Ai Vola I Isirieli Na Parofita 36 - AI VOLA TABU（FIJ1864）

Sa vakacegui na vanua vaka-Isireli, e na vuku ni ra sa cudruvi na lewe ni veivanua, sa vakacacani ira, 1-7, kei na vuku ni vosa ni yalayala ni Kalou, 8-15. Sa ra biu na Isireli e na vuku ni nodrai valavala ca, 16-21, sa ra na kauti tale mai, ka vakayalosavasavataki, ka tiko vinaka, e na vuku ni loloma wale ni Kalou, kei na lewa vinaka ni Mesaia, 22-58.

1IA ko iko, na luve ni tamata, mo ia tale na parofisai ki na veiulu-ni-vanua nei Isireli, ka kaya,

Na veiulu-ni-vanua nei Isireli, dou rogoca na vosa i Jiova:

2Sa vosa vakaoqo na Turaga ko Jiova; E na vuku ni sa kaya na meca vei kemudou, Ue, na vanua-cecere makawa talega sa qai noda me taukena:

3o koya o qo mo parofisai kina, ka kaya, Sa vosa vakaoqo na Turaga ko Jiova; E na vuku ni ra sa vakacacani kemudou, ka tilomi kemudou e na veiyasana, mo dou nodra vanua na veimatanitu sa vo, ni dou sa cavuti tu talega e na gusudra na dauvosa, ka vakarogocataki vei ira na tamata:

4o koya o qo, oi kemudou na veiulu-ni-vanua nei Isireli, dou rogoca kina na vosa ni Turaga ko Jiova; Sa vosa vakaoqo na Turaga ko Jiova ki na ulu-ni-vanua kei na ulu-ni-koro, ki na uciwai kei na veibuca, ki na veitikina lala kei na veikoro biu, o qori ka vakacacani, ka vakalialiai vei ira na vo ni veimatanitu sa tiko volita;

5o koya o qo sa vosa vakaoqo kina na Turaga ko Jiova; E na noqu vuvu katakata kaʼu sa vosataka vakaidina kina na kedra na vo ni veimatanitu, kei Itomi kecega, era sa vota na noqu vanua me nodra ni ra reki e na vu ni yalodra, ka beca e na vu ni lomadra, me biuta ga me vakacacani.

6O koya o qo, mo parofisaitaka kina na vanua nei Isireli, ka kaya ki na ulu-ni-vanua, kei na ulu-ni-koro, kei na uciwai, kei na veibuca, Sa vosa vakaoqo na Turaga ko Jiova; Raica, oi au, niʼu a vuvu ka cudru, kaʼu a vosa kina, e na vuku ni dou sa vakamaduataki vei ira na veimatanitu:

7o koya o qo sa vosa vakaoqo kina na Turaga ko Jiova, Au sa laveta cake na ligaqu, Sai ira dina na veimatanitu sa tiko voliti kemudou sa ra na vakamaduataki sara.

8Ia koi kemudou, na veiulu-ni-vanua nei Isireli, a nomudou taba ni kau dou na tubura ga, kei na nomudou vua ni kau dou na vuataka vei ira na noqu tamata na Isireli; ni ra sa voleka ni lako mai.

9Ni sai au, raica, sa totaki kemudou, ia kaʼu na lesu tale vei kemudou, a dou na wereci ka kaburaki kina:

10ia kaʼu na vakalewevuqataka na kemudou lewe ni vanua, era mataqali nei Isireli kece sara ga: ena tawa talega na veikoro, ka vakavale na veitikina lala:

11ia kaʼu na vakalevutaka vei kemudou na tamata kei na manumanu; a ra na tubu ka luvea: kaʼu na vakatikori kemudou me vaka na nomudou tiko eliu, ka cakava na ka me vinaka cake e na nomudou tiko eliu: ia dou na kila ni sai au ko Jiova.

12Io, kaʼu na lewa na tamata me ra lakovi kemudou tikoga, io na noqu tamata na Isireli; a ra na taukeni iko, ia ko na nodra vanua, ka sega tale ni vakaluveniyalitaki ira.

13Sa vosa vakaoqo na Turaga ko Jiova; E na vuku ni ra sa kaya vei iko, Sai iko na vanua sa daukania na lewena, ka dauvakaluveniyalitaka na nomu veimatanitu;

14ia na lewemu ko na sega talega ni kania, se vakaluveniyalitaka na nomu veimatanitu, sa kaya na Turaga ko Jiova.

15Au na sega talega ni vakarogotaka tale vei iko na nodrai rogorogo ca na veimatanitu, kei na nodra veivakalialiai na veimataqali ko na sega ni bitaki tale kina kei na nomu veimatanitu ko na sega ni vakabalea tale, sa kaya na Turaga ko Jiova.

16A sa yaco tale vei au na vosa i Jiova, ka vaka,

17Na luve ni tamata, na matanitu nei Isireli ni ra a tiko e na nodra vanua, era sa vakadukadukalitaka e na nodrai valavala kei na nodra cakacaka: sa vaka na nona tawa savasava na alewa sa tawase na nodrai valavala e mataqu.

18Ia kaʼu a sovaraka kina na noqu cudru vei ira e na vuku ni dra era sa vakadavea e na vanua, kei na vuku ni nodra matakau era sa vakadukadukalitaka kina:

19ia kaʼu a dui vakasevi ira kina ki na veimatanitu, ka ra duibiubiuti ki na veivanua: me vaka na nodrai valavala kei na nodra cakacaka kaʼu a lewai ira.

20Ia ni ra dui yaco ki na veimatanitu, era dui lakova, era sa vakacacana na yacaqu tabu, a ra qai kaya vei ira, Sai ira o qo na tamata i Jiova, ia mai na nona vanua era sa lako tani maikina.

21Ia kaʼu a vosota ga e na vuku ni yacaqu tabu, a ya sa ra vakacacana na mataqali nei Isireli e na veimatanitu, era dui yacova.

22O koya o qo mo kaya kina ki na mataqali nei Isireli, Sa vosa vakaoqo na Turaga ko Jiova; Sa sega e na vukumudou, na mataqali nei Isireli, kaʼu sa cakava kina na ka o qo, e na vuku ga ni yacaqu tabu, a ya dou sa vakacacana e na veimatanitu, dou sa dui yacova.

23Ia kaʼu na vakatabuya na yacaqu levu, ka vakacacani e na veimatanitu, a ya dou a vakacacana e na kedra maliwa; a ra na kila na veimatanitu ni sai au ko Jiova, sa kaya na Turaga ko Jiova, niʼu sa vakatabui, vei kemudou e matadra.

24Niʼu na kauti kemudou mai na veimatanitu, ka vakasoqoni kemudou mai na veivanua kecega, ka kauti kemudou ki na nomudou vanua.

25Au na qai kuretaki kemudou e na wai makare, dou na qai savasava: mai na nomudou dukadukali kecega, kei na nomudou matakau kecega, kaʼu na vakasavasavataki kemudou.

26Au na solia talega vei kemudou na loma vou, io na yalo vou kaʼu na viritu ki na lomamudou: au na kauta tani talega na loma vatu vei kemudou, ka solia vei kemudou na loma vakalewe.

27A yaloqu talega kaʼu na viritu ki na lomamudou, ka cakavi kemudou me muria na noqu vunau, ia na noqu lewa dou na vakabauta ka cakava.

28Dou na tiko talega e na vanua kaʼu a solia vei ira na nomudou qase; ia dou na yaco me noqu tamata, oi au talega kaʼu na yaco me nomudou Kalou.

29Ia kaʼu na vakabulai kemudou mai na nomudou dukadukali kecega: kaʼu na kaciva na sila, ka vakalevutaka, ka sega ni vakayacora na dausiga vei kemudou.

30Au na vakalevutaka talega na vua ni kau vua, kei na lewe ni were, mo dou kakua tale ni vakarogocataki e na veimatanitu e na vuku ni dausiga.

31Dou na qai vakananuma na nomudoui valavala ca, kei na nomudou cakacaka sa tawa vinaka, ia dou na vakasisilataki kemudou vakai kemudou e na vuku ni nomudou caka cala kei na nomudoui valavala vakasisila.

32Dou kila mada, ni sa sega e na vukumudou kaʼu sa cakava kina na ka o qo, sa kaya na Turaga ko Jiova: dou madua ka taqaya e na vuku ni nomudoui valavala, oi kemudou na mataqali nei Isireli.

33Sa vosa vakaoqo na Turaga ko Jiova; E na siga kaʼu sa vakasavasavataki kemudou kina mai na nomudou caka cala kecega, kaʼu na qai vakatikori kemudou e na veikoro, ena vakakoro talega na veitikina lala.

34Ia na vanua lala ena wereci, ia ka lala sara ga e matadra kece ka lako voli kina.

35A ra na qai kaya, A vanua o qo ka lala sa qai yaco mo vaka na were ko Iteni; ia na veikoro lekutu ka lala ka rusa sa qai viribaiti, ka tawa.

36A ra na kila na vo ni veimatanitu sa tiko voliti kemudou ni sai au ko Jiova kaʼu sa tara na koro ka rusa, ka taura na vanua ka lala: oi au ko Jiova kaʼu sa cavuta, kaʼu na cakava talega.

37Sa vosa vakaoqo na Turaga ko Jiova; E na ka o qo kaʼu na masuti kina vei ira na mataqali nei Isireli, meʼu cakava vei ira; au na vakalewevuqataki ira me vaka era qele ni tamata;

38me vaka na qele ni sipi tabu, me vaka na qele ni sipi mai Jerusalemi e na kena solevu tabu; ena tawa vakakina na Veikoro lala e na qele ni tamata: a ra na kila ni sai au ko Jiova.