Ai Vola I Isirieli Na Parofita 27 - AI VOLA TABU（FIJ1864）

A kena vutuniyau ko Teiri, 1-25. A kena rusa vakaidina sara, 26-36.

1A SA yaco vei au na vosa i Jiova, ka vaka,

2Ia ko iko, na luve ni tamata, mo taurivaka na lele e na vuku i Teiri;

3ka kaya vei Teiri,

O iko sa toka mai matasawa, ka nodra koro dauveivoli na veimataqali mai na veiyanuyanu e vuqa, sa vosa vakaoqo na Turaga ko Jiova;

O iko Teiri, ko sa kaya, Au sa koro lagilagi duaduaga.

4Sa tu mai na loma ni wasawasa na nomui yalayala, o ira na kemu matai era sa tarai iko me koro lagilagi duaduaga.

5E na paini ni Siniri era sa cakava kina na rara kecega ni nomu waqa: a sitari ni Lipanoni era sa kauta me cakava kina na nomui vana.

6E na oke ni Pasani era sa cakava kina na nomui voce; a nomui tikotiko era sa cakava e na dakua e vono tabua, ka kau mai na yatu Kitimi.

7A malo matailalai ni Ijipita e veivolavolai sai koya ko sa vakarewa me nomu kuila; a malo karakarawa ka damudamu e kau mai na yatu Ilisa sa nomui vakaruru.

8O ira na kai Saitoni kei na kai Arivati sa ra nomu lewe ni waqa: o ira na nomu vuku, Teiri, ka tikori iko, sa ra nomu turaga ni waqa.

9O ira na qase ni Kipali kei ira na kena vuku sa ra tikori iko me ra nomu dausau-bulu: a waqa kecega ni wasawasa kei na lewedra sa ra tikori iko me ra cakava na nomui yau e dauveivolitaki.

10O ira na kai Perisia kei na kai Luti kei na kai Futi era sa tiko me nomu bati, me nomu tamatai valu: nai sasabai kei nai vakaruru-ni-ulu era sa rubeca e tikimu, era sa vakaraitaka na kemui ukuuku.

11O ira na gone ni Arivati kei na nomu bati era sa wavu tu e dela ni nomu bai e na veiyasana, kei ira na kai Kamati era sa tikora na nomu veivale-cecere: na nodrai sasabai era rubeca e na veitikina ni kena lalaga; era sa cakava na nomu lagilagi me sa ue sara.

12O Tarisisi, sa dauveivoli kei iko e na vuku ni levu ni yau kecega; na siliva, na aironi, na tini, kei na uma, era sa veivoli-taka e na nomu rara ni veivoli.

13O Javana, kei Tupali, kei Meseki, era dauveivoli kei iko: na tamata kei nai yaya parasa era sa veivoli taka e na nomu rara ni veivoli.

14O ira na mataqali ni Tokarama era sa vei volitaka na ose, kei na daukila ose, kei na asa, e na nomu rara ni veivoli.

150 ira na gone ni Titana, era dauveivoli kei iko; na lewe ni yanuyanu e vuqa, era dauvolia na ka ko sa rawata: na kaukamea tabua kei na boca era kauta yani vei iko me kenai voli.

16O Siria, sa dauveivoli kei iko e na vuku ni levu ni yaya ko sa cakava: na emeralita, kei nai sulu damudamu, kei nai sulu veivolavolai, kei na malo matailalai, kei na lase, kei na rupi, era veivoli-taka e na nomu rara ni veivoli.

17O Juta, kei na vanua ko Isireli, era dauveivoli kei iko: na witi ni Minici, kei Panake, kei na oni, kei na waiwai, kei na drega, era sa veivolitaka e na nomu rara ni veivoli.

18O Tamasiko, sa dauveivoli kei iko e nai yaya levu ko sa cakava, e na vuku ni levu ni yau kecega; e na waini ni Eliponi, kei na vutika ni sipi e vulavula.

19O Tani talega kei Javana-meusali, era dauveivoli e na nomu rara ni veivoli: na aironi makamakalivata, kei na kasia, kei na kalamo, sa tu e na nomu rara ni veivoli.

20O Titana, sa dauveivoli kei iko e na malo me tevuki e na vale-vodoki.

21O Arapea, kei na turaga kecega ni Kitari, era sa dauveivoli kei iko e na lami, kei na sipi tagane, kei na koti: e na ka o qo era dauveivoli kei iko.

22O ira na dauveivoli mai Sipa kei Reama, era sa dauveivoli kei iko: na vua ni kau kecega e boi vinaka sara, kei na vatu talei kecega, kei na koula, era sa veivolitaka e na nomu rara ni veivoli.

23O Karana, kei Kane, kei Iteni, kei ira na dauveivoli mai Sepa, kei Asuri, kei Kilimati, era dauveivoli kei iko:

24o ira o qo era sa dauveivoli kei iko e nai yaya kecega, e nai tutuvi loaloa, kei nai sulu veivolavolai, kei na katoi sulu dredre, sa oloni e na dali, ka caka e na sitari, kei na ka e so ko sa dauveivolitaka.

25A waqa ni Tarisisi, sa daumeketaki iko e na nomu rara ni veivoli: ia ko sa vakavutuniyautaki, ka sa rogo sara e na loma ni wasawasa.

26Ki na dua na wasa levu era sa kauti iko kina ko ira na nomu dauvoce; e na tokalau ko sa kasere kina e na loma ni wasawasa.

27A nomui yau, kei na nomu rara ni veivoli, na nomu dauveivoli, na nomu lewe ni waqa, kei na nomu turaga ni waqa, na nomu dausau-bulu, kei ira era cakava na nomui yau e dauveivolitaki, kei ira kecega na nomu tamatai valu, ka tikori iko, kei ira kecega na nomui vavakoso ka tiko e na kemu maliwa, era na lutu dromu ga ki loma ni Wasawasa e na siga ko sa rusa kina.

28Ni sa rogo na nodra tagi na nomu turaga ni waqa, ena yavala kina na biau.

29A ra na sobu mai na nodra waqa ko ira kece era dautarai voce, kei ira na lewe ni waqa, kei ira kece era turaga ni waqa mai na wasawasa, a ra na wavu tu e vanua;

30a ra na vakarogotaka na domodra e na vukumu, ka tagi vakalevu, ka kabua na uludra e na kuvu-ni-soso, era na qiqi tu e na dravusa:

31a ra na tasia sara na uludra e na vukumu, ka vauci ira e nai sulu taqarotu, a ra na tagicaki iko, ni sa rarawa na lomadra, e na qoqolou rarawa.

32A ra na taurivaka e na vukumu, ni ra ia na tagi yaso, e dua na lele, ka lelevaki iko, ka kaya, Na koro cava me rau vakatauvatani kei Teiri, ni vagalui vakaoqo mai e na loma ni wasawasa?

33Ni sa yauti ki vanua na nomu kamunaga mai na so ni wasa, ko a vakasaututaki ira kina na veimataqali e vuqa; ni ka levu sara na nomui yau kei na nomu ka e dauveivolitaki, ko a vakavutuniyautaki ira kina na tui kei vuravura.

34E na siga ko na kasere kina e na ua e na wai titobu, sa na qai rusa vata na nomui yau e dauveivolitaki kei na nomui vavakoso e na kemu maliwa.

35O ira kece na lewe ni veiyanuyanu era na kidacalataki iko, o ira talega na nodra tui era na tauvi rere vakalevu sara, era na vakaveveku mata.

36O ira na dauveivoli e na veimataqali era na vakasiusiutaki iko; o na yaco me ka e rerevaki, ia ko na segasega sara.