sorovaka tiko nai cabocabo-ni-soro, ka vakasavasavataka, ka vakatabui ira.
27Ia ni sa oti na veibogi ko ya, ka yaco nai kawalu ni siga, me ra qai cakava tiko na bete e nai cabocabo-ni-soro na nomudoui soro kama kei na nomudoui soro ni veivinakati; ia kaʼu na vinakati kemudou, sa kaya na Turaga ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
