1SA yaco tale vei au na vosa i Jiova, ka vaka,
2Na luve ni tamata, sa lewe rua na alewa, erau tina vata:
3a rau sa ia na dauyatagane mai Ijipita; ni rau sa gonealewa tiko erau sa ia na dauyatagane: sa bikai maikea na sucudrau, io maikea sa rau tabaka na mata-ni-sucudrau vakagone-alewa.
4Ia na yacadrau ko Aola sa qase vei rau, kei Aolipa na tacina: a rau a noqu ga, ka rau vakasucuma na luvedrau tagane kei na luvedrau alewa. Ia na yacadrau; sai Samaria ko Aola, ia ko Jerusalemi ko Aolipa.
5A sa ia na dauyatagane ko Aola ni sa noqu tiko; ka sa domoni ira na nonai tau, na kai Asiria era tiko voleka,
6ka ra vakaisulu e nai sulu karakarawa, na turaga ni valu kei na turaga daulewa, era cauravou domoni kecega, ka dauvodo lako e na ose.
7Ia sa soli koya me ia na veibutakoci kei ira, era gone digitaki ni Asiria kecega, kei ira kece talega sa domona ko koya: e na nodra matakau kecega sa vakadukadukalitaki koya kina ko koya.
8Ia na nona dauyatagane mai Ijipita sa sega ga ni biuta: ni ra a koto kaya ni sa gonealewa ko koya, ka ra tabaka na sucuna vakagonealewa, ka sova vua na nodra dauyalewa.
9O koya o qo kaʼu sa soli koya kina ki na ligadra na nonai tau, ki na ligadra na kai Asiria, sa domoni ira ko koya.
10Sai ira o qo sa ra vakaraitaka na nona luvawale: kei na luvena tagane kei na luvena alewa sa ra kauta, kei koya dina sa ra vakamatea e nai seleiwau: a sa rogo kina na yacana vei ira na alewa; e na vuku ni veicudruvi sa ra ia vua.
11Ia ni sa raica ko tacina ko Aolipa, sa qai ca vakalevu mai vei rau ko koya e na nona dauveidomoni, ia na nona dauyatagane sa qai levu mai ka lailai na nona dauyatagane na tuakana.
12Sai ira na gone ni Asiria sa domona ko koya, na turaga ni valu kei na turaga daulewa, era tiko voleka, ka ra vakaisulu vakaiukuuku sara, ka dauvodo lako e na ose, ka ra cauravou domoni kecega.
13Au a qai raica ni sa vakadukadukalitaki ko koya, ni rau sai valavala vata ga,
14ni sa vakaikuritaka ko koya na nona dauyatagane: ka ni sa qai raica ko koya na tagane era volai e na lalaga ni vale, na kedrai vakatakarakara na kai Kalitea era volai e nai qumu,
15sa vauci e nai vau na tolodra, ka vakaisalataki e nai sala veivolavolai na uludra, era raici vakaturaga kecega, me vakataki ira na gone ni Papiloni mai Kalitea, na vanua era sucu kina:
16a sa domoni ira ko koya ni sa qai raici ira e na matana, a sa vakatadu mata vei ira ki Kalitea.
17A ra sa lako mai vua ko ira na gone ni Papiloni ki nai mocemoce ni loloma, ka vakadukadukalitaki koya e na nodra dauyalewa, a sa vakadukadukalitaki kina ko koya, a sa tawase tani na lomana maivei ira.
18Ia sa vakaraitaka vakaoqo ko koya na nona dauyatagane, ka vakatakila na nona luvawale: a sa qai tawase tani na lomaqu mai vua, me vaka ni sa tawase tani na lomaqu mai vua na tuakana.
19Ia ka sa vakalevutaka ga na nona dauyatagane, ni sa vakananuma ko koya na gauna sa gonealewa kina, ka ia na dauyatagane mai na vanua ko Ijipita.
20Ni sa domoni ira ko koya era nodrai tau, na lewedra sa vaka na lewe ni asa, ka sa vaka na kedrai vurevure na ose na kedrai vurevure.
21Ia ko a vakananuma vakakina na nomui valavala velavela ni ko a gone, ni ra tabaka na sucumu mai Ijipita e navuku ni sa mata-ni-sucumu vakagonealewa.
22O koya o qo, Aolipa, sa vosa vakaoqo kina na Turaga ko Jiova, Raica, au na vakauqeti ira na nomui tau me vala kei iko, o ira sa tawase tani na lomamu vei ira, ia kaʼu na kauti ira mai vei iko mai na veiyasana;
23o ira na kai Papiloni, kei ira kece na kai Kalitea, ko Pikoti, kei Soa, kei Koa, kei ira vata na kai Asiria kecega: era cauravou domoni kecega, na turaga ni valu kei na turaga daulewa, na turaga levu ka rogo, era vodo lako kecega e na ose.
24Ia ena lako mai na kemui valu e vakaiyaragi, kei na vale-vodoki, kei na yava vakavale-vodoki, kei nai vavakoso lewe vuqa; nai sasabai kei nai vakaruru kei nai sala ni valu era na tuva vakaivalu, me viribaiti iko: ia kaʼu na tauca na lewa e matadra, a ra na lewai iko me vaka na nodra lewa:
25ia kaʼu na tuva na noqu vuvu mo kemui valu, a ra na kitaki iko vakatakata sara: na ucumu kei na daligamu era na cebeta laivi; kei na nomu kawa e vo era na bale e nai seleiwau: o ira na luvemu tagane kei na luvemu alewa era na kauta; kei na nomu kawa e vo era na vakamai e na buka.
26A ra na luvata tani vei iko na nomui sulu, ka kauta tani na kemui yaya vakaiukuuku.
27Ia kaʼu na muduka tani vei iko na nomui valavala velavela, kei na nomu dauyatagane e kau mai na vanua ko Ijipita: o na sega kina ni ta cake e na matamu vei ira, io ko Ijipita, ko na tawa nanuma tale kina.
28Ni sa vosa vakaoqo na Turaga ko Jiova; Raica, au na soli iko ki na ligadra ko sa cati ira, ki na ligadra sa tawase tani vei ira na lomamu:
29a ra na kitaki iko e na yaloca, ka kauta kece tani na ka ko sa ocataka, ka laivi iko mo luvawale ka luveniyali: ena vakaraitaki talega na nomu luvawale ni dauyatagane, ia na nomui valavala velavela kei na nomu dauyatagane.
30Au na cakava na ka o qo vei iko, e na vuku ni ko sa muri ira na veimatanitu, me ia na dauyatagane, ka sa vakadukadukalitaki e na nodra matakau.
31Na sala ni tuakamu ko sa muria; o koya o qo kaʼu na solia kina na mena bilo ki na ligamu.
32Sa vosa vakaoqo na Turaga ko Jiova; A mena bilo na tuakamu ko na gunuva, sa titobu ka levu: o na dredrevaki ka vakalialiai; sa bilo tawa sara.
33O na vakamamautaki e na mateni kei na rarawa, e na bilo ni veivakidacalataki kei na veivakarusai, e na mena bilo na tuakamu ko Samaria.
34Ia ko na gunuva ka vakadiva, na kenai caca talega ko na vorolaka, ia na sucumu ko na cavuka: niʼu sa cavuta, sa kaya na Turaga ko Jiova.
35O koya o qo sa vosa vakaoqo kina na Turaga ko Jiova; E na vuku ni ko sa guilecavi au, ka vakanadakui au, mo colata ga kina na nomui valavala velavela kei na nomu dauyatagane.
36A sa kaya tale vei au ko Jiova, Na luve ni tamata, o na sega beka ni lewai Aola kei Aolipa? io, mo tukuna vei rau na nodraui valavala vakasisila;
37ni rau sa ia na dauyatagane, a dra talega sa tu e na ligadrau, e na nodrau matakau talega, erau sa ia na dauyatagane, a luvedrau talega, erau vakasucuma vei au, erau sa vakalakova ki loma ni buka, me katia.
38A ka talega o qo erau sa cakava vei au: erau sa vakacacana na noqu vale tabu e na siga ko ya, ka vakacacataka na noqu siga tabu.
39Ka ni rau a cabori ira oti na luvedrau ki na nodrau matakau, erau sa qai lako mai e na siga dina ko ya ki na noqu vale tabu me vakacacana; ia, raica, sa vakaoqo na ka erau sa cakava e na loma ni noqu vale.
40Ia o qo talega, ni dou a talakitaki ira na tamata vakayawa, ka vakatadu kedra mata; ka, raica, era sa lako mai: ko sa qai vui iko e na vukudra, ka qumuta na matamu, ka vakaiukuukutaki iko e nai ukuuku,
41ka mani tiko e nai mocemoce vakaturaga, ia nai kanakana sa vakarau tu e matana, na noqu ka boi vinaka kei na noqu waiwai talega ko sa viritu e delana:
42a domodra talega na lewe vuqa era tiko wale era sa tiko kaya: ia ka kedrai kuri na tagane o qo, e so na tamata wale era sa kauti mai, na kai Sipa mai na veikau, era daramaka na qato ki na ligadra, ka vakaisalataka vakaiukuuku na uludra.
43Au a qai cavuti koya sa madra e na dauyatagane, ka kaya, Era na qai ia li na veibutakoci kei koya talega o qo?
44A ra sa curu ga vua, me vaka era curu vua na alewa sa ia na dauyatagane: sa vakaoqo na nodra curu yani vei Aola kei Aolipa, koi rau na alewa velavela.
45Ia ko ira na tamata yalododonu, era na lewai rau me vaka na kedrai valavala na alewa dauyatagane, kei na kedrai valavala na alewa sa vakadavea na dra; e na vuku ni rau sa alewa dauyatagane, a dra talega sa tu e na ligadrau.
46Ni sa vosa vakaoqo na Turaga ko Jiova; Au na kauta cake mai kivei rau e dua nai vavakoso, ka soli rau me kauti tani ka vakacacani.
47Ena viriki rau talega e na vatu nai vavakoso, ka suaki rau e na nodrai seleiwau; a luvedrau tagane kei na luvedrau alewa era na vakamatea, kei na nodrau vale era na vakama e na buka.
48Ia kaʼu na muduka tani vakaoqo nai valavala velavela mai na vanua, me ra vakavulici kece kina na alewa me kakua ni muria na nomudraui valavala velavela.
49Ia era na sauma na nomudraui valavala velavela vei kemudrau, kei nai valavala ca ni nomudrau matakau drau na colata: ia drau na kila ni sai au na Turaga ko Jiova.
Who We AreWhat We EelieveWhat We Do
2025 by iamachristian.org,Inc All rights reserved.
