Ai Vola I Isirieli Na Parofita 35 - AI VOLA TABU（FIJ1864）

Sa cudruvi ko Seira, na nodra vanua na luve i Itomi, e na vuku ni nodra cati ira na Isireli, 1-15.

1A SA yaco vei au na vosa i Jiova, ka vaka,

2Na luve ni tamata, mo vaqara na matamu ki na ulu-ni-vanua ko Seira, ka parofisaitaka na kena,

3ka kaya kina,

Sa vosa vakaoqo na Turaga ko Jiova; Raica, sai au na nomu meca, na ulu-ni-vanua ko Seira, ia kaʼu na dodoka yani na ligaqu me tauci iko, ka vakalalataki iko sara.

4A nomu veikoro kaʼu na vakacacana, ia ko iko, ko na rusa sara, ka kila ni sai au ko Jiova.

5E na vuku ni ko sa yaloca tikoga, ka sa soli ira na luve i Isireli ki na kaukauwa ni seleiwau e na gauna ni nodra rarawa, e na gauna ka tini kina na caka cala.

6O koya o qo, me vaka na dina ni noqu bula, sa vosa vakaoqo kina na Turaga ko Jiova, au na vakarautaki iko vakaidina ki na dra, ia na dra ena vakasavi iko: ni sa dra ko a tawa cata, sa dra ga ena vakasavi iko.

7Ia na ulu-ni-vanua ko Seira kaʼu na vakalalataka sara, ka muduki koya tani maikina sa lako voli tani kei koya sa lako tale yani.

8Ia kaʼu na vakatawa na nona veiulu-ni-vanua e na nona vuetaki: e na nomu veiulu-ni-koro, kei na nomu veibuca, kei na nomu uciwai kecega, era na bale kina era vuetaki e nai seleiwau.

9Au na cakavi iko me vanua lala ka tawa mudu, ia na nomu veikoro ena sega ni tawa tale: ia dou na kila ni sai au ko Jiova.

10E na vuku ni ko a kaya, A matanitu e rua o qo kei na vanua e rua o qo ena noqu ga, ia keimami na taukena; ia ka sa tiko kina ko Jiova:

11o koya o qo, me vaka na dina ni noqu bula, sa kaya kina na Turaga ko Jiova, Au na cakacaka talega me vaka na nomu cudru, ka vaka na nomu vuvu ko sa muria ni ko cati ira; ia kaʼu na kilai vei ira, niʼu sa qai lewai iko.

12Ia ko na kila ni sai au ko Jiova, kaʼu sa rogoca kecega na nomu vosa ca ko sa vosavakacacataka kina na veiulu-ni-vanua nei Isireli, ka kaya, Sa vakalalataki, sa soli vei keda me kania.

13Ia dou a bolei au vakaoqo e na gusumudou, ka sa vakalevutaka na nomudou vosa ca vei au: oi au kaʼu sa rogoca.

14Sa vosa vakaoqo na Turaga ko Jiova; Ni sa qai reki ko vuravura kecega, kaʼu na vakacacani iko sara.

15Me vaka ni ko a marautaka na nodra vanua na mataqali nei Isireli, e na vuku ni sa lala, kaʼu na cakacaka vakakina vei iko: o na vakalalataki sara, na ulu-ni-vanua ko Seira, io ko Itomi kecekece sara ga: a ra na kila ni sai au ko Jiova.