Ai Vola I Isirieli Na Parofita 9 - AI VOLA TABU（FIJ1864）

E dua na raivotu, sa tukuni kina ko ira era na vakabulai, 1-4, kei na nodra cudruvi kecega sa vo, 5-7. Sa bese na Kalou ni vakamasuti e na vukudra, 8-11.

1A SA kaci vakadomoilevu e daligaqu ko koya, ka kaya, Me toro mai ko ira sa vakaraica na koro, io me ra dui taura yadua na nonai yaragi dauveivakarusai e na ligana.

2Ka, raica, e lewe ono na tagane eratou sa lako tu mai na sala mai na matamata-ni-koro ecake, sa donuya na tokalau, a ratou sa dui taura yadua na nonai yaragi dauveiyaviti e na ligana; ia e dua vei iratou na tagane sa vakaisulu e na malo, ka sa dua na nona tavaya wai ni volavola e na tolona: a ratou sa curu yani, ka tu volekata nai cabocabo-ni-soro parasa.

3Ia nai ukuuku ni Kalou nei Isireli sa lako cake mai na Jerupi, ka tu kina, ki nai lago ni vale.

A sa kaci ko koya ki na tamata sa vakaisulu e na malo, ka sa dua na nona tavaya wai ni volavola e na tolona;

4a sa kaya vua ko Jiova, Mo lako voli yani e na loma ni koro, e na loma i Jerusalemi, ka vola ki na yadredra na tamata era sa vutugu ka qoqolou e na vuku ni ka vakasisila kecega sa caka e na loma ni koro.

5Ia vei iratou e so tale sa kaya e daligaqu ko koya, Dou laʼki muri koya yani e na loma ni koro, ka ia na veiyaviti: me kakua ni vosovoso na matamudou, se dou yalololoma:

6na qase, na cauravou, dou vakamatei ira sara ga: kei na gonealewa, kei na gone lalai, kei na alewa talega, ia vua e dua na tamata sa volai, kakua ni dou toro yani kina; ia e na noqu vale tabu dou vakatekivu kina.

Eratou sa qai vakatekivu vei ira na tamata qase era tu e na mata ni vale.

7A sa kaya vei iratou ko koya, Dou vaqeleqeleataka na vale, ka vakasinaita na lomanibai e na moku: dou lako yani. A ratou sa lako yani me ia na veivakamatei e na koro.

8A sa yaco, ni ratou sa ia tiko na veivakamatei, ia kaʼu sa vakavoci mai koi au, kaʼu sa qai bale vakatoboicu, ka tagi, ka kaya, Ule, Turaga Jiova! o na vakarusai ira kecega na vo ni Isireli ni ko sa sovaraka na nomu cudru ki Jerusalemi?

9Sa qai kaya vei au ko koya, A nodra caka cala na mataqali nei Isireli kei Juta sa ka levu vakaidina sara, a sa sinai na vanua e na dra, ia na koro sa sinai tu e na veivakaucacataka ni ra sa kaya, O Jiova, sa biuti vuravura, ia ko Jiova, sa sega ni raica.

10Io koi au talega, ena sega ni vosovoso na mataqu, au na sega talega ni yalololoma, a nodrai valavala kaʼu na sauma ga ki na uludra.

11Ka, raica, na tamata sa vakaisulu e na malo, ka sa dua na nona tavaya wai ni volavola e na tolona, sa mai tukutuku ka kaya, Au sa cakava me vaka na ka ko sa vakarota vei au.