Ai Vola I Isirieli Na Parofita 10 - AI VOLA TABU（FIJ1864）

A raivotu ni qilaiso ni buka waqa, me duibiubiuti ki dela ni koro, 1-7. A raivotu ni jerupi, 8-22.

1AU a qai vakasarava, ka, raica mai na maliwa o qori e dela ni uludratou na jerupi sa dua na ka e votu mai ka vaka na vatu safairi, ka rairai me vaka nai vakatakarakara ni tikotiko vakaturaga.

2A sa vosa ko koya ki na tamata sa vakaisulu e na malo, ka kaya, Mo curu yani ki na maliwa ni yava e ruku ni jerupi, ka vakasinaita na ligamu e na qilaiso ni buka waqa mai na kedratou maliwa na jerupi, ka duibiubiuta ki na dela ni koro. A sa curu yani e mataqu.

3Ia na jerupi eratou sa tu e na yasa ni vale ki matau, ni sa curu yani na tamata; ia na o sa curuoso e na lomanibai eloma.

4A sa lako cake mai nai ukuuku i Jiova mai na jerupi, ki dela ni lago ni vale; a sa curuoso na vale e na o, ia na lomanibai sa curuoso e nai serau ni ukuuku i Jiova.

5Ia na domo ni tabadratou na jerupi sa rogo yani ki na lomanibai kisau, me vaka na domo ni Kalou Kaukauwa ni sa vosa ko koya.

6A sa yaco, ni sa vakarota ko koya na tamata sa vakaisulu e na malo, ka kaya, Mo kauta na buka waqa mai na maliwa ni yava, mai na maliwa ni jerupi; sa qai curu yani ko koya, ka tu volekata na yava.

7A sa dodoka na ligana e dua na jerupi mai na kedratou maliwa na jerupi ki na buka waqa e na maliwa ni jerupi, ka lavita, ka tauca ki na liga i koya sa vakaisulu e na malo: a sa taura ko koya, ka curu kitautuba.

8A sa votu maivei iratou na jerupi, na ka sa vaka na liga ni tamata e ruku ni tabadratou.

9Ia kaʼu sa vakasarava, ka raica e va na yava sa tu vata kei iratou na jerupi, e dua na yava sa tu vata kei na dua na jerupi, ka dua tale na yava sa tu kei na dua tale na jerupi: ia na kedratoui rairai na yava sa vaka na mata ni vatu perili.

10Ia na kedratoui rairai, sa tautauvata vava, ka sa vaka e dua na yava e na veimama ni dua na yava.

11Ni ratou sa lako, eratou sa lako e na batidratou vava; eratou sa tawa veigoleyaki ni ratou sa lako, ia na yasana sa goleva na ulu i ratou eratou sa muri koya kina; eratou sa tawa veigoleyaki ni ratou sa lako.

12Ia na yagodratou taucoko, kei na dakudratou, kei na ligadratou, kei na tabadratou, kei na yava, sa vakamatana sara, ka volita talega na nodratou yava vava.

13Ia vei iratou na yava sa kacivaki e daligaqu, Dou qiqi ga;

14A sa tauyava na matadratou: sai matai ni mata na mata ni jerupi, sai karua ni mata na mata ni tamata, sa kenai katolu na mata ni laioni, ka kenai kava na mata ni ikeli.

15A ratou sa laveti cake na jerupi. O qo na ka bula kaʼu a raica mai na uciwai ko Kipari.

16Ia ni ratou sa lako na jerupi, sa lako kei na yava eratou tu vata: ni sa vakate tabadratou na jerupi me vuka cake tani mai vuravura, sa sega ni vuki tani na yava talega ko ya vei iratou.

17Ni sa tu o qori, sa tu o qo; ni sa laveti cake o qori, sa laveti cake talega o qo: ni sa yalo ni ka bula sa tiko kina.

18Sa qai lako tani nai ukuuku i Jiova mai nai lago ni vale, ka tu ki dela ni jerupi.

19A ratou sa laveta cake na tabadratou na jerupi, a sa mani cecere ki vuravura e mataqu: ni ratou sa lako yani, na yava talega sa lako kei iratou, a ratou sa laʼki tu ki na matamata-ni-koro ni vale i Jiova kivakaki cake; ia nai ukuuku ni Kalou nei Isireli sa donui iratou maicake.

20O qo na ka bula kaʼu a raica e ruku i koya na Kalou nei Isireli mai na uciwai ko Kipari; ia kaʼu a kila ni sai iratou o qo na jerupi.

21Sa tauyava na matadratou, ka tauyava na tabadratou; a sa dua na ka e vaka na liga ni tamata e ruku ni tabadratou.

22Ia nai tovo ni matadratou sa matadratou ga ko ya kaʼu a raica mai na uciwai ko Kipari, na kedratoui rairai talega kei iratou dina: eratou sa dui lako vakadodonu ga kiliu.