Ai Vola I Isirieli Na Parofita 28 - AI VOLA TABU（FIJ1864）

A Kalou, sa cudruvi tui Teiri e na vuku ni nona viaviakalou, 1-10. Sa lelevaki nai ukuuku i tui Teiri e na vuku ni sa vakacacani e na nonai valavala ca, 11-19. Sa cudruvi ko Saitoni, 20-24. O ira na Isireli era vakabobulataki era na vakabulai tale, 25, 26.

1A SA yaco vei au na vosa i Jiova, ka vaka,

2Na luve ni tamata, mo kaya vua na tui Teiri,

Sa vosa vakaoqo na Turaga ko Jiova; E na vuku ni sa laveti cake na lomamu, ni ko sa kaya talega, Sa Kalou koi au, e nai tikotiko ni Kalou kaʼu sa tiko, e na loma ni wasawasa; ia ko sa tamata ga, ka sega ni Kalou, ka sa vakatura na lomamu me vaka na loma ni Kalou:

3raica, sa vuku ko iko ka lialia ko Tanieli; sa sega e dua na ka vuni me ra tabonaka vei iko:

4ni ko vuku ka yalomatua ko sa rawata kina na nomui yau, ka katoa na koula kei na siliva ki na nomu vale ni yau:

5ni sa levu na nomu vuku kei na nomu dauveivoli ko sa vakalevutaka kina na nomui yau, a sa laveti cake na lomamu e na vuku ni nomui yau.

6O koya o qo sa vosa vakaoqo kina na Turaga ko Jiova, E na vuku ni ko sa vakatura na lomamu me vaka na loma ni Kalou;

7o koya o qo, raica, au na kauti ira mai kina vei iko na kai tani, na nodra bati qaqa na veimatanitu: a ra na ucuna na nodrai seleiwau me tauca na nomu vuku lagilagi, a ra na vakacacana na nomu matavinaka.

8Era na kauti iko sobu ki na rusa, ia ko na mate me vaka ni ra mate era vakamatei e na loma ni wasawasa.

9O na kaya tiko li, Sa Kalou koi au, e na mata i koya sa vakamatei iko? ia ko sa tamata ga, ka sega ni Kalou, e na liga i koya sa vuetaki iko.

10E na mate era mate kina na tawa cilivi ko na mate ga kina e na ligadra na kai tani: ni sai au kaʼu sa cavuta, sa kaya na Turaga ko Jiova.

11A sa yaco tale vei au na vosa i Jiova, ka vaka,

12Na luve ni tamata, mo taurivaka na kena lele na tui Teiri, ka kaya vua, Sa vosa vakaoqo na Turaga ko Jiova; Sai iko sa vakaotia sara na kenai vakarau, ko sa vutu ni vuku, ka lagilagi duaduaga.

13Mai Iteni na were ni Kalou ko a tiko kina; a vatu talei kecega sa kemui ubi, na saritiusi, na topasa, na tiamodi, na perili, na onikisa, kei na jasipa, na safairi, na emeralita, kei na rupi, kei na koula: sa mataitaki oti na nomu lali kei na nomu bitu-ni-vakatagi e tikimu, e na siga ko a buli kina sa vakarau tu ga.

14Sai iko na jerupi lumuti sai vakaruru; ia kaʼu a vakatikori iko: ko a tiko e na ulu-ni-vanua tabu ni Kalou; ko a veilakoyaki tu e na loma ni vatu buka.

15Sa dodonu sara ko iko e na nomui valavala mai na siga ko a buli kina, ni sa bera ni kune vei iko na caka cala.

16Ni sa levu na nomu dauveivoli era sa vakasinaiti iko e nai valavala kaukauwa, ia ko sai valavala ca: o koya o qo kaʼu na vakacacataki iko tani kina mai na ulu-ni-vanua ni Kalou: ia kaʼu na vakarusai iko tani, na jerupi sai vakaruru, mai na loma ni vatu buka.

17Sa laveti cake na lomamu e na vuku ni nomu lagilagi, o sa vakaucacataka na nomu vuku ni ko matavinaka: kaʼu na viritaki iko ki na qele, kaʼu na laivi iko tu e matadra na tui, me ra raici iko.

18Ni sa levu na nomu caka cala kei na caka cala ni nomu dauveivoli, ko sa vakacacana kina na nomu veiyasana tabu; o koya o qo kaʼu na vakayacora kina na buka mai na kemu maliwa, ena kani iko o qori, ia kaʼu na vakamai iko mo sa dravusa e dela i vuravura e matadra kece era raici iko.

19O ira kece vei ira na veimataqali era kilai iko era na kidacalataki iko: o na yaco me ka e rerevaki, ia ko na segasega sara.

20A SA yaco tale vei au na vosa i Jiova, ka vaka,

21Na luve ni tamata, mo vaqara na matamu ki Saitoni, ka parofisaitaka na kena,

22ka kaya,

Sa vosa vakaoqo na Turaga ko Jiova; Raica, sai au na nomu meca, Saitoni; ia kaʼu na vakacaucautaki e na kemu maliwa: a ra na kila ni sai au ko Jiova, niʼu na ia na veicudruvi vua, ka sa vakarokorokotaki vua.

23Niʼu na tala vua na mate dauveitauvi, kei na dra ki na nona sala ni koro; a ra na bale na vuetaki e na kena maliwa e nai seleiwau sa na tauci koya e na veiyasana; a ra na kila ni sai au ko Jiova.

24Ia ena sega tiko vei ira na mataqali nei Isireli e dua na kedra soni dauveivuti, se dua na kedra wa-vakavotona dauveivakararawataki vei ira kece era tiko voliti ira, ka beci ira; a ra na kila ni sai au na Turaga ko Jiova.

25Sa vosa vakaoqo na Turaga ko Jiova; Niʼu na vakasoqoni ira oti na mataqali nei Isireli maivei ira na veimataqali era dui vakasevi kina, ka sa vakarokorokotaki vei ira e matadra na veimatanitu, era na qai tiko e na nodra vanua kaʼu a solia vei Jekope na noqu tamata:

26a ra na tiko vakacegu kina, ka tara vale, ka tea na veivainivaini; io, era na qai tiko vakacegu, niʼu na sa cudruvi ira oti kece era beci ira ka ra tiko voliti ira; a ra na kila ni sai au ko Jiova na nodra Kalou.