Ai Vola I Isirieli Na Parofita 24 - AI VOLA TABU（FIJ1864）

Ni sa vakatakarakarataki e na kuro sa kere tu, 1-5, sa vakatakilai kina ni na vakarusai vakaidina ko Jerusalemi, 6-14. Ia na parofita, ni sa tabu vua me tagicaki koya na watina sa mate, sa vakatakilai kina ni na ca sara ko ira na kai Jutia ka tawa yaga sara ni ra tagicaka, 15-27.

1A SA yaco tale vei au na vosa i Jiova e nai kaciwa ni yabaki, e nai katini ni vula, e nai katini ni siga ni vula, ka vaka,

2Na luve ni tamata, mo vola me nomu na yaca ni siga, na siga dina o qo: sa vakaraui valu ko tui Papiloni na kei Jerusalemi e na siga dina o qo.

3Ia mo cavuta na vosa vakatautauvata ki na mataqali dautalaidredre, ka kaya vei ira,

Sa vosa vakaoqo na Turaga ko Jiova; Mo viritoka e dua na kuro, viritoka ga, ka mani sova kina na wai:

4kumuna kina na lewena, na tikina vinaka kecega, na sagana, kei na ligana; vakasinaita e na sui digitaki:

5na sipi sa uro mo kauta, ka vakama talega na suina e rukuna; me sa kere vakavinaka sara, me ra vakasaqa talega na kena sui e lomana.

6O koya o qo sa vosa vakaoqo kina na Turaga ko Jiova; Ena ca na koro tauvi dra, na kuro sa tu kina na kena de-ni-kuro, na kena de-ni-kuro sa tawa takali maikina! me dui kau vakatikina mai na lewena; me kakua na veidigiyaka.

7E na vuku ni kena dra ni sa tu ga vua; sa tauca ko koya e na dela ni vatu; sa sega ni livia ki na qele, me ubia e na kuvu-ni-soso;

8me na vakatubura kina na cudru me ia na vei cudruvi; au sa tauca na kena dra e na dela ni vatu, me kakua kina ni tabonaki.

9O koya o qo sa vosa vakaoqo kina na Turaga ko Jiova; Ena ca na koro tauvi dra! io koi au, kaʼu na cakava nai kelekele buka me levu.

10Kelea na buka, vakacaudreva na buka waqa, me kama qesa na lewe ni kuro, ka vakaboivinakataka e na boro, me kama talega na sui.

11Me qai toka ni sa lala e na kena qilaiso, me katakata, ka kama na kena parasa, ka vakawaicalataki e loma ni kuro na kena duka, me yavu na kena de-ni-kuro.

12Sa vakaocataki wale ko koya, a sa tawa takali tani vua na kena de-ni-kuro levu: me kena ga na buka na kena de-ni-kuro.

13Sa ka velavela na nomu dukadukali: e na vuku niʼu a vakasavasavataki iko, ia ko a bese ga ni savasava, ko na sega kina ni vakasavasavataki tale mai na nomu dukadukali, kaʼu na vakayacora mada ga na noqu cudru vei iko.

14Oi au ko Jiova kaʼu sa cavuta: ena yaco ga, niʼu na cakava, kaʼu na sega ni suka kimuri, kaʼu na sega talega ni vosota, kaʼu na sega talega ni veivutuni; me vaka na nomui valavala, ka vaka na nomu cakacaka, era na lewai iko, sa kaya na Turaga ko Jiova.

15A sa yaco tale vei au na vosa i Jiova, ka vaka,

16Na luve ni tamata, rai ca, au sa kauti koya tani vei iko na ka domoni ni matamu niʼu sa yavita: mo kakua ga ni yaso se tagi, me kakua talega ni dave na wai ni matamu.

17Me cegu na qoqolou, na tagica na mate mo kakua ni cakava, nai sala ni ulumu mo vauca ga vei iko, kei na nomui vava daramaka ki na yavamu, kakua ni ubia na tebenigusumu, kei na kakana ni somate kakua ni ko kania.

18Ia kaʼu a vosa vei ira na tamata e na mataka: a sa ciba na watiqu e na yakavi; ia kaʼu sa cakava e na mataka cake me vaka na ka sa vakaroti vei au.

19A ra sa kaya vei au na tamata, O na sega li ni tukuna vei keitou se bale vakacava vei keitou na ka o qo, ko sa cakava?

20Au a qai kaya vei ira, Sa yaco mai vei au na vosa i Jiova, ka vaka,

21Mo kaya vei ira na mataqali nei Isireli,

Sa vosa vakaoqo na Turaga ko Jiova; Baica, au na vakacacana na noqu vale tabu, nai ukuuku ni nomudou kaukauwa, na ka domoni ni matamudou, na gone ni toko talega ni yalomudou; kei na luvemudou tagane kei na luvemudou alewa, o ira dou a vakalaiva tikʼani, era na bale e nai seleiwau.

22Ia dou na cakava me vaka na ka kaʼu sa cakava: na tebenigusumudou dou na sega ni ubia, kei na kakana ni somate dou na tawa kania:

23ena vakaisala talega na ulumudou, ka vakaivava na yavamudou: dou na sega ni yaso se tagi, ia dou na uru ga yani e na vuku ni nomudou caka cala, ka dui veiqoloutaki vakai kemudou.

24Ia ko Isikieli, ena kemudoui vakatakilakila ko koya: na ka kece ka cakava ko koya dou na cakava vakakina: ia ni sa yaco na ka o qo, dou na kila ni sai au na Turaga ko Jiova.

25O iko talega, na luve ni tamata, ena sega beka ni yaco e na siga kaʼu sa kauta tani kina vei ira na nodra kaukauwa, kei na nodra marau lagilagi, na ka domoni ni matadra, kei na ka sa lasa kina na yalodra, na luvedra tagane kei na luvedra alewa,

26io e na siga ko ya ena qai lako mai vei iko ko koya sa dro, me vakarogotaka mai ki na daligamu?

27E na siga ko ya ena qai dalaga na gusumu vei koya sa dro, ia ko na vosa, ka sega ni galu tiko: ia ko na yaco me kedrai vakatakilakila: a ra na kila ni sai au ko Jiova.